Вылка Ханец маӈгбада ненэць’. Тэта ненэцяӈгана недвата. Сэвсялмы пухуця небянда ня’ сидяриӈэ илеӈаха’, ӈули’’ маӈгбихи’. Небяда сэдора нида пирас’’. Хэвня’ сэдрабтавы ӈамгэ’ салъяда ӈарка,тад ӈод’’ пыди’ нянанди’ таӈар сал ӈамгэ хонана.

Тэта ненэця’’ Ханец Вылкам’ ӈули’’ сэхэдадонзь. Тиканда малхана тэкоцида мал’ ӈокахандо’ маръядонзь. Пыди’ илензянданди’ хаевэдо’ юпёй тэкоця. Тэсялво’’махаданди’ тэтади’ сидди’ хурка ӈаврасипой’’ итя ӈабеня яв’ вархана хае. Ӈаводана тикы яхана Хохоро’’ма Лабтандер илевы, тиканда тикы няди’ сидди’ ӈоб’ ӈамгэкохона нядаби. Ханецан’ тамна туним’ ми’’ӈава.

Хохоро’’ма’ ӈод’’ ӈока тэда яӈговы, тола няхар’’ ю’’ тэда. Нув’ нарэйко’’махад ӈобӈгуна Хохоро’’ма мяканди’ то. Няди’ ӈамзи, хоб, порхом’, муӈго тэвравы. Ханецан’ пыда тарем’ ма: - Тюку яхана ӈаворципой’’ хась пиртари’. Мань’ нянди’ ӈаном’ – харпасм’ (карбас) тадм’. Тадтикахад Едэй Ян’ хэбти’ тара. Харпас ӈанор янамбовна су’’лорт, тадтикахад тюку яхад манзадади’. Харт хамэдамбирава, тэтахана недватва’ нензелта яӈгу, харада ӈока. Едэй Яхана лакамбой’ товы луца’’ таняванӈгабя’’. Пыдар сит падаркато’ падая’’.

Вылка Ханец пон’ несись. Маӈгбаванда нид хибяхарт не нюмда пыда мята терӈэ ми’’ман’ нидась харва’’.

Пыди’ сидяӈэ нара’ ямбан’ Итя ӈабтеня яв’ вархана ӈэда таӈоця’ хэвхана илеӈаха’. Ханец няко’’мана хане. Хадабада някота хоб тырабта’’махаданда туни’ муӈго’’мана мирдапида.

Ӈобӈгуна таӈоцяӈганди’ ӈоб’’ ненэць’ тэвы’’. Тикы ненэць’ ейта си’’иня туда ялкадарта мядм’ манэ’’ӈада, таняку’ хая, хонарко пэй’’:

- Ханец, ханзер’’ тюкон’ тэвсяди’?

- Тэтани’ сидни’ хае’’махад ӈаха’’на тюкон’ тэвынинзь. Теда’ мани’ Едэй Ян’ хэван’ харвани’. Хохоро’’ма Лабтандер ӈанодами тась. Таня’ хэсь ӈопой мани’ нянани’ ня тара, - Ханец ма.

Ханец’ тикы лаханако нятада няда Хыльтё Вылка ӈэвы. Пыда ӈобтарем’ тэтахана недватвы. Лахарёнда поӈгана Хыльтё ма: - Тедахава’ ханзер’’ илевава’’ нива’’ хамэдамбю’’. Мяканана’’ няхарма’’: неми, хасава нюми, мань.

Ханец мядонда няханда масьнё’’: - Мяд’ няку’ тю’’ма.

Хыльтё Вылка’ мят’ тю. Мякана сэвсяда пухуця няко’’ ӈамзи’’ едм’ пирембавы.

Мядонда хасава ӈани’ вахалй’’: - Маня’’ ӈобкана илеба’’на’’ савараханё’’? Сидяӈэ харпасамд су’’лоро’’махадани’ Едэй Ян’ ӈобкана пяива’’.

Хыльтё маханяку’ харцёлахая ӈани’ вахалй’’: - Ханяна сава, мал’ ӈобтикы.

Ханец тарця вади намдахава маи’’, ма: - Нена’’ саванё’’! мя’’ал ханяна ӈа?

Мя’’ми ӈаха’’на ни ӈа’’. Хахаяда пэдара’ пиняӈы хэвхана палы. Хуняна нянди’ ӈэсодадм’. Маня’’ тет вэнекова’’. – Вэнеко Едэй Яхана саць тараӈгу, - Ханец ӈани’ тарем’ ма…