Маня’’ тэта’’ яхана илева’’, ты’’ ненэця’ ил. Невхы похот’ иринана, хадунана явнана тэкоцидо’ пэрць мисерӈаць. Тыбэрма сер’ тюку яля’’ ӈэсонд’ тэвы’’. Теда округханана юр’’ сиднтет ю’’ ёнаркад вата тэва’’.

Тыбэртя’’ хибярина хусувэй выӈгана таня. Пыдо’ хусувэй по’ ӈэрёйӈэ’ хэсь тыдо’ хабарпавась пясьты. Забой манзая’’ няхар’’ ирий ямбан яндаха’’на минзьты. Тюку по’ ӈод тарем нисяв’ ӈа’’. Тюку ялян’ таслась забой’ манзая’’ тамна миӈа’’. Сямянд’ пуданаӈэ’ ты’’ хабарпава манзаидо’ СПК «Индига» ёльцембидо. Ӈамгэсь таняна манзарана’’ по’ забой’ манзаидо’ пон’ миӈа’’. Нюртей тэтнава’’ яля’’ мальӈгана ервадо’ манзаяхаданда’ хаясь. Теда «Индига» СПК ервота’ манзаям’ Александра Выучейская минреда, пыда ӈэсынандо’ ты’’ хабарпава манзаи’’ теда таслаби. Тикахад’ нумда нись’ серос’’. Тюку ирийна маттамдэй ялян’ Индигахана ёнар’’ няхар’’ юр’’ тым’ маля хабармыць, тамна сидя ӈэсы’ тер’’ тыдо’ забойкан’ маля тэвраць. Тюку яля’’ пиркана’’на’’ манзаидо’ ёльцеӈгудо’. Тикахана округхана тюку по’ ты’’ хабарпава’’ манзая’’ ёльцевы’’ ӈэӈгу’’.

Мэта’ ирийна еркы ялян’ округханана ӈокханда няхар’’ ю’’ самляӈг мян’ ёнар’’ тым’ хабарӈаць. Ӈокханда няхар’’ ю’’ си’’ив ёнар’’ тым’ забойкан’ тэвраць, тикы небой поход’ тянёрка. Хусувэй яхад’ ӈокаюв’ ты’’ӈамзам’ Няръяна март’ тэврабидо’, ӈамза’ комбинатан’ мипидо’. Ханяӈы’’ яхад’ март’ ӈамзидо’ тиртя ӈанохона тэврэйдось, ханяӈы’’ ӈани’ сырэй сехэрэвна.

Округна хусувэй СПК, ханяна забой’ манзая’’ миӈаць, тыто’ ӈамза’’ таславы’’, тикахад’ есям’ хомби’’. Тикахад’ня илевадо’ переӈгу’’. Маня’’ӈод таӈга’ илегува’’, ты’’ӈамзава’’ лавкахана танеӈгу’’.