Харта’ ямда’ мэневы, харта’ илевамда’ нерня тидхалембавы ненэця’ Тыко Вылка ӈэвысь. Илевамда Едэй яхана мэ’’ӈадась. Тикы’ хасава’ Едэй яна президентӈэ’ нюмдебидось. Хусувэй сертабада манзаямда теневанась. Несяда, небяда илеванди’ ямбан хойхана илеӈахась, таняна хасава нюкцяди’ соявысь.
Ёнар’’ сиднтет юр’’ синдтет ю’’ маттамдэй похона Илья Константинович Вылка соявы. Нисяда Ханецм’ нюбе’’мы. Илья Константиновичм’ ненэй вадавна Тыкоӈэ’ нюмдебавэдо’. Пыда сояванда мальӈгана нида Едэй Яхана илевы’’. Тикы я’ луца’’ вадавна нюмда «Новая Земля».
Тыко Вылка нюдя ӈэдаханда нисяхананда хане ядэлавы’’, тиканда ӈока ӈамгэм’ серта пир’’мы, ӈока ӈамгэм’ манэцетвы.
Ӈобӈгуна календарьхана ӈэда мэкад падтавым’ манэць ӈули’’ пысавы’’. Тикы падтавы ядэрмита сер’, сырмита сер’ я’ ниня манэ’’мыта то’’лаха ӈэвысь. Тиканда пыда ӈод’’ тарцям’ падта идевы’’. Падтаӈго мэтаданда, паднабця’ е’’эйӈэ ята’’мам’ мэ’’мы. Яля’ падаркана манэ’’мэмда лата’ ни’ ята’’махана падтавэда. Тикы’ пуд ӈоб’ падтаӈго пэвы’’.
Ӈаркамбойӈэ хэ’’мяхаданда нисянда е’’эйӈэ ям’ манэсарта луци ядэланаӈэ таралъяць. Харта Едэй Ямда саць сававна теневадась. Тикы манзаянда поӈгана ӈоб’ падтаӈгосеты. Ханяӈы падтавыда сава луца няха’’та мядонзэйӈэ мипвыда. Сямянхат сава юрёда В. А. Русанов ӈэвы. Тикы нянда ня’ Едэй Ямди’ хусувэй я’ ваӈгсавэй’, яхасавэй’, тосавэй’ я’ падарт’ сертавыди’.
И. К. Вылка тарем’ ядэрманда сер’ манэ’’мыда сёӈэ сертаба пявыда. Сямянхат сава сёда Русанов юрёмда нямна ӈа: «Русанов – луца сава юрё. Мани’ сидяӈэ сава нятнани’. Манямбоховани’ ӈопой сейми’, ӈэварими’ сидя.»
Тиканда малхана Тыко Вылка хусувэй манэ’’мэмда падыба пявы. Пыда падвыта нюбедо’ тарця’’: «Вылка Хынец», «Сиӈгэ», «Русанов’ нямна ваде’’мы’’», «Сё’’».
Илья Константинович Вылка иланда ӈамгэ пелям’ невхы, парэӈода’ мальӈгы илаӈгана мэ’’мэда.
Советской ила’ ӈадиво’’махад Тыко Вылкам’ Едэй Яхана Совет’’ ервӈэ ӈабтавэдо’. Великой Отечественной сайнорма’ мальӈгана Едэй Ямда ерамба ӈобтарем’ саць таравы.
Илеванда ямбан’ Тыко Вылка’ сава сер’’, советской илаӈгана тарана ӈарка сер’’ сертавэда саць ӈока. Едэй Яхананда больница, школа ,колхоз сертаба саць тяхасовна манзаравы. Тарць’’ ямбахана падтаӈгова, паднава серода ӈобтарем’ нивыда юрыбю’’. Пыда падтавыда Москва’, Ленинград’, Архангельск’ маркы’ музейха’’на таня’’, таняна падтавы’’ манзаида лэтбидо’. Пыда сита’’ теневана’’ хибярида’ янда’’хана илець. Маня’’ нява ӈод’ хусувэй хибярин’ сававна лаханана, сававна сырта ӈэвысь.
Илья Константинович илеванда ямбан сава ӈамгэм’ сертавэда ӈокась. Едэй яхад’ то’’омахаданда Архангельск’ маркана илесь. Таняна си’’ив ю’’ тет понанда ёнар’’ хасуюёнар’’ мат’’юдимдей похона яӈгумась. Архангельск’ маркана сюры. Пыда’ няданда перена’’ хибяри’’ теда Няръяна маркана, округханана иле’’.
Тюку по’ мэта ирийна сидя ю’’ си’’ивумдей яляхана округханана Илья Константинович Вылка юр’’ няхар’’ ю’’ пом’ ядабтаӈгува’’.
