Ӈэрм’ яхана ханярина ӈэя ӈока сава вадам’ намдувнда хибярина’’ иле’’. Хибяри’’, хуний харто’ яханандо’ иле’’, харто’ яханандо’ илевандо’ ямбан манзара’’. Тарця хибяри’’ хуркари тенз’мэта поӈгана тянё вуни’’ӈа’’. Нянэй ненэця’’ поӈгана ӈод тарця хибярина ӈока’’.
Нянэй ненэця’’ ӈокаюв’ пелядо’ Ямал’ няна иле’’, вымна мюсерӈа’’, хардахана хуркари луца’’ манзаяха’’на манзара’’. Мань’ хэвхы округхана юд’ мян по’’ ямбан илемась, такы яхана таӈок по’’ ямбан радио’ манзаям’ пэрӈамась. Таӈок по’’ямбан торомдавы нин’’ таняна маля ӈока’’. Ӈопой сава тенева няв’ тюку ирий’ юдимдей толыркана си’’ив ю’’ помда ядтась. Тикы не Галина Одмовна Коренева. Харта тензда Тохоли. Паӈгуда тэхэт’ перена ненэцяӈгат’ миӈа’’. Нися’ хасада Приуральской районхана мюсерта ненэць’ ӈэвысь, небяда маня’’ округханана соявы, хаюпа’ хэванда ӈэсонд’ Вайгач’ няна илевысь. Тедая’ хэтась, пыда’ перенида’’ таняна иле’’.
Галина хой’ тер ненэцие’ не ню. Нюдякоданда нисяси’ хаёвы, тикы’ пуд иринда, хаданда хэвхана вадюданвысь. Ирида, хадада маля ӈармбэйха’ ӈэвэхэсь, тыди’ яӈгумзь, харти мядикоцянди’ Лаборавы ӈэсыкоцяхад’ нись ӈана’’ то’ вархана илевыць. Илевадо’ саць’ тоена мимысь, тикым’ мань’ ӈока Галина Одмовнахад’ намдурӈавась. Масьты: - Ӈацекэм’ ӈэбнан’ ӈока маям’ манэ’’ӈамась. То’ вархана илеваць, халям’ ня’’амбасьтыва’’. Нянь’ ханзуйӈэ’ сяторэй ӈаворцетыва’’. Ӈани’’ ӈаврава’’ яӈгусь. Тарем’ школан’ хэван ӈэсонд’ хадани’, ирини’ хэвхана мэмась.
Си’’ив потаӈэ’ хэсь Галина тохолкось’ пядась. Нюрте Лаборавына тоходанась, тикахад’ майендорць вадюданвы не ӈацекы саць хануйко ӈэвысь. Тивакада вэваць, тикы’ нид Саля’хардан санаторной школан’ еримысь. Таняна тоходанванда мальӈгана ӈока сава хибярим’ ядтавысь. Сава тохолкода’’, сава воспитатель’’ хэвхананда пилибт’ нядаӈговыць. Ӈодьбянда школанда пуд Галина тохолкода манзаян’ тоходанвась педучилищен’ еримысь. Хануй ӈэбнанда ӈод тоходанва серм’ ёльце харвабтадась, хусувэй несэй ӈамгэн’ харвась тоходанась. Педучилище’пуд манзаравась Сёяха ӈэсын’ еримысь. Тикы ӈэсыхына хойхана мюсерта ненэця’ ӈацекы’’ тохолабись. Манзаямда ёльце харвабтадась, теневадась. Самляӈг яӈганя по’’ямбан ӈока’’ ӈацекым’ паднась, толанзёсь, толаӈгось тохолавы. Теда тикы ӈацекы’’ маля малӈэ’ ӈарка хибяри’’, тохолкодамдо’ тенад’ тенедо’, ханяӈэхэна мяканда турцеты.
Теда Галина Одмовна маля няхар’’ юкад вата по’’ маля Саляхардахана иле. Ӈули’’ нерде таня тобнанда «Няръяна ӈэрм» газетан’ манзаравась еримясь, таняна ненэця вадавна паднась. Округ’’мана ӈэдалерцеты, нянэй ненэця’’ ила нямна паднасеты. Харта ямда, манзаямда, харта вадамда мэта некоця ӈобӈгуна округандо’ радион’ манзаравась еримясь. Ненэця’ вадавна ӈока по’’ ямбан лаханась. Теда ӈод тикы манзаямда харвась минреда. Галина Одмовна ватовна Ямалкана теда наӈгадя дирекция таня, ханяна ӈэрм’ тенз’’ мэта’’ ненэця’’ харто вадавнандо’ радиона, телевиденияхана программы’’ сертаби’’. Нянэй ненэця’’, хаби’’, тасу’ хаби’’, ӈысма’’ сертабада манзаядо’ маля ӈока’’. Теда тарем’ манзаравамдо’ Галина Тохоли таславы сер’.
Манзаямда теневана, мэнена не тюку ирий юдимдей яляхана си’’ив ю’’ помда ядтась. Тикы яляхана нянда сейхад’ ӈэда вадам’ хэтувнда нида’’ турӈаць, ӈарка няхандо’ сава вади’’ мэ’’ӈаць. Галина Одмовна саць нямбара, илм’ мэнена, илан’ маймбада не, хусувэй хибярин’ сава серм’ тэврамбада. Тад’ нерня ӈод илевада саваривна миӈая, сямянд’ тарана – сенз’ ӈэя, пон’ илея, пон’ тамна вадада Ямал радиона соя!
