Вы здесь

Ӈэ’’ли ӈая тар’’

Нянэй ненэцяӈэ’ хуркари’’ лаханакуна’’, сюдбабцяна’’, ярабцяна’’ тянё вуни’’ӈа’’, ӈокаювдо’ тюку ялян’ невхы похот’ тэввы’’. Ӈэрм’ яхана тамна тарця хибярина таня’’, хуний невхы сюдбабц, ярабц ӈарка хибярихит’ падабанзь’ няна’’ тэвравы’’.Тюку яля’ тарем’ ховы’’ «Ӈэ’’ли ӈая тар’’» сюдбабц’ пудана пелям’ толада’’.

Пин’ ӈод’’ тарпаӈгуваць, пихий пихид Сюдбя ирини’ тёрм’ намдорӈадм’. Тикаринда ӈод’’ мят’ мялкада, сяканда манэць ирикэни сяд’ вэясяда яда яӈгу, паныта наӈэдядо’ яӈгу. Манзь ханада:

- Нюкцяев мэдами’ тавы, мань’’ян ӈэдарабтаӈахаюн, ёхо пэдэйв’’. Тэваванзь ӈод’’ мэӈахаюнась, ханяд ӈэбта ӈод’’ есь’’ хадиӈота Минлей ту’’ нив’, тиканда ӈод’’ ӈамгэ сяндахаюда ӈэвэхэ’, ӈопой еӈгам’ танахалць ни тамбю’’. Си’’ми ӈоб’’ хаде’’ӈа. Илевани ямбан’ ӈабцата тарцям’ нивэдм’ манэцету’’, хадри’ ӈод’’ тад’ нерня’ ненэця’ ню ӈаворць нинакы серос’’.

Ирини вади тэри намдын, пирин’ пяв. Няхар’’ ӈая тар’’, Сюдбя’ си’’ив ню яво’’ няю’ ханеванзь пявэдо’. Сюдби’’ ӈанон’ тадди ӈамдына’’.

Сянд’ миндакэва’’ ӈани’ нердана’’ ет’ парисе’’э ӈо нина’’ яралэй’’. Ян’ нулта’’махадана’’ Сюдбя’ ӈарка ню мамбата масьнё’’:

-Сеней минна’’ хонё’’ мява’’ яӈгу’’ нив’, теда’ хонайтебана’’ сава ӈэдараха.

Нябид нямдо’ тэри няндадо’:

- Тарем’ мамбат ӈамгэда вэвади.

Таддикахад ю’’ Сюдбями тюдо’ нароӈоць манзелабтадо’. Маньехэван нема вуни харва’’. Я’ тир’ нимня ӈодикоцимана вадрырӈадм’. Ю’’ Сюдбяхавани ӈарӈоли’’ сябарӈа’’.
Тарем’ ядэртахани ӈахакуна хэвэдм’, ниркавэдм’ тоса’’, махани’ няд ӈамгэени ӈэса’’, си’’ми ня’’ам’’ ни’’им’. Тюкуехэбини хуна манэцяда’’ юр’’ солдат’’ тунири’’ сарку’’, манзь хананадо’:

-Нинякыд ханяна мэ’’?

Нись ӈод’’ ман’’ вэва ӈэ’’нив, ет’ ӈо’’ табэдэйн. Сыртакохони нининди есяева ин’’ та’ манонъядо’. Тикахавахад еся ӈано’ мю’ пилибт’’ тюлейдо’. Мань си’’иев ӈани’ тюле’’ ни’’им’. Хамэдамбаба’’ни сидя’ я’ помана миндарахава’’нё’’. Пон’ нива’’ мий’’. Хадри’’ ӈод’’ миндяд яхана’’ тэванакына’’, ӈано’’ява’’ нултаванонда. Няхабини юно’ хано’’ мю тэри моё’’ядо’. Маньехэван си’’ми сидя солдат параӈода мят’ си’’ми тюлеӈаха’. Параӈода’’я няръяна толь’, толь’ тяхарина пыда ӈамдёвы. Толь’ хэварин’ ханяв’’ ӈамд’’. Няби сер’ мюд Сюдбя’’ не ню’ неяни тавы падарми параӈода’ пыя’ ӈыл’ та’ мованё’’. Параӈода’’я толабадаханда сидя хайлада мунзи’’ хамыд’’. Манзь ханаӈада’’:

- Тарця нями танясь. Еванзадаков, Яв’ тэта’ ню янд хобацян’ пяӈгоданакэр. Тедахав’ индат харт пирас’’ нирав’’. Такы яхананд, янд вэвакоци харт судебан’’. Няхар’’ ӈая тар’’, Сюдбя’’ си’’ив ню илева’ ямбан’ ӈока сава нямдо’ нямдо’ маяда’’. Тикы няхабид харто’ вэва’’ма, нид нёд сяй’’. Еванзадков вади’’ни валак.

Сидя ябта Ӈаць тыни пэртяӈэ пыди’ таралъяха’. Я’ няю ӈытыхана саля’, саля’ паӈгрин’ та’ илелъяна’’. Тарць’ харахана хуркаси’’ маянзи’’ минзянд яхани’ ханяв’’ тэв’’. Сидя Мандохов товани’ нерцю’ сейти’ лы’’ маля хавэхэ’. Сидя ябта Ӈацяхав тыни пэртяӈэ та’таралъяха’.

Яв’ няю ныхытана саля’, саля’ паӈгарин’ та’ илелъяна’’.

Та’ малда.