Си’’ив ю’’ тет по’’ тяхана ӈэрм яхана вэвко юн’ тэвыць. Хэвняхад’ товы’’ хибяри’’ маня’’ яхана сайнорць товыць. Тарцям нись ламдамбю хусувэй яхана илена’’ хибяри’’ ямдо’ лэтравась тарпыдаць. Хусувэй яхад’ хибярина сайнорманзь ӈэдалэйдаць.

Ӈэрм’ яхана илена’’ ненэця’’ ӈод пуняна ниць хаю’’. Маня’’ округхадана саю’’ по’’ ямбан ӈокханда юд’ мян ёнар’’ хибярива сайнорманзь’ ӈэдалэйдаць. Хуркари яхана сайнорӈаць. Нянэй ненэця’’ ӈод мякнандо’ недо’, нюкцидо’ хаесь харто’ округна хусувэй выӈгад’ ӈэдалэйдаць. Тамальӈгана ӈобкартадо’ нивакы’’ ман’’ пондан’ хэнакэдм’. Хибярина сайнорма’ мер’’ яӈгуман’ енаць. Ханярина сайнорта’’ ненэциена пыдадо’ нись сяй сайнорӈаць, ямдо хэвняхад’ товэхэт’’ сахарамбидось. Ӈокаюв’ ненэця’’ пудана ӈарка сайнормахад’ мякандо’ нидаць’ тэв’’. Ӈэвдо’ сайнормы яханандо’ масьтець, ханяӈына юнси’ юхубэйӈэ’ тенад’ толы’’. Ӈока’’ саю’ по’’ мальӈгана ӈацекы’’ ӈэвы’’ хибярина евакоӈэ вадыць.Тюку по’ ты’’ ниць ирийна хусуюдимдей яляхана Победа 70 пом’ ядабтаӈгува’’. Тарця ялян’ яна’ тер’’ яндаха’’на’’ илебнандо’ ӈод тамбир’’ ӈарка ялян’ ӈахакуд’ хамяку’’. Ханярина тарця ӈарка яля’ ед хуркари’’ сер’’ ваераӈга’’. Няръяна маркана ӈод’ тарця ялян’ хамякова’’ миӈа’’. Сайнормы’’ хибярина нямна вади’’ мэ’’ӈава’’. Округна ерв’’ ӈод сайнормы’’ ненэця’’ ма’’ламби’’, няндо’ ӈарка вадам’ хэтби’’. Тюку ирийна сидя ю’’ нябимдей толыркана «Арктикам» нюбета КДЦ хардахана « Салют Победы» фестиваль народного творчества ваерась.

Тарця фестиваль округна еркы маркана яндахат’ товы’’ коллектив’’ ма’’лась. Товы’’ хибяри’’ ӈокаць. Хибяри’’, хуний пудана ӈарка сайнормам’ тенедо’, хусувэй товы’’ хибяри’’ тад’ нерня ӈод нысёси, сайнорма хурка ӈэвам ехэрась илеван’ харва’’. Теда илена’’, вадюданна’’ ӈацекы’’ сайнорма’ хурка ӈэвам’ сяхарт’ нибнандо манэс’’. Тад’ нерня ӈод’’ тамна ӈока’’ по’’ ямбан’ хуркари’’ тенз’ мэта’’ хибяри’’, хуркари’’ я’ тер’’ ӈэбнандо’ ӈод’’ сававна нясъюмба илебнандо’.

Тюкумэвахана ваеравы фестиваль народного творчества Победа яля’ ед хамандавы. Тарця серкана ӈарка манзаям’ этно-культурный центрхана манзарана’’ нина’’ хамандаць, пыдо’ округна хибяри’’ няюв’ манзараць. Пыдо’ сямянд’ сававна сертавы’’ манзаи’’ тэраць. Валентина Сергеевна Зганич, этно-культурный центрана нерм пэртя, хусувэй коллективан’ сава вади’’ хэтась, благодарность’ падарм’ ми’’ӈась, мядонзэй хибярина ня’’амаць. Сямянд” нерде фестиваль ӈэвы «Хаяр». Манзаям’ масьтевы Вероника Талеева. Маня’’ яхадана ӈока нянэй ненэця’’ сайнорман хаяць… ханяӈыдо’ яхато’ нидаць ту’’, ханяӈыдо’ хаӈгурць товыць, ханяӈыдо’ яхандо’ ӈока’’ по’’ ваерась тэвыдаць. Ӈопой тарця ненэць сайнормахана имда ё’’ць, тет янганя по’’ ямбан ханяримна ӈэдалёрмысь, янда’’хана илевысь. Тикы ненэць’ Саля’ тер хасава ӈэвысь – Николай Васильевич Талеев. Нюдя’ яхана соявы ненэця сайнормась хаясь, мякнанда небада хаювысь. Сайнорма’ пуд небяда нюмда тет яӈганя по’’ ямбан ӈатедась. «Хаяркана» сянакода’’ ӈацекы’’ тарця хасава’ ил’ нямна постановкам’ манэ’’лабтаць, Николай Талеев роль’ Пётр Алексеевич Ледков мэ’’ӈадась.

«Салют Победы» фестивалян’ нина’’ ив’ ер хамякуць. Хусувэдо’ сеян’ мэёвна еримберта программы’’ тэвравыць. Маня’’ нина’’ пэдоваць. «Большеземельские были» постановкам’ Екатерина Тайбарей нита’’ няюв’ манэ’’лабтась, Хорей Верхад’ товы’’ некоця’’ сайнорма по’’ выӈгы илм’ манэ’’лабтаць.