Округна этно-культурный центрхана ӈока манзаидо’ теневана нина’’ манзара’’. Таняна ӈод маля ӈока’’ по’’ ямбан Александр Ледков манзаямда минре. Нянэй ненэця’, манзаям’ теневана, вадамда мэсури’’ нида’’ хавраӈгу’’.
Александр Алексеевич Ледков тикы мел’’ ненэцям’ тарем’ нюмдебидо’. Этно-культурный центран’ дворникӈэ’ товысь манзаравась. Александр вадавна: – Тамальӈгана тобнани’ ӈока сава хибяри’’ тюкона ядтамась. Ненэцие’’ культура’ отдел нерм’пэртяӈэ’ тикахана Анастасия Михайлова тарась, тикахана тамна Анастасия Помылева, Филипп Ардеев манзараӈахась. Маниевась ханзер’’ Филипп Никитич сувенир’’ сертабись, пена’’, хоба’’ пускахат’ сомбой ӈавори’’ сэдбись. Мань’ сырӈамась: ханзер’’ мел’’ нями’ манзара. Янамбовна харн’ тарця манзаи’’ сертабась хорӈавась. Сямянд’ нюртей сертавы манзаин’: ты’ нямдхад’ хабевкоци’’ мадамась. Тарем’ янамбовна ӈоб’ нерня пэрӈавась. Янамбовна сейханан’ сомбой манзаин’ сояӈгаць.
Александр хойхана соявы ни’’ӈа, тарем’ ӈод нянэй ненэцядрев’ манзаравада вэяхананда со’’. Нисяда Алексей Николаевич Ледков ӈудида мэта ненэця ӈэвысь. Мел’’мана хасава ни’’ сертабавысь, ӈани’ хасава манзаи’’ теневавысь. Пыда хасава нюмда пявна маторась тохоладась. Ӈока сянакоци’’ мадабасьтыхы’. Пыдо’ маркана ӈахэт’иле’’. Нисяда лесозаводхана манзаравысь. Нисяхаданда Саша ӈока сава ӈамгэн’ тоховысь. Тедахова по’’ ваерась ненэця ним’ сертась ӈод тенева, валакада нисяда тарця яля’ ӈэсонд ни’’ тэв’’.
Небяда ӈод мел’’ некоця. Пыда’ ӈод нюнда ненэця манзаи сертабава харвабцом’ маниесь, табадабсетыда. Манэ’’лабтабасьтыда: ханзер’’ хасава няда ханакоци’’ сертабавысь.
Александр небяда’ ӈод мел’’ не. Ӈока по’’ ямбан горпромкомбинатхана манзарась, сувенир’’ сертабавысь, бурки’’ сэдбавысь. Нюдяко ӈэванда мальӈгана небямда нядабась таняюв турмысь. Тикым’ со’’ тенеда.
Александр Ледков вадавна: округханана мел’’ хибярина ӈока’’. Маркана Дмитрий Бобриков илесь, пыда нюдякоця ханокоци сертабись.Маркана илена’’ хибяри’’ тарця ханакоци’’ тэри’’ тэмдабасьтыдо’. Мань’ ӈод тарця ханакоци теда сертабасьтым’. Лэвна маторана’’ ненэциена таня, хуний ӈарка манзаи’’ сертаби’’. Маркана ханена Сергей Куликов иле, пыда мадавы скульптурыда иленя то’’олха’’. Рубен Рубцов таня, хуний ӈобтарем’ манзаида сававна ӈадиберӈа. Мел’’ хибярина хэвханана иле’’, манзара’’, поӈгнандо’ Нина Баркулёвам, Анастасия Помылевам, Филипп Ардеев, Маргарита Латышевам нюмдеӈгум.
Тюку ялян’ лаханась: Александр Ледков мэёвна манзарана хибяри, илан’ ив’ер сырта. Пыда ӈудахатата тарпвы’’ манзая’’ ӈока’’ выставкахана мэвы’’. Няръяна маркана маниесьтына, ӈани’ яхана танеда выставкаха’ тэворцеты’’. Александр ханя’’ ӈэдалёрпата мастер-класс’ манэ’’лабтабасьты. Сомбой манзаи’’сертабась ӈани’’ хибяри’’ тохолабсеты. Тамна Александр «Илебц» ненэцие’’ театрхана сянаку, падна. Вадако Ларь ваде’’мы вадако’’ толабасьтына’’. Сертабада манзаяда, мэбета хасава няна’’, ӈули’’ ӈока.
