Округханана ненэцие’’ вадам’ минрена’’ тохолкодина ханярина манзара’’. Ӈокаювдо’ маля ӈахэт’ ӈацекы’’ тохоламби’’, манзаидо’ сававна теневана’’ хибяри’’.

Тохолкода манзаяда тарця’’, ӈацекы’’ тохоламбава’ хавна харта ӈод’ хусувэй самляӈг по’’ ваерась курсхана тоходансеты. Тикахад’ хуркари’’ танеда конференцияха’’на, манзаяхататто’ перена’’ ма’’лёвахана манзарасьты. Те’’ны похо’’на школахана манзаравахана ӈока ӈамгэ’ теневась’ тара, ӈодьбянда хусувэй тохолкодахана тоходанва сер’ тарасеты.

Индигахана ненэця’’ вадам’ пэртяӈэ’ Татьяна Юрьевна Давыдова манзара. Пыда мэёвна манзарана не. Нюмда тохолкодина’’ поӈгана пилибт’ сосьты’’. Тюку ирийхана Татьяна Юрьевна Таймыран’ тэворӈась. Дудинка’ маркана ӈарка конференция’ ваерась, ханяна образование’ серу’’ тасламбиць. Маня’’ округна тохолкода сян’’ яля’’ таняна манзарась. Вадамда мэ’’ӈась. Тикахад’ Дудинка маркана ненэця’’ вадам’ минрена’’ нита’’ няюв’ вадам’ минрева серудо’ тасламбиць. Тарця ӈэдалёрма’’ тохолкодахана тара’’.