«Маймбава» ансамбль’ ӈока’’ хибяри’’ сею’’ маймбтевы. Таняна тарана’’, хыно’’та’’ хибяри’’ малӈэ’ Саля’ тер’’. Харто’ ӈэсынандо’ соявы’’, вадюданвы’’, теда хуркари’’ манзаяха’’на’’ манзара’’.

Ансамблядо’ сян юд’ мян по’’ ямбан манзаямда минреда. Саляхана тарця хибяри яӈговась’ хабе, хуний ансамбляна нись’ мэ’’. Ӈацембой наны’’, пирбтя’’ таравась’ турӈа’’, нянэй ненэцие’’ тарабцо’ манэ’’лабтамби’’. Ӈармбэярка некоця’’ хыно’’ӈа’’. «Маймбавам’» нерня минренаӈэ’ маля пон’ Татьяна Ивановна Канюкова тарась, теда тикы манзаям’ пэртя, нида’’ нерня минрена Майя Ильинична Выучейская. Таняна тарана’’, хыно’’та’’ нина’’ харто’ программыдо’ манэ’’лабтавась ӈока’’ ӈани’’ яха’ ӈэдалёрцеты’’. Ханяна мэвадо’ ни’’ таня’’. Носиндалава ирийхана Норвегиян’ ядэрӈаць, таня ансабльхад’ валакада тетдо’ тэворӈаць. Тянё’’ ӈэбнандо’ ӈод наӈгадя программам’ манэ’’лабтаць. Ненэцие’’ сё’’ мэ’’ӈаць, таранидо’ таняць. Ӈопой вада, пэдоваць.

Няръяна маркана иленаӈэ’ ӈод «Маймбавам’» теневава’’, ӈатесетыва’’. Пуданамэвна округна еркы’ март’ нись’ ӈа’’на ваеравы «Сава сё» конкурсан’ турӈаць. Тикахана ӈацекыдо’ тараць, сё’’ мэ’’ӈаць, невхы хынс’’ мэтидо’ таняць. Ихиня сомбой хынс’ Нина Сафроновна Ноготысая мэ’’ӈась, Саля’ тер Федосья Ивановна Шамсутдинова сёда я’’авлы сомбой, нянэювна хынота не ӈэвы. Тены’’ по’’ сё’’ мэта поӈгана Егор Лаптандер нердесь, тикы хасавако’ ӈобтарем’ ансамблян’ ядэрӈа. Маркана илебнанда’ ӈод Саля’ тер’’ нида’’ пилибт’ нядабасьтыда’’.