Хусувэй по’ нара’ тось Москва маркана ӈэрм’ тенз’’ мэта ненэця’’ ма’’люрцеты’’, тамальӈгана ВВЦ мат’’ ю’’ хасуюдимдей павильонхана хуркари’’ сер’’ танесеты’’. «Кочевье Севера» нюбета фестиваль’ манзарасьты’’, хуний яндат’ товы’’ ненэцие’’ культурам’ манэ’’лабтабасьты’’.

Хуркари’’ тенз’ ненэця’’ ӈобкана ма’’лась, няхато’ тарабцодо’ манэ’’лабтабасьты’’, тикахад’ сёдо’ мэцьты’’. Яндат’ товы’’ мел’’ хибяри’’ хари’’ ӈудаханато’ сертавы манзаидо’ тэврасьты’’. Хусувэй мел’’ хибяри мастер-классм’ нита’’ е’’эмня манэ’’лабтабасьты. Выставка’’ манзарасьты. Тикахад’ ӈэрм’ яхана илена’’ ненэця’’ харто’ илесь мядудо’ тэврабсеты’’: нянэй мя’ танесеты, юрта’’ танесеты. Мят’ товы’’ ненэцие’’, ӈэрм’ тенз’ хибяри’’ ватовна, сяйлабтабсетыдо’, ӈайбадхана ӈавлабсетыдо’, ханюй халяхана.

Тарця яляхана ӈэрм’ ненэця’’ сюртяв’ тол тяха ма’’лась – илевамдо’ таслабсеты, ил’ нерня минрева’’ нямна лахарёдо’ мэцьты.

Тарця ма’’лёвам’ ӈарка ассоциациява хамадабсетыда. Тюку по’ ӈод «Северная цивилизация» яндат’ товы’’ хибяри’’ мэта’’ ирйина пудана яля’’ мальӈгана ма’’лаӈгуда’’. Маня’’ округна хибяри’’ ӈод таня ӈэдалавась хамяку’’.