Валентина Артемьевна Ханзерова тохолкода. Манзараванда ямбан ненэцие’’ вадана нямна ида пилибт’ няркнасьты. Теда маля ӈахэт’ ни’’манзара, тарем’ ӈод паднава манзаямда нерняри пэрӈада.

Пыда падвы манзаямнанда тохолкодина’’ школахана манзара’’, ӈацекына’’ тоходана’’.

Ты’’ ниць ирийна си’’ив яӈганя’ толыркана этно-культурный центр’ мякана сава сер’ нямна ненэця’’ хибяри’’ ма’’люрӈаць. Таняна Валентина Артемьевна падвы едэй словарь’ презентация ваерась. «Ненэцие округхы ё’’ нюво’’ падар» – таремъюв’ нюмдевы словарь- справочник ня’’амаваць. Валентина Артемьевна тарця манзаям’, нянэй ненэцяӈэ’, маля пон’ ӈатеваць. Тарця словарьм’ падбаванда нямна юн’’ ӈакуд’ ядэрӈаць, ӈатенаваць: ся’’ня ӈадимда, ся’’ня ӈудаха’’нана’’ ня’’амгува. Ти’, тарця ялява’ тось. Едэй словарь презентациям’ ваяртаваць. Сямянд’ нерде вадам’ Валентина Артемьевна хэтась, ваде’’ӈадась: ханзер’’ тарця словарьм’ падбась идэяць, хурка сер’’ таняюв’ сита’’ ӈэдтаць. Тохолкоди’’ тохолкода’ тамна ӈопой ӈарка ихиня’ сомбой, манзаяхана тарана манзаям’ пада. Нянда, ӈарка вада’’. Презентациян’ товы’’ хибярина ӈод’ харто’ вадидо’ хэтаць, лаханавы поӈгана Алексей Ардеев – ненэцие’’ серу’’ тасламбада комитет ӈаркатаӈэ’ таранава, Юлия Ледкова – тохолкода, Лукерья Валей – паднана.

Мань’ ӈод таняюв товы’’ нина’’ лаханась ня’’аӈадамзь’. Матрёна Ивановна Талеева – тохолкода: – Валентина Артемьевна мань’ тохолкодав’. Ёльце маймбим’ тарця книга’ ӈадимя. Валентина Артемьевна саць савовна илева’’ ямбан ненэця’’ вадамда минреда. Маня’’ нянанда’ тохолкована мальӈгана сидна’’ ёльце табадабсеты ханзер’’ сомбокоцявна падна тара. Теда мань’ харн’ тохолкодам’, ӈодьбянда тарця едэй книга саць нянан’ манзаяханан’ тараӈгу’’ нив’. Тикы’ хавна тамна округханана илена’’ хибяри’’ тикы книган’ сырпато’, сомбокоцявна ханзер’’ тара’’падбаӈгудо’. Ханяӈэна’’ сырцетыдм’, марад’ помна ядсетым’, рекламный щит’ таня, ханяна пады’’- « Ханавэй ся», ёльце ибкова’’ таминда ӈади’’, сомбова падбаванда е’’эмня глухой тасер’’ тара’’. Ӈодьбянда Валентина Артемьевна лаханабта, масьнётад’: хибя’’ ненэця’’ вадам’ падван’ харва’’, газетана манзарана’’ луца’’ хибяри’’ ӈобтарем’ сырпато’ тара’’ нив’ сомбокоцявна, юнрабнандо’ тара’’ нядна’’- вадам’ теневанахат’: тикы вада ханзер’’ падбая’’. Ханяӈэна газетам’ толабаӈгун’: «Выбор НАО» ӈэя’’, ханяна ненэця’’ вадам’ падван’ харваӈгу’’ӈа’’, тикада ӈань ибкова’’ нись тарем’ падвэдо’ ӈэӈгудо’. Ӈодьбянда теда саць тарана падар’’ма’’ ӈадимя’’. Тарця словарь’ ӈана’’ тарась. Нява’’ сидна’’ ма’’ла, ёльце иняна’ сава, ӈарка вада.

Юлия Александровна Ледкова ӈоб’ ӈахэт’ манзарана тохолкода, пыда мась: – Валентина Артемьевна падвы падар нянан’ саць’ сава. Тикы манзаям’ саць пон’ ӈатеваць. Тарця манзаям’ падбавамда тохолкода’’ мал’’ теневаць, саць ӈатеваць, саць тарана’’ манзая. Луца’’ ӈоб топонимический словарян’ сырпато’ тара’’, маниеӈгудо’: ханзер’’ вадина’’ хэтба тара’’ сававна. Нефтяник’’ манэ’’пато’ тара, пыдо’ яханана манзара’’, ханяна нись тарем’ падбасьтыдо’. Саць тарана манзаям’ Валентина Артемьевна серта.

Телевидениехэна манзарана’’, радиовна лаханана’’ ненэцие’’ вади’’ сававна хэтбабнандо’, паскоювна вадава собнанда.

Ниня тарем’ хэтвы вада’ сейхана нисьты сава ӈа.

Ненся’ ӈод тарця ӈэ’’нив’. Маня’’ ненэцяӈэ’ луца’’ вадавна лаханабна’’, паднабна’’ ибедорцетыва’’: ханзер’’ сававна хэтась, ханзер’’ вада’’ сававна’ падбая. Сядкабтю’’ нибнанда. Луца’’ ӈод’ ненэцие’’ вадам’ хэтван’ харвабнандо’ ханзер’’ тара, тарем’ вадина’’ ваде’’пато’. Округхы ё’’ нюво’’ ӈод ханзер’’ тара’’ таремъюв’ падбабнандо’.