Си’’ив ю’’ самляӈг по’’ тяхана ӈэрм яхана’’ илена’’ хибярина вэвко юн’ намдаць. Хэвняхад’ товы’’ хибяри’’ маня’’ яхана сайнорць товыць. Тарця серм’ намдась, хусувэй яхана илена’’ хибяри’’ ямдо’ лэтравась тарпыдаць. Хусувэй яхад хибярина сайнорманзь ӈэдалэйдаць.
Ӈэрм’ ненэця’’ ӈод пуняна ниць хаю’’. Маня’’ округхадана саю’’ по’’ ямбан ӈокханда юд’ мян ёнар’’ хибярива хаяць. Хуркари яхана сайнорӈаць. Нянэй ненэця’’ тыдо’, недо’, нюкцидо’ хаесь харто’ яхадандо’ ӈэдалэйдаць. Маня’’ ӈарка нина’’ пыдадо’ нись сяй сайнорӈаць, ямдо хэвняхад товэхэт сахарамбидось. Ямдо’ лэтрадось. Ӈокаюв ненэця’’ пудана ӈарка сайнормахана ӈэвдо’ масьтець, ханяӈы нина’’ тенад юнси’ юхубэйӈэ толы’’. Ӈока ӈацекы’’ сайнорма пуд евакоӈэ вадыць.Тюку по’ ты’’ ниць ирийна хусуюдимдей толыркана Победа ялям’ ханярина иленаӈэ’ си’’ив ю’’ нертеймэвна ядтаваць. Маня’’ хибярина «Бессмертный полкхана» сайнормы нито’ нювм’, сидяӈг минресь ядаць. Оленно-транспортный эшелонхана хэвы’’ хибярина тензебтембиваць. Пыдо’ ед ӈэвна’’ хавраваць.
Тарем’ ӈод округна Ӈарка яхад’ сайнорманзь’ хэвы Степан Кузьмич Явтысый. Пуня’ яханда нись’ ту, ӈарка сайнормахана яӈгумы. Теда илена’’ перенида’’ тенад’ ехэра’’ ханяна нядо’ сюры? Матрена Ивановна Талеева небянда няка’ ӈэвысь, сайнормы няндо’ нямна тарця вади’’ хэтась: - Мань небяв’ вадецетыда. Невхэна мал’’ хасави сайнорман’ ханабидось, ненэця’’ мал ӈобкана хаяць. Хусувэй туним’ ня’’амба пирта ненэцие’’ малӈэ ханэйдо. Мань’ небян ӈарка някада танясь, Степан Кузьмич Явтысый, пыда сайнорман хаясь. Маля ӈарка хибярись, неда танесь, нюртей нюкцяди маля соябэясь, не нюкциди. Тикахана хойхад ӈока’’ ненэця’’ ханавыць. Тикахад’ ханя’’ ханэйдо, ханяна хая’’ тенад’ ехэрава’’. Тикахад’ хибярина тамальӈгана падна ехэра, луца вадавна лаханась ехэрабэй. Ӈамгэхэрт’ юн’ падар нямнава’’ яӈгусь, пуня’ тонава яӈгусь. Нява ханяховахана тарем’ юху.
Небян’ някада сайнормахана юнси’ юху. Неда хасавамда пон’’ӈатедась. По’’ ваерась хаюпа хаясь. Хойхана не ханзер’’ илеӈгу? Сайнормахана маня’’ яхадана ӈока хибяри’’ сайнорман’ ядэрӈаць, ханяӈы пуня’ тоць, хибяхова’’ таняна яӈгумась. Хусувэй сайнормахад’ товы хибярива таняна мэвамда илеванда ямбан тенедась. Мань’ сян по’’ тяхана «Ямб’ то» няна манзарамась, хибярина тохолабимась. Афанасий Семенович Тайбарейм’ таняна илесь, пыда сайнормысь. Сайнорман’ ядэрмамда тарем’ ваде’’ӈадась: сайнорма няюв’ ӈокаӈэ хаяваць. Маня’’ ӈамгахэрт нива’ хамадабю’’, луца вадам’ ехэрава’’. Валакада сырцетыва’’, хибя’’ вадам’ хамадабда нина’’ хурка ӈэӈгу’’, маня’’ ӈани тарцява ӈэсьтыва’’. Нина’’ нултыд’, маня’’ нултына’’. Пыдо’ мертёвна я’ни юсебтаӈгуд’, маня’’ ӈань юсебтаӈгуна’’. Тикахад’ сыртава’’, сюрба’ тарагудак, ти’ маня’’ сюрбаӈгува’’. Тарцява ӈэсьтыва’’. Тарем’ маендорць хибярина яӈгумзеты. Мань’ небян няка таремъюв’ яӈгумакы.
Тамна ӈопой хэбидя ялям’ мадава’’. Хусувэй по’ сайнормы’’ ненэця’’, сайнорма’ по’’ мальӈгана манзаравы’’ хибярина тянёмдана’’. Округханана нябимдей по’ хибярина «Бессмертный полкхана» сайнормы нито’ нювм’ падась, сидяӈгадо’ минресь ядаць. Тарем’ сайнормахана яӈгумы’’ хибярина илелътембива’’, тад’ нерня ӈод’ сайнорма – тарця ӈарка’’ мая’’ сяхарт’ яӈгоя’’!
