Алексей Ильич Пичков ненэцие’’ паднана. Илеванда ямбан падвы’’ манзаида маля ӈока, пыда книгида округна толаӈго’ хардахана лэтбидо’, пыда стихда’ ӈацекы’’ толабидо’. Паднанава илевы ӈэбнанда сидя ёнар’’ тетимдей яӈганя по’ март’ ирий няхар’’юдимдей толыркана сиднтет ю’’ пода пангусь.

Сян по’’ тяхана Алексей Ильич яӈгумась. Хэвханана яӈгобнанда ӈод тамбир’’ мэбета паднанам’ хибярина’’ тенедо’. Падвы манзаида тенад’ ӈадиберӈа’’, пыда со’’яма яляхананда ненэця’’ ӈобт’ ма’’лёрцеты’’, Алексей Ильич падвы толабасьты’’. Тарем’ нерня ӈод’ ӈэӈгу. Лата’ сарпям’ хаевы хибяри’’ юрбада’’ вуни’’ӈа’’. А.И.Пичков сиднтет ю’’ пом’ ядабтабвахана «Заполярный районхана» конкурс переводчиков ваерась. Тарця конкурсан’ хибяри’’ манзаидо’ ӈэдарабиць, хуний Алексей Пичков падвы’’ манзаи’’ луца’’ вадахад’ ненэця’’, нысма’’ вадан’ сертавыдось. Тарця конкурс’ округханана ирий’ ямбан миӈась. Ӈока’’ манзая’’ конкурсан’ тоць. «Суюкоця» стихм’ луца’’ вадахад’ ненэця’’ вадан’ мэвахана ю’’ потахад сиднтет’ яӈганя пота’ хибяри’’ поӈгана нюртей местам’ Юлия Лаптандер ханась, Каратайка ӈэсыхы’ школахана тоходанна, нябимдейӈэ’ Светлана Канюкова хаясь, Несьхана тоходанна не ӈацекы; няхарамдэй Индига ӈэсыхына илена не ӈацекы Александра Ледкова.

«Мань выӈган’ е’’эмня» стихм’ ненэця’’ вадан’ падбавы’’ хибяри’’ хасую’яӈганя поход’ ӈаркаркаць. Тарця хибярина поӈгана нюртейӈэ’ Светлана Михайловна Талеева хаясь, тикы не Каратайка ӈэсыхы’ школахана ненэця вада тохолкодаӈэ’ манзара; нябимдей местам’ ханавы ӈоб’ тохолкода Татьяна Юрьевна Давыдова Индигахад’, няхарамдэйӈэ’ Августа Мартыновна Зиновьева хаясь, Краснойхана илена не.

Хусувэй конкурсан’ паднавы’’ хибяри’’ пэдова’’, пыдо’ вадамдо’ тенева, паднана нина’’ манзаи’’ сахарамби’’. Ӈэсыхына ненэця’’ вадам’ пэртя тохолкодина тарця серкана ӈарка манзаям’ сертамби’’. Няндо’ ӈарка вада!

Суюкоця

Хэвдалё’, хэвдалё’, тиртякоця тотрев’

Пыда сыра нимня санарӈов’, санарӈов’.

Нюдякоця – суюкоця

Ӈапориӈа сянакованзь тухуӈов’.

Исьдакоця ӈацекэраха’.

Суюкоця’’ индадкомда’ мадармахад’’

Лэркабт хасерта’’ӈгов’.

Тэкоцяна’’

Хасаварха индадкода танядархов’.

Юлия Лаптандер
Каратайка

Мань выӈган е’’эмня

Мань выӈган е’’эмня

Ӈока яӈгэрмам’ хыноӈаць’’.

Ӈэрм таӈы холмор’’ мерця тотрев ядэрӈа.

Япада и’’ хамба тю’’у тантаби.

Та’ ёльцӈгана

Тальбя пэ’’ ханьхад

Сэракоӈа ханӈа’’.

Яебтаӈгур’ – тецьда ханибтеӈгу.

Пэда хэвнанда ӈум’, сюнраха ӈамдэд’’.

Пыдо’ ныхыдо’ тидсавэй,

Мерцясавэй ӈэрё ӈэсонд тэвӈгу.

Хэхэдё вадёда’’…

Светлана Талеева
Каратайка