Тюку ирийхана Марий Эл республикахана финно-угорский пресса Всероссийский форум манзаравнда. Тарця ӈарка ма’’лёван’ яндат’ товы’’ финно-угорский тензхад перена’’ хари’’ вадавнандо’ паднана’’ хибяри’’ маля маттадамдэймэвна ӈобкана ма’’лаӈгуд.

Хибяри’’, хуний харто’ яханандо’ танеда газетахана, журналкана харто’ вадавнандо’ падна’’.

Всероссийский форум манзаямда саво ирийна хасуюдимдей яӈганя толыркана нэӈгуда, няхар’’ яля’’ ямбан маля сян тарана сер’’ таславы’’ ӈэӈгу’’. «Финно – угорские СМИ Российской Федерации в условиях развития новых информационных технологий. Опыт, проблемы, решения» – таремъюв’ нюмдевы ӈарка ма’’лёвахана ханярид’ товы’’ журналист’’ харто’ манзаито’ нямна лаханаӈгу’’. Тикы поӈгана финно-угорский печатный СМИ конкурс’ ваераӈгу. Сян’’ номинацияхана нерденя паднани’’ нюмдеӈгу’’. Хусувэй мэёвна паднавы журналист’ , конкурсхана нерня тарпвы хибяри еся’ премиям’ ня’’амгу, диплом’. Тикахад’ Всероссийской ассоциация финно-угорских журналистов президентха’, секретарька’ тэрабаӈгу’’. Тюку ялян’ таслась, пудана’’ сян по’’ ямбан тарця ассоциация президентӈэ’ Александр Абдулов тара. Пыда финно-угорский тенз’ ӈобт ма’’ламбада ассоциация’ манзаям’ нерня пэрӈадась. Хибям’ нина’’ пыда е’’эйданда тэраӈгу, харвабнандо’ тикы нямдо’ тамна нерня манзаравась хаеӈгудо. Тикым’ маля тюку ирийна сидя ю’’ нюртей яляхана намдгува’’.

Тарця ӈарка ма’’лёван’ финно-угорский тенз’ мэта ненэцяӈгат’ хусувэй регионхат’ ӈопой хибяри товнда. Маня округхадана тарця форуман’ мань’ хэванзь ятнадм’. «Ялумд» страницава финно-угорский тенз’ мэта няха’’на манэ’’лабтаӈгув’, конкурсан’ ӈод манзаин’ хаяць.

Йошкар- Ола маркана конференция’ няхар’’ яля’’ ямбан манзараӈгу. Сидя ю’’ нюртей яляхана Марий Эл республикахана илена’’ хибяри’’ ӈарка хэбидя ялямдо’ мэта. Таняхад’ тэвравы юн’’ маня’’ округна газетаханана таняхад’ то’’омадан’ падгун’.