Ты’’ ниць ирийна няхар’’юдимдей яляхана округна туристический центр’ няна хуркари’’ тенз’ мэта ненэцие’’ фестиваль’ ваерась. Тарця ма’’лёвам’ хибярина’’ е’’эмня тюкумэвахана ӈани’’ этно-культурный центрхана манзарана’’ нина’’ хамандаць.

Сё’’ мэта’’, землячество’’ манзаи’’ пэртя’’, ӈацекы’’ коллектив’’ тикы яляхана ӈобкана ма’’лась харто’ манзаидо’ манэ’’лабтабиць. Вэба ирийхад’ тюку яля’ ӈэсонд’ сертавы’’ манзаидо’ маля ӈока’’. Хибярина харто’ программыдо’ манэ’’лабтаваць яндамна’’ ӈэдалёрӈаць, маркана тенеда’’ хуркари’’ мероприятияха’’на’’ сиддо’ маниесьтыва’’. Хусувэй по’ культура манзаям’ пэртя нина’’ таӈы ириян’ тэвась по’ ямбан сертавы’’ манзаидо’ таслабсеты’’. «Живи, традиция!» таремъюв’ нюмдевы ӈарка ялядо’ тюку по’ ёльце сававна ваерась. Мирдатна’’ хибяри’’ тэвравы’’ ӈаворидо’ мирдапиць; мел’’ ненэця’’ харто’ ӈудаханато’ сертавы манзаидо’ манэ’’лабтабиць, тикахад’ хусувэй ӈамгэковам’ сертаван’ харванан’ мастер-классм’ манэ’’лабтамбиць. Тоходаван’ харвани’ тохолабиць. Маркана сидя юкад’ вата землячество’’,таняна мэна хибяри’’ ӈод по’ ямбан манзара’’мидо’ ваде’’ӈаць, харто’ ӈаврадо’ мирдапиць, харвани’ –сяйлабтабиць. Хусувэй харванар’ ты ӈамзахад пиревы – евэйм няхар ю’’ есявна тэмдабись. Сян мя’’ таняна нуць. Ӈопой мякана нянэй ненэця’’ несэй масьтевы спектакль’ манэ’’манзь ма’’люрӈаць. «Няхар’’ пирибтя» спектакль «Илебц» театрхана сянакода’’ нина’’ масьтець. Тикы несэй сертавы манзаядо’, ӈарка яля мальӈгана презентацияда ӈась. Маня’’ нина’’ харвась’, сейхад’ сянакуць. Небяӈэ’ таравы Валентина Чупрова, наныӈэ’ сянаковы Иван Кичин, пухуцяӈэ’ Нина Баркулёва тарась, пухуця няхар’’ не нюӈэ’ сянаковы’’ – Валентина Тайбарей, Фаина Ледкова, Татьяна Окотэтто.

Театрхана сянакода нина’’ тарця вади’’ хэтаць: – Нянана’’ тарця манзаява ёльце’ сава. Школамна ядэрцетыва’’, садикмана манзаина манэ’’лабтабасьтына’’, Красной крестан’ ядэрцетыва’’ пенсияна’ мэнаха’ тэворцетыва’’. Ханяна ненэця’’ вадавна вадакуна’’ ваде’’цетына’’. Луцарка хибяри’’ ӈокарка ӈэбнандо’ луца’’ вадавна лаханасьтыва’’.

Татьяна Окотэтта округханана маля ӈахэт’ иле. Тюку поход’ театрхана сянаку. Сита хонрамась: – Пыдар’ Ямал’ теран’, таняна илена’’ ненэця’’ вададо’ хаци’’ яӈга, тюкона вадава ӈани’ сер’ со’’. Нянанд’ хурка’’, тоена’’ ни’’?

– Нянани’ ни’’ тоенаӈэ’. Поӈгнана лаханакуртава’’ ӈани’’ ӈоб’ тикы, нина’’ сававна хамадабина’’. Нянэй ненэцяӈэ’ ханярина илебна’’ ӈод, хуркари’’ яхана мюсерпана’’ ӈод ӈопой паӈгхад’ перева’’. Мал’’ нянэй ненэцяма’’ ӈэ’’ нивам’, мал’’ӈопой паӈгва нив’ ӈа’’. Вадава ӈоб ӈопой, нина’’ сававна хамадабина’’. Ӈоб’ нерня тарем’ манзараӈгува’’.

Теда театрана манзаям’ тю’’у пэртяӈэ’ Надежда Талеева манзара. Сян’ ирий тяхана тарця манзаян’ тобнанда няни’ мась: тарця манзаям’ пэрць пяв, сейми пина’’, теда нянанда хуркарха? Торума? Надежда Николаевна мась:- Хуркам’ ӈэдакэдм’? Торумдакэдм’, маля юкуд’ вата самляӈг по’’ тюкохона сянаку’’ нидум’, театрана сянакова теневадма’’. Теда театрана манзаям’ нерня пэртяӈэ’ тарадм’, нин’ ня манзарадм’. Ӈань’ сава, нини’’ сава’’ ӈэ’’ ним’. Мал’’ нянэй вадавна тенева’’, вадамдо’, иле ямдо’ мэнена’’ хибяри’’.

Та’ мальӈгана манзараӈгува’’. Маркана ӈацекы’’ ныланава’’ площадка’’ манзараӈгу’’, таняд’ ӈацекы’’ няна’’ турта’’. Детский площадкахана манзаина манэ’’лабтабаӈгува’’. Та’ ямбан тарем’ манзараӈгува’’.