Хуркари’’ тенз’ мэта ненэцие’’ лаханако’’ ма’’лабда’’ ханярина таня’’. Тарця хибяри’’ хэвхы округханана ӈод’ иле’’. Анна Янгасова хойхана соявы, вадювы не. Тенеда: ханзер ненэця’’ мякнандо’ манзаито’ пуд ныланавандо’ сер вадакохо’’ инзелесьты. Пыда’ падвы лаханаком’ толара’’.

Няхар’’ нянэй не ядавы’’. Ядавандо’ сер’ ӈарка ненэй не’ те’’мяцянда екара. Те’’мяцанда посова салик’ ет’ е’’ӈалё сярыбида. Те’’мецянда сяра’’махаданда салика’’яда сидя ян’ яӈгара. Салик’ мюд парнэко не’’я ӈадимя. Парнэко не’’я ма’’нив’: – Нябаков’’, ӈобкана ядахава’’. Ненэй нер маси’’:- Нёхова’’. Парнэко нянда сят’ санэй’’. Нянда сядм’ тид’’, няр’’ хаде’’ӈада. Ӈарка не манзь ханада:-Тяханд ӈод’’ ядахава’’. Ӈани’ ялъяд’’. Сянанд хунат ядбато’ ӈод’’ ёнэй ненд те’’мецянда екара. Посова салик’ ет’ е’’ӈалё те’’мецянда ӈани’ сярыбида. Е’’ӈахалманда сер’ посова салика’’яда ӈани’ яӈгара. Салик’ пахаӈгад ӈани’ ӈоб’’ Парнэко не’’я’ ӈадимя, ма’’нив’: – Небяков’’, ӈобкана ядахава’’. Няби нер маси’’: -Нёхова’’. Ёнэй ненэй не ненда сядм’ парнэкор ӈани’ тид’’, няр’’ хаде’’ӈада. Нер ма’’нив’: – Тяханд ӈод’’ ядахава’’. Сянанд хунат ядбато’ ӈод’’ нюдя не няндо’ те’’мецянда ӈани’ екара. Посова салик’ ет’ е’’ӈалё ӈани’ сярыбида. Салика’’яда сидя ян’ яӈгара. Посова салик’ пахаӈгад Парнэко не’’я ӈадимя. Тикахавахад маси’’: -Нябаков’’, ӈобкана ядахава’’. Нябир ӈани’ ни харва’’. Нюдя ненэй не’ сядм’ ӈани’ хаде’’ӈада. Сеянда хэсь нюдя не манзь ханада: – Ет’ ӈо’’ ядахава’’. Пыдо’ мат’’ӈэ ӈани’ ӈобт’ ялъяд’’. Сянанд хунат’ ядбато’ ӈод’’ нумдо’ пэвсюмя. Ӈарка ненэй нер маси’’: – Нума’’ пэвсюмянё’’. Мятава’’ серта манэкавама’’. Ямдкоци ма’’лярӈа’. Мя’’ӈэ сертэйдо’. Тикандо’ хонэйд’’. Хуняна тад юркавандо’’ нюдя нянэй не нядо’ хавы. Нямдо’ ха’’ма яхананда таня хаедо’. Пыдо’ ӈани’ ялъяд’’. Сянанд хунат ядбато’ ӈод’’ нумдо’ –ӈани’ пэвсюмя. Парнэко’’ не’’ ма’’ниим’: – Ямд мятва’’ сертахава’’.

Мятамдо’ ӈани’ серта’’. Ямд мято’ мю’ ӈани хонэйд’’. Ялянда ӈадимзь ӈани’ юркыд’’. Тад манэ’’мандо’ ӈоб’’ нядо ӈани’ хавы. Ямд мята мюня таня хаедо’. Яляндо’ ямбан’ ӈани’ яда’’. Сянанд хунат ядбато’ ӈод’’ нумдо’ ӈани’ пэвсюмянзь хамэдэй’’. Нерандо’ няна хабей’’ таӈоця’’ ӈадимя’’. Мяк’’ тэвыд’’. Ӈоб’’ мякана тет хаби илевы’’. Тикандо’ сидя ӈарка хаби сидя ӈарка нем’ неданди’ мэӈахаюди’. Ӈарка ненэй не, ӈарка Парнэко не хабихи’ мят’ илелъяха’. Сидя нюдя хабихи’ сидя нюдя Парнэко нехэ’ неданди’ мэӈаха’. Тодо’ мякто’ хая’’. Хабихив’’ ялэ’’ ханесеты’’. Ӈарка Парнэко не тёняӈы ненэй не’ мяд’ няна хая, пыда тарем’ маси’’: – Нябаков’’, едав пись. Мяди’’мярманзь ту’’. Ненэй нер Парнэконда мят’ хэ’’нив’. Парнэко не нюм’ ховы. Нюнда ӈамзаком’ пиревэда. Нюнда ӈэвакоця ед’ мюня тэри мулкадарӈа. Ямб хыдя’ мю’ ӈамзакуда тедыдаю Ӈаворць пэйд’’. Ӈарка ненэй нер ӈамза’ ютекэцям’ мэсьты, нита ехэранан’ идыта понд’ сюрцетыда. Парнэконд няхабида ненэй ӈаворӈа’’, едандо’ терам’ и’’ евэйсавэй ӈамыдо’. Ненэй нер ма’’нив’: – Малейв’’.

Лаханаконда’ малда ни’’ӈа’’.