Хусувэй хибяри илевада небяхаданда миӈа. Хусувэй хибярихина небя сямянд’ сянда, сямянд’ сахарамбада. Небя ил’ тамби, тикахад’ илеванда ямбан со’’ябтавы нюкцямда маниеда, илан’ табадабида. Нюнда илм’ маниесь харта ӈод’ маймбась илевамда мэ’’ӈада.

Мань’ няхар’’ юд’ мян по’’ ямбан паднава серкана манзарадм’. Ӈока округханана илена’’ хибярина нямна сава вади’’ падбасетыдм’, ӈока хибярина илм’ сава вада’’ тяха манэ’’лабтавась. Сава вадам’ ёльцяӈганда намдувнда хибярина яханана тянё вани’’ӈа’’. Тюку яля’ мань’ харн’ небян’ нямна сейхад’ ӈэда вади’’ падван’ харвадм’. Мань’ нибан’ пад’, хибя тамна е’’эмнянда паднаӈгу. Сталина Яковлевна Ардеева мань’ небяв, Хонгурей’ ӈэсыхына иле. Харта сензда Талеева. Небяв’ Нюдя яхана мюсерта ненэця мякана ёнар’’ хасуюёнар’’ няхар’’ ю’’ хасуюдимдей по’ саво ирий’ си’’ивумдей яӈганя толыркана соявысь. Нися’ хасада Яков Иванович Талеев, пыда саць мэбета ненэць’ ӈэвысь. Падарм’ теневанась, Малоземельской Советхана секретарьӈэ’ манзарась, тикахад’ ӈока по’’ ямбан ты’’пэртяӈэ’ тарась. Сайнорма похона хэвняхад’ товы’’ хибярихит’ ява’ лэтбись, сян’ по’’ ямбан ӈарка санормахана сайнорӈась. Хой’ илм’ харвабтана ненэцясь. Харта ямда теневанась, ямда мэненась. Пухуцяда Августа Степановна саю’’ похона яӈгумась. Нюдякоця нюкцяюди’ небяси’ хаёвыхинзь. Мань’ небян’ тамальӈгана няхар’’ подась, хасава нянда нябимдей покцядась. Небяси’ хаювы нюкцида ирив’ харта вадабидась. Нябю’ пухуцяда Александра Егоровна ӈэвысь, пыда ирив’ нядабадаӈэ’ ӈока по’’ ямбан тарась. Небяв’ небяданда’ таравы нем илеванда ямбан сава вадарихина вадецетыда. Мань’ небяв Киров’ нюбета колхозхана вадюданась, таняна нисяда манзарась. Хаюпа хэсь небяв’ «Няръяна ты» колхозан’ илелъяць, нисяв’ Алексей Гермагенович Ардеев илеванда ямбан тикы ӈэсыхына ты’’пэртяӈэ’ манзарась. Манзаямда теневана хибярись, спортхана ныхы’’ӈась. Хусувэй ты’’ яляхана таневы’’ пирдырмахана ӈока нердесьты. Небяв’ нисян’ няюв ёнар’’ хасуюёнар’’ мат ю’’ тетимдей по’ ӈэсонд’ хойхана мюсерӈаханзь. Тикахад’ хоян’ сменный выпас’ тось «Няръяна ты» колхозхана мюсермы’’ не’’ нюсавэй Хонгурей ӈэсын’ илелъядаць. Илевандо’ ямбан хойхана мюсермы’’ не’’, нянэй мякана илевы’’ харад’ илм’ торомдабась пяць. Теда лаханась, небяв масьты: – Тамальӈгана хойхад’ ныхыри’’ сидна’’ хавраць, янамбовна торомаваць харад’ илан’. Тедахова, хардахана илесь торомзь мякана илеван’ маля нинархадм’ харва.» Ненсянда’ ӈод тарця ӈэван’ хабе. Тюку ялян’ маниесь – ты’’пэртина илесь’ хардаӈэ’ балок’’ мэ’’ӈа’’, сыра’ таняна теци. Не’’ хоян’ ни’’ тэвор’’. Хасавари хойхана ты’’ пэрӈа’’.

Хойхад’ ха’’амась небяв’ ӈэсыхына пенсиян’ хэванда ӈэсонд’ манзарась, теда ӈод’ манзаяси’ хасенавам’ ехэра. Пиликов’ ӈамгахэвам’ пэрта. Тенад’ тамна сэдорасьты. Небяна сэдвы пивахана, буркахана маня’’ ядэрӈава’’. Хонгурейхана харта хардада, харданда хэвхана та’ мальӈгана манзаяда тянё нисьты’’ ӈа’’. Луци’’ тотрев яхана вададаба’’ ӈавор’’ пэрцеты. Пыда картошкам’ вадаби, тикахад’ теплицада таня, таняна вадавы огурецда та’ ямбан ӈорцетына.

Тюку ирийна си’’ивяӈганя толыркана небякона си’’ив ю’’ самляӈг пода паны. Со’’яма ялям’ мэ’’ӈаваць, сейхад’ миндя вадина хэтаваць. Тад’ нерня ӈод’ небякова тамна пон’ илея, сенз’ ӈэя, маймбась, сава ихиня хусувэй ялямда ядабтамбая. Маня’’ нерняна ӈод небяна мят’ туртава’’, хусувэй серкана нядабаӈгува’’. Нюта’’ ню’’ ӈод хадандо’ хардан’ тэворць мэнесетыдо’. Теда ӈод, ю’’ нюда’’ малӈэ’ ӈарка хибяриӈэ’, небяндо’ вадан’ инзелесь иле’’, харто’ манзаидо’ пэрӈа’’.