Валакада хойхана мюсерта’’ нина’’ хэбидя ялям’ мэтава’’. Тарця яляхана хамякова маля миӈа’’. Пилю’’ ирийхана хоян’ тиӈгуна’’, ты’’пэртина’’, мядм’ манзаям’ минренина’’ ныланава ялямдо’ мэта’’. Нито’ няюв лаханорта’’, манзара’’мидо’ ваде’’та’’, нерня илевамдо’ таслабгу’’. Поӈгнандо’ сянакода’’, сэдвы’’ манзаидо’ няхато’ манэ’’лабтаӈгу’’.

Татьяна Николаевна Семяшкина теда хойхана мюсерта не, ненэцие агропромышленной компания нюртей ӈэсыхына мяд’ манзам’ пэртяӈэ’ тара. Паӈгуда мюсерта хибярихит’ пере’’. Нисяда Николай Иосифович илеванда ямбан ты’’пэртяӈэ’ манзара. Не нюда ӈод’ хардахана илеван’ ни’’ харва, хоян’ сейда хаӈада. Татьяна школам’ ёльце’’маданда режиссерӈэ’ тоходанась, тикы’ пуд бухгалтер’ манзаям’ курсхана торомдась. Тикы некоцям’ мань’ нара мальӈгана маркана хомбивась. Лаханаваханани’ пыда тарця вади’’ мэ’’ӈась:

– « Мань’ нюртеймэвна тарця ма’’лёван’ томась. Тедахова маня’’ хойхана иленаӈэ’ саваркавна илева’’. Округна ерв’’ ив’ ер някуна сырць пянархадо’, ханяӈы тоенана сер’ тэри’ тарем’ ха’’мурӈа’’. Программа’’ хойхана илена’’ е’’эмня таня, хуний яханана манзара’’. Еся’’ танявана, хойхана тарана ӈаворида тэмдабасьты’’. Нись’ ӈакуна генератор’ таць, сидя по’ тяхана нойдава тамбиць. Нянана’’ тарана брезент’, валакада теда тэвравы брезентадо’ сацьри’ сава ни’’ӈа’’. Парусина ӈэван’ хабе, сане’’ӈга.

Мань’ теда агропромышленный компанияхана нюртей бригадахана манзарадм’. Ханзер илева’’? Сырэй мальӈгана ты’’пэртина’’ балокхана илесеты’’. Не’’ хоян’ нисьты’’ ядэр’’. Ханяна илеӈгун’ нюдяко балокхана? Ӈэсыхына хардами’ яӈгу. Сыра мальӈгана мань’ манзаяв’ яӈгусеты. Нара’ тось хоян’ ӈани’ танасетыв’, нертей сыра ха’’амва ӈэсонд’ таняна манзарасьтыдм’.

Хойхана манзарава нянан’ саць саварха. Нянан’ тюку яхана илесь маймбцо. Хардахана илеван’, ӈэсыхына манзараван’ нинархам’ харва. Недбява ӈаркарка ӈэвы’’ ӈэбнанда тикахана ӈамгэхэрт’ ни’’тара. Теда мань’ ирий’ ямбан манзараӈгум’ няхар’’яӈганя ёнар’’ есям’ недвотам’. Вэсаков’ ӈэсынана серм’ пэртяӈэ’ тара, пыда недбяда теда саваркаӈэ’ хая. Не’ манзаяда ӈобтарем’ тянё вани’’ӈа’’. Пенам’ наць’, сую’ хобаком’ пиделць, мальця е’’эмня тарана хоб’’ хамандась. Маня’ сыра мюсермана мальӈгана мальцям’ мэцьтыва’’. Не’’ тюкохона паным’ ни’’мэс’’. Не мальцяда хасава мальцярха валакада сёбяда сэрако ӈэӈгу, ӈобда, таӈгада паской тохоцяхад’ сэдвы.

Тены илевахана хоян’ ӈацембой хибяри’’ манзаравась’ турӈа’’. Манзараван’ харва’’. Пыдо’ няюв’ пилибт’ лаханасьтыдм’, илан’ ив’ ер сырпато’, ябе’’ нибнандо’. Ябева ӈобкарт’ хибярим’ тамна сава серт’ нидась’ тэвра’’. Тикым хамандабидо’, маля сава.»

Ты’’пэртя’’ ненэциена ӈобкана ма’’алёвамдо’ ӈуда таркахана толава’’ пир’’, пыдо’ пиликов’ тэхэнато’ мэсьты’’. Теда ӈобт’ ты’’ яляхана ма’’лаӈгуд’. Тюку по’ ты’’ ялява округханана неняӈг’’ ирий пудана толыркат’ пилю’’ ирий маттамдэй толыр’’ ӈэсонд’ ваеравнда. Хамякова’’ маля миӈа’’.