Ханяӈы’’ лаханако’’ ямб ӈэсьты. «Писяко’ вомде’’ма» лаханаком’ ӈахакуд’ газетахана падбива’’. Толанзёван’ харванар’ тенева. Тюку яля’ лаханако’ пудана пелямда толада’’.
Писякор хоре’’энда хабидяр’ ни’ танэй’’, тикахад тёры’’ӈа: – Я’ ӈарка’’ тода’’, мэдамда хададм’ ханесэва’’ яхада’’. Нерде ху’’ларка’’, харуэс’’ то’’. Хоре’’э’ сэв’’ тук’’ лабцейд’’. Писякор ма: – Пыдахавар яханабцар вэва, ӈани’ ӈармэрка нид тохарӈая’’.
Тарем’ мэнан сямян я’ сармик’’: пия’’, нохо’’, тёня’’, игней’’, сармик’’, варк’’ – мал’ ма’’лы’’. Писякор ма: – Мань ӈули’’ пэдэйв’’, тедари’ тюкомда яхыбаваханда’’ немани’ сатам’ мэкарцядм’, пуна яхама’’хаданда’’ си’’ми сиденда’’.
Писякор няхатата пирця ӈумсавэй лахаця’ хаерад’ няӈы хэван’ ялян’ сядоць хонэй’’. Писяко пон’ нись мы’’ минаханда хонарэй’’. Нябид писяко хонёдан’ Хоре’’эм’ мал’ ӈамадо’, мэё’’ лэрида хаи’’. Тарем’ тасладо’: – Маня’’ хэ’’мяхадана’’, пыдар пиякоӈэ’, лэнд нюдяӈэ писякомд сидеир, манъин: «Писяков, юркад’’, тудод ханзе’’, ӈавор’’.»
Я’ сармик’’ хоре’’эм’ ӈаво’’-махадандо’ тодо’ е’’ сеян’ тарадо’. Тикы’’ хэхэва пиякор хонёда писякомда янамбовна сидеда маси’’: – Писяков, юркад’’, тудод ханзе’’, мыт ядембаван’ ӈавор’’. Пиякор тикы вадида мэсо’’махаданда минаханда лахацие’’ помна сакада.
Писякор нид сэвата хая вэнэрӈа, ӈэта хундаха’’ пыхыдамда высылпа вэнпида. Ӈамгэ’ ёльцяӈгана сэвада нэ, ӈамды’’, ӈаворманзь санэй’’. Тад сававна манэ’’ӈада, нида хоре’’эм’ мал’ ӈамэдо’, мэё лэрида хаёвы’’. Писякор тэри хаялъй’’. Тикы яхад тамна нерня’ ялъй’’. Тарем’ миндяханда ӈоб’’ неро яхам’ нярахала. Яханда мададм’ пюла. Мадась ям’ хось я’’ма. Яха’ лагахана ӈоб’’ тибей салм’ хо. Тикы салм’ ненавэй ӈэ
Питарӈада. Ладванда сер’ сябтада малӈэ хоӈгара. Тикы сябтм’’ тэри тирцедеда. Мюндя сакада, яха’ ендат’ ӈамды’’. Тарем’ миндяханда неро яхакода ӈавэд’ латама, тарем’ мэнан’ мюй ёсерета яхаӈэ хая. Писяко сёмда хана: – Сябт ӈаво хатарабты, Неро яхам’ ха’’авра Писякор хатарабты. Хамб’’ сер’ хулвара. Тарем’ миндяханда сидита няна пае’’ соты’ ядахана хаӈгорондани ядабта. Писякор иркандо’ тэва писякон’ тёрыӈа’’: – Писяков, я’ няку’ няна’’ нултад, хаӈортар ӈав’’. Писякор хонрэйда: – Хаӈорода’’ ӈамгэ’’? Няби’’ ма’’:- Хаӈорона’’ лысу’’, пыря’’. Писякор ма: – Мань тикы хаӈорода нин ӈамд’’, ирини ӈавар’’ ни’’ӈа’’, сёми нюдя.
Писякор тамна тяха’ хатарабты, тарем’ миндяханда ӈани’ хаӈорондани хо.Ӈани’ ян’ сита хаӈа’’, ӈани’ хонрэйда, няби’’ ма’’: – Маня’’ хаӈорона’’ нёя’’, нёй’’ мыд’’. Писякор манзь лыхыдэй’’: – Тикахав, тикы вадитида’’ хаӈгорода’’ мань ирини ӈавар’’.
Писякор сябт ӈаномда няби я’ хэван’ ихредадаю Сарпя’ мюмня тю’’уй’ тодана ненэцяӈг’’ хая. Тайна, пыда тэвабата ненэцие’’ едадо’ тамна лохомадавэй’’ ӈэвы’’. Писякор ма: – Теда’ мань саць пэдэйв’’, тедари едата пинван немани сатам’ мэгудм’, пуна хаӈорота’’ пиб’’ си’’ими сидеида.
Писяко’ хонарахава ӈармэрка’’ ненэця’’ ӈацекэхэто’ ма’’: – Пыдара’’, писяконда ӈано’’ ит’ на’’волӈара’’. Писяко’ сарпя’ мю’ няхар’’ тэ нибям’ пуду’ тю’’уня’ ядабтё палъяда’’. Тикы яхад хонёда писяком’ паромпари тай’ тырцада ма’’ним’: – Писяков, мер’ тю’’уня’ ӈа’’, тайна ӈанор хая. Писяко тикым’ намда ӈэта ни’ сэвта хая санэй’’, нид сэв пуиба сарпя’ мюмня манараби. Едёй’ сер’ миндяханда нерденя нибя’ пухуна идюда хаи, нябимдей нибяхана пуй вэта хаи, няхаромдэй нибян’ ӈэвада пудонда сихид ӈыдэй’’.
Хаӈорондна’’ хаби’’ ма’’: – Ти, тарем сит мэӈгосава’’, нямэхэна нява’’ хадабабнанд ныхыр ӈаркаси’’.
Та’валакада.
