Ёнар’’ хасуюёнар’’ тет ю’’ нюртей по’ саво ирийхана ханярина илена’’ хибяри’’ вэвко юнм’ ня’’амаць. Германия я’ тер’’ вэвко хибяри’’ сайнормам’ пяць. Тамальӈгана маня’’ яханана хуркари’’ я’ тер ненэця’’ нясьюмба, нидо’ нядаба илець.

Ӈарка ява’’ – Советский Союзм’ нюбе’’ӈась, ханяна самляӈг’ яӈганя республикась. Тарця юн’ тэвась, ханярина илена’’, хуркари’’ тенз’ мэта’’ хибяри’’ харто’ ямдо’ хэвняхад’ тован’ харванахат’ лэтраванзь’ нулъядаць. Хуркари’’ я’ тер’’ хибяри’’ сайнорманзь’ яхататто’ ӈэдалэйдаць. Ӈэрм’ тенз’ ненэця’’ ӈод пуняна ниць’ мэ’’. Маня’’ округхадана хибяри’’ ямдо’ сахарамбась хаяць. Хасую’’ ёнаркад’ вата хибярива сайнорман’ ӈэдалэйдаць. Нянэй ненэця’’ ӈод поӈгнандо’ таняць. Хусувэй выӈгад’ тыбэртя’’ ненэциена хаяць. Луца’’ илм’, луца’’ вадам’ ехэрана’’, ӈани’ ям’ сяӈгарт’ нивы’’ манэ’’мы’’ ненэця’’ харто’ ямдо’ , харто’ тыдо’, харто’ мядудо’, нюкцидо’ лэтрамбава е’’эмня хаяць. Тамальӈгана хибяхартадо’ нивакы’’ ман’’: пондан’ хантаннакэдм’. Енаць, сава юнхана нись’ пон’ яхандо’ пуняюв’ тэвӈгуд.

Ӈэрм’ яхад’ хэвы’’ ненэця’’ тянё ванься’’ ӈа’’. Маня’’ округхадана сян’’ оленно-транспортный эшелонхана’ хибярина хаяць. Ненэця’’ тыдо’ мэць, ханудо’ ханась ӈэдалэйдаць. Хуркари’’ яхана сайнорӈаць. Тына’’ ӈэрм’ яхана сававна нядаӈгуць. Пудана ӈарка сайнорма’ тет по’’ миӈась. Таӈок по’’ ямбан маня’’ яна’ тер ненэця’’ сайнорӈаць, ханяӈыдо’ пуня’ яхандо’ ниць’ ту’’. Ӈокаюв’ ненэця’’ юнси’ юхуць, ханяна сюры’’? Тикым’ перянидо’ тенад’’ ехэра’’. Сайнорма похо’’на евакоӈэ’ хаювы’’ хибяри’’ теда маля ӈармбэй хибяри’’. Хусувэй мякана сайнормахана мэвы’’ нидо’ теневыдо’, тенейдо’.

Тюку по’ ты’’ ниць ирийна хасуюдимдей’ толыркана Победа’ ялям’ си’’ив юдимдеймэвна ядабтабгува’’. Си’’ив ю’’ по’’ ямбан хынёси’’ яханана илева’’. Тарця ӈарка ялям’ ядабтабвахана «Ялумдханана» сайнормы’’ ненэциена нямна паднаӈгува’’. Пыдара’’ ӈод’ сайнормы’ нита’’ нямна няна’’ паднада’’. Сайнормы хибярита’ сидяӈг’’ танябнандо’ ӈоб’ някуна’’ тэврэйда’’. Теда маня’’ илевана’’ е’’эмня ӈарка серм’ сертавы’’ хибяри’ ӈобкартадо’ юрвы’’ ӈэбнанда ни’’ тара’’. Ӈобкана сайнормахана мэвы’’, сайнормахад’ нивы’’ товы’’ ненэциена вадахана, падаркана илебтебна’’ тара.