Хусувэй по’ ёнар’’ хасуюёнар’’ няхар’’ ю’’ нябимдей поход, пилю’’ ирий нюртей яля’’хана’’ Ненэцие’ округна тыбэртя’’ ӈэсыхынандо’ ӈарка ялям’ – ты’ ялям’ мэцьты’’. Хусувэй тыбэрма серу’’ тасламбада ӈэсыхына по’ ямбан манзара’’мидо ваде’’цеты’’, сававна манзавыдо’ нюмдебасьты’’.
 Хоян’ тиртя ӈанохона ӈавар’’, мядонзэй’’ тэврасьты’’. Ӈарка ялям мэ’’мандо мальӈгана хибярина сянаковидо’ танесеты’’, ненэця’ поӈгнандо пирдырцеты’’. Тыбэртя’’, мяд’ манзаям’ минрена’’ поӈгана сямянд’ ныхытидо’ нюмдесеты’’. Хэбидя яляхана ныланава’’ янда’’хана’’  танесеты. Тюку по’ пилю ирий самлязимдей – маттамдэй толыркана «Ямб’ то» семейно-родовой общинахана илена’’ нина’’ мядондидо’ ядтамбиць. Тикы яляхана пыдо’ ты’ ялямдо’ мэ’’мась ма’’лыць. Пыдо’ маркад’ товы’’ тиртя ӈаном’ ядтабидось. Хасава’’, не’’ нюкцито’ няюв’ тиртя ӈано’ хэван’ тоць.
«Ямб то» общинахана харто’ тыдо’ пэртя нина’’ иле’’. Пыдо’ харто илевамдо’ тидхалембидо’, сававна илева е’’эмня ӈокавна манзарась тара. Ӈодьбянда ненэця’’ ӈобкана валакада ты’ ялям’ мэ’’мандо’ мальӈгана ма’’ласьтыд’. Ӈокаӈэ’ таславы ныланава ян’ тосьты’’. Ты’ ялям’ мэцьты’’. Пудана сян’ по’’ ямбан ӈарка ялядо’ мэ’’манзь Федор Нокрето мякана ма’’ласьтыд. Тикы хасава общинандо’ серу тасламбада. Ӈарка яляхана хибяри’’ яля’ ямбан сававна ныланаць. Маркад’ товы мядонда’’ округна ӈэвахана мэнахад’ сейхад’ миндя вади’’ тэвраць. Амдермахад’ ӈэсындо’ нерм’ пэртя Надежда Викторовна Ипполитова тыбэртя’’ хэван’ товысь, пыда ӈод ихиня сомбой вади’’ хойхана мюсерта’’ хибярихи’ хэтась; округна Союз оленеводов председатель’ Владислав Выучейский лаханась, «Ясавэй» нюбета ненэцие’’ общественной организацияхад’ лаханавы Галина Платова, СПК «Харп» нерм пэртя ӈуда ӈылы Игорь Ледков вадам’ мэ’’мась харто’ тыдо’ пэртя’’ ненэцяӈга’ хэтвась товысь. Ервхат’ лаханавы Юрий Булыгин. 
Тикахад’ Амдермахад’ товы’’ хибяри’’ концерт’ манэ’’лабтаць, маня’’ нина’’ ӈока ихиня сомбой сё’’ намдаць. Яля нябидмей пеляхана сянакова ваераць. Ненэця’’ поӈгнандо пирдырӈаць. Сюрберӈаць, тыбкам, тынзям моепиць, хан’ тя санарӈаць, ныхыдо’ хорпиць. Пий’ тось, ӈарка ненэця’’ ӈацембой хибяри’’ тэхэна’’ ӈэдалерӈаць. Тюку по’ тэхэна ӈэдалермахана сямянд ныхытаӈэ’ хасава поӈгана Николай Григорьевич Вылка’ хаясь, не’’ поӈгана неда’ Полина Семеновна Тайборей нюртейӈэ’ тось. Мядонзэйӈэ’ хойхана тарана ӈавори’’- бензоэлектростанциям’, сэдорась мэта машинкам’ нямӈахась. Ӈобкарт’ хибяри’’ мядонзэйси’ нись хаю’’, хусувэдо’ диплом’ ня’’амась. 
«Ямб’ тохона» ӈока ненэця’’ иле’’, ӈацекембой хибяридо’ тянё ни’’ӈа’’. Ӈацекы'’ вадёсь мякнандо’ хаюрӈа’’. Наны’’, пирибця’’ илесь’ нядамдо’хось, тюн’ сертаби’’. Нюкцидо’ сояӈга’’. Ӈоб’ нерня тарем’ сомбоковна ӈэя! 
Марина Тайбарей падвы