Округханана «Ямб’ то» общинахана мюсерта’’ ненэциена харто’ илевамдо’ невхы по’’ тотрев мэ’’ӈадо’. Таняна илена’’ хибярина харто’ тыдо’ пэрць явнандо’ мюсерӈа’’. Харто’ ныхыто’ енась илевамдо’ нерняри’’ минредо’. Не’’, хасава’’ варёмдо’ мэць таӈга иле’’.
Нюдо’ хойхана вадюдана’’, хой’ илм’ нюдякодандо’ мэ’’ӈадо’. Вадё’’вандо’ сер пыдо’ харто’ яханандо’ хаюрӈа’’, тэхэ’’на мэнаӈэ’ тара’’. Хойхана илена’’ наны’’, пирибця’’ нидо’ хось харто’ семьидо’ ӈадиберӈа’’, ненэця’ ватовна тюндо’ мэцьты’’. Ханяӈэхэна’ наны’’ недамдо’ пюрць ӈани’ яхана мюсерта’’ ненэцие’’ мят’ тэворцеты’’, таняхад’ пирибцядамдо’ тэврасьты. Пирибцядамдо’ пюрта хасава’’ ӈод ханяӈэхэна «Ямб’ то» ӈэсонд’ турмадо’ танесеты. Ил’ харта тарця.
Тены’’ похо’’на’’ илевахана хойхана мюсерта’’ нина’’ ӈод мякнандо’ хусувэй ӈамгэдо’ таня. Хардахат’ ниня’’ ӈаха’’на’’ мюсерта’’ ненэця’’ мякнандо’ телевизорто’ таня’’, телефон’’ мэ’’ӈа’’, интернетдо’ таня. Ӈацембой ненэця’ интернет’ тя пирибцядамдо’ хомби’’. Ӈопой тарця сер’ маля таневысь. Ся’’ня «Ямб’ то» хасава Таймыр няд’ пирибцядамда тарем’ ховысь. Хаювы яля’’хана’’
Иван Семенович Тайбарей, Алина Дмитриевна Сигуней Няръяна март’ товэхэсь.
Пыди’ няюв’ лаханакурӈамась, Иван тарця вади’’ хэтась: - Мани’ ЗАГСан’ тонись’, ӈобт’ падвась, падрони’ сертавась. Нями’ Сегуней Алина Дмитриевна, Таймырхад’ ӈа пыда. Сидя по’ тяхана интернатхана нини’’ хонись. Сидя по’ тарем интернет’ тя нини’’ теневынись. Тикахад’ Москвахана нюртей нини’’ ядтэйнись. Пыда харта яхаданда Москван’ тэвыць, мань’ ӈод Воркутахад’ таня ӈэдалэюваць. Тикана ӈобт’ тэвынись. Москвахад’ тюкон’ тонись.
Нисями’ Тайбери Семён Иванович, небями’ Валей Александра Семёновна. Маня’’ «Ямб тоход’» ӈава’’, выӈгана илева’’. Выӈгана илесь’ сава ӈэ’’нив, частниква’’, харна’’ тына’’. Маня’’ сидя мякана илева’’, мякнана няхар’’ ӈацекеваць, мань’ сямянд’ ӈаркам. Ӈаврадава’’ Амдермахад’ хосеясьтыва’’, маня’’ посёлок’ хэвхана илева’’, хахаи’’ ӈоб. Ханяна яда ядарцетыва’’. Сыва’ ӈань поселок Каратайка хахаи, тикан’ ядэрцетыва’’. Воркутан’ тэворцетыва’’.
Мякнана интернет’ мэ’’ӈава’’. Савов’ интернетхова, валакада ныхыда тянёрка. Мерарка мимбнанда таминдя’ сава ӈэӈгусь. Скоростной интернет’ ӈэбнанда саць сава ӈэӈгусь.
Тюку по’ ты’ ялява танясь, 5-6 августа мэ’’ӈаваць. Хибяри’’ ӈока’’ яӈгусь, нумда сарёсь ӈань. Тюку та’ тэхэ’’на сава, ӈоб’ теци та’ ямбан.
Мань’ Каратайкахана тохолкумась, тет классм’ ёльцемась. Тикад’ мэсь, мякана хаидм’. Тамна тоходанван’ харвамась, мякнани’ нядаӈгода тарась, тарем’ хаимась.
Алина Сигуней: - «Ямб’ тон» тэворӈамась маля, хойхана илем’. Ӈавнанда Таймыр’ я’ терам. Нисяв’ Сигуней Дмитрий Лытович , небяв’ Сигуней Галина Пелевна хойхана мюсертаха’. Ханярина илена’’ нянэй ненэця’’ ӈоб’ толас’’, мядудо’ ӈоб’ тарця’’. Мань’ Носковский школам’ ёльцемась, тикахад’ Таймырский колледжхана паднадамзь’, повар-кондитер специальностьми’. Диплом не защитила, тюкон’ ӈэдалась. Тедари’ сэдора ехэрадм’, небями’ масьты’’: харт’ тоходан’ иланд’ сер. Тарем’ ни’’ ӈэӈгу? Мань’ хойхана илевась нидамзь’ ятна’’. Инян’ мадамзь’: колледжми’ ёльцесь хардахана хаюдам’, манзараӈгудм’. Интернетхана ӈамдёсь, нями’ манэ’’ӈадм’. Ти’, теда тюкон’ тодм’. Тедахова илевами’ хойхана нивув’ мэт’’. Мями’ танеӈгу.
Няръяна мар’ сомбой мар’ ӈэвы, хибяридо’ сава’’.
«Ямб’ тохона» тамна ӈопой семья’ ӈадимя. Иван, Алинанда няюв’ ӈобт’ падъяха’. Илевади’ сававна миӈая!
