Хуркари тенз’ ненэця вадан’ А.С. Пушкин падвы стих’’ сертавы’’. Ненэця вадавна ӈод’ падвы’’ таня. Тикы падвыдо’ неняӈг ирийна пудана яляхана ӈадимы «Ялумдханана» толэйдаць.

Тюку яля’ тамна сидя манзаям’ толада. Тикы падвы манзаи Серафима Петровна Дуркина нябю Роза Ивановна Канюкова сертавыдись. Тикы манзаи’’ толэйда’’, хибяхова харвабнанда тохолаӈгуда’’, тикахад’ сяӈгова А.С. Пушкин со’’яма яляхана толаӈгуда.

Тюку стих’ А.П.Кернан’ падвы

К*** А. П. Кернан’

Мань тарцям’ ихинянэй тенем’:

Нерданэй пыдар ӈадимян,

Ханяд лэркабтэй ӈадимянэй,

Пыдар сямяндэй паскоян.

Ӈопори ивэй вэва ӈэсьты.

Сата хурсада мальӈгана,

Лимбика сёрэй понэй сосьты,

Неман сядута тюӈга.

По” миӈаць. Тикы вэва по”я”

Мальӈгана ин пу”лэрэин,

Лимбика сёрэй тикахана

Нум’ тавы сидяӈг юрэин.

Хэвний яхана, пэвдяхана

Ялин янабовна хайнаць.

Пунрёваси”, маймбаси’ ялякони

Хайласи”, илерси” миӈаць.

Ивэй саваӈэ хэсей пябта:

Пыдарэй ӈани” ӈадимян,

Ханяд лэркабтэй ӈадимянэй,

Пыдар сямянэй паскоян.

Сеюв тикахад маймба”нивэй

Мань е”эмняндув няӈгарма

Нумд’ сава иӈу”, пунрёвавэй,

Илебц, хайладув, мэнелва.

Серафима Дуркина падвы,

Лукерья Валей нядаӈговы.

* * *

Ӈэ”лири серка”на тенеба”н

Мал’ сядотахат сядотав,

Хамзна неӈэ соябэйӈэсь,

Лакри” нердан ӈадимян.

Туселтанко” енабцха”нан

Лёдырма’ пуд сёр, вабцар со.

Ӈули” мэнена сят сидяӈгко

Хонёван мальӈгна юдэбцӈэ то.

По” ваеӈга”. Хадӈэ миндя

Ив хасеръй”. Нумгад тобэй

Мэнена вабцамд, сит ӈо”

Мань вадамбой тэри юрын.

Паль” пэвдя сыӈгǎсяда яхана

Ӈарка Нумси’, харвабцоси’,

Хаялци”, мэневаси’, ярси”,

Нись хурцась мань ялун миӈаць.

Ини’ ядсер” сёнзями сиды.

Мал’ сядотахат сядотав,

Хамзна неӈэ соябэйӈэсь

Нув’ подувна нян ха”мын.

Сеюв несэвна ла”нарць пяда.

Ӈарка Нум, едэй ӈо” харвабцо”,

Мэнева, ярма, хаял” тедахава

Нись хурцась малмбой” илелъяд”.

Роза Канюкова

2012 похона падвы