Ты’’ ниць ирий’ 9 толыркана яна’’ сямянд ӈарка хэбидя ялям’ мэ’’ӈаваць.
Яндаха’’на’’ илена’’ хибяри’’ ваеравы юр’’ по’ сямянд’ пилкабтёда сайнорма пирдалёва ялям’, Победа 81-ей пом’ ядабтаць.
Округна’’ хусувэй ӈэсыхына митинг’’ ваераць, яндаха’’на’’ сайнорма’ похо’’на’’ ӈадимы сё’’ соць, стих’’ толабада танець, солдат’ хаскам’ пиревыць…
Хаювы ирий’ 30 толыркана Россиянана’’ илена’’ толыродо’ тянё ненэця’’ хэбидя яля’ ваерась.
Тарця яляхана округна’’ толаӈгова харад’ ӈэрм’ отделхана манзарана нина’’ «Современная антология народов России. Поэзия.» едэй книга’ презентациям’ сертаць.
Зоя Ивакилева ӈэрм’ отдел ервота мась, тюку яля’ маня’’ толыродо’ тянё ненэця’’ хэбидя яляхана ма’’лыва’’. Тарця ялям’ тюку похона нертеймэвна мэ’’ӈава’’. Россияна’’ Президент’ 2025 по’ носиндалава ирий’ тетимдей яляхана ӈадимдевы ватовна тад’ нерня таневнда.
Ненэцие’ яхана’’ ӈарка сайнорма’ пендерма’’ нидаць тэвор’’, тарем’ ӈод’’ пилкабтёда сайнорма’ мун’’ хусувэй ӈэсын’, хусувэй мят’ тэворӈаць.
Ваеравы юр’’ тет юдимдей похо’’на’’ иринана’’, нисянана’’ Победа ялям’ хахаялтамбиць. Оленетранспортной эшелонхана сайнормы’’ ненэця’’ ӈэрм’ ява’’ лэтбавахана ӈарка серм’ сертаць.
Тюку ирий’ 24 яляхана Няръяна маркана семейно-родовой община’’ манзаи’’ пэрта’’ ненэця’’ ӈани’’ ма’’люрӈаць.
Тарця хибяри’’ е’’эмня округна’’ администрация’ внутренней политика департаментхана манзарана’’ «Сохранение и развитие коренных малочисленных народов Севера в НАО» программавна’ таславы тоходанавам’ хамадаць. Округна’’ ӈэсыхыт товы’’ ненэця’’ яля’ ямбан маркана манзараць.
Те’ ёльцяӈгана семейно-родовой общинахана манзарана’’ нина’’ нертей ма’’лыць. Округна’’ ерв’’ таня турӈаць, семинар’ манзаравам нэмбиць.
Ямал’ яхана манзарана’’ паднана’’, хусувэй по’ тюку ирий’ 19 толыркана минрена’’ манзаито’ хэбидя ялям’ мэцеты’’ – луца’ вадавна тарем’ со’’ – День Ямальских СМИ ЯНАО. Тюку по’ «Няръяна Ӈэрм» газетандо’ 95 пом’ ядабтаць.
Ӈахы’ хаювы 1931 похона Саляхард’ маркана « Няръяна Ӈэрм» – «Красный Север» нюбета нертей газетадо’ тарпыць, те’ ёльцянд 95 по’ ваера’’.
Газетадо’ ненэцие’ вадавна нюмдевысь, таняна падвыдо’ сидя вадавна сертабада’’ ӈэвыць, луца’’ вадавна тамна ненэця’ вадавна.
Яханана’’ 1930 похона падарм’ ехэрана хибяри’’ ӈокаць, тарця серм’ ханзерков’ тидхалесь таравысь.
Тамальӈгана яндаха’’на’’ ӈацекы’’, ӈарка хибяри’’ парта’ тя ӈамдурӈарць, миллион’’ учебник’’ таралъядаць.
Тамальӈгана «Учпедгиз РСФСР» учебно-педагогической издательством’ ӈадимдець ( тены’ похо’’на’’ «Просвещение» издательством’ нюбе’’ӈа), таняхад нертей азбука’’, учебник’’, тохолкода’’ манзаяхана тарана’’ методической журнал’’ тарпыдаць.
Тюку ирий’ 15 толыркана Нельмин’ Саляхана илена’’ хибяри’’ поӈгана сямянд’ ӈэрмбэй няндо’ юр’’ пом’ ядабтаць.
Соя’’ма яляхананда сельской хозяйство’ ветеран, саю’ по’’ ямбан тылхана манзаравы няндо’ мят янда’ тер’’, теневана нида’’, перенида’’ турӈаць.
Ӈарка нямдо’ вэдоманзь Малоземельской сельской советхана манзарана’’, ӈэсыхынандо’ ветеран’’ совет’ манзаравам’ тасламбада’’ тэворӈаць. Хусувэдо’ Мария Егоровнан’ ӈока по’’ ямбан ивъер’ манзараванда е’’эмня, сельской хозяйство’ манзаян’ ӈока ныхымда паклевы е’’эмня ихид’ минда вадидо’ хэтаць.
Зинаида Михайловна Чупрова сян’ юд’’ мян по’’ ямбан толаӈгова’ хардахана манзарана.
Тюку яля’ пыда нямнанда вадами’ ӈэӈгу, лаханась ня’’амы нява’’ мале’ самляӈг юд’’ мян по’’ ямбан Усть-Кара ӈэсына толаӈгова’ хардахана манзара. Сяхаӈгова тохолавы’’ манзаяда, иланда серӈэ’ хаясь.
Тюку по’ театр’’ Всемирной яляхана «Илебц» нюбета Народной ненэцие’’ театрана’’ сянакода’’ маркана илена’’ нито’ сею’’ едэй манзаяханандо’ маймбтейдонзь.
Няръяна маркана «Пухуця’ ӈопой хасава ню» спектакльм’ манэ’’лабтаць.
Сававна масибтевы, мэкад манзая, ӈока хибяри’’ сянакова’’, нянэювна ненэцие’ культурам’ манэ’’лабтабада.
Ваеравы си’’ив маттамдэй яляхана Нельмин’ Саляхана «Варӈэ’ ялям» ядабтабиць, ӈэсыхына илена’’ хибяри’’ хэбидя яляхана ныланаць.
Хой’ тер’’ хусувэй по’ тарця ялям’ ӈатесетыдо, ивъер’ хамекосеты. Пий’ сата мерця ваера’’махад, хувэда’ савась. Нумда паской ялякоцяхана, хаярэкон’ маймбась хибяри’’ Долгой нюбета то’ няюв миӈаць. Тюку по’ хэбидя ялядо’ таняна миӈась, тэхэ’’на ӈэдалёрмадо’ ӈод’’ таняна ваерась.
Ӈока хибяри’’ ма’’лась, ӈатенавандо’ сер’’ нидо’ лаханась ня’’ӈаць, мят’ тюӈгаць, мирдатна’’ ӈавори’’ манэ’’сарӈаць, тэмдорӈаць.
Тарем’ округна’’ музейхана «Оленные люди» нюбета
выставка презентация’ нямна мава’’ пир’’.
Ты’’ саполана ирий’ сидя юдимдей толыркана маня’’ яна’’ музейхана Светлана Горбатых сертавы’’ сидяӈг’’ выставкам’ нэць.
Тюку яля’ хамадавы вадини’ Любовь Михайловна Белугина нямна ӈэӈгу’’.
Ӈока по’’ ямбан манзаяхана мэбета, ӈацекыда мэнена, сава ня’’ Красной’ ӈэсыхына иле. Пыда – саць мэбета не, няданда илм’ минревам мэва’’ мян’, падтаӈодаха’, паднанаха’ книга’ падась серо’’ӈа.
Ӈацекэӈэ’’ ябдаваць
Ваеравы си’’ивхана округна’’ ӈэсыхы’’на’’, маркана толаӈгова’ хардахана манзарана’’ хибяри’’ семинар’ Няръяна маркана ваерась.
Сян яля’’ ямбан минрена манзаяха’’нандо’ тарана серу’’ тасламбиць.
Ты’’ саполана ирий’ хасуюдимдей яӈганя яля’ А.И. Пичков нювм’ нюбета толаӈгова хардахана мэвы’’ нина’’ манзаравы пудана ялядо’ хэбидя яля’ тотрев ваерась. Тамальӈгана таняна «БиблиоПрофи–2026» нюбета конкурсадо’ ваерась.
Тюку ирий’ няхарамдэй яӈганя толыркана Нарьяна Маркана ненэцие’ театр «Илебц» едэй манзаямда манэ’’лабтась.
Несэй спектакльм’ манэ’’манзь маркана илена’’ хибяри’’ ДК «Арктика» нюдя’ залкахана ма’’лэйдаць. Тюкумэвахана артистана’’ манзаямдо’ Нина Валейской, теневана падтаӈода няна’’ падвы манзаямна сертадонзь.
Нюдяко залхана ӈока хибяри’’ ма’’лы’’, мал’ ӈатена’’, ненэцие’ округна’’ радио’ мун’ намдась, нина’’ манзаямдо’ пя’’. Спекталян’ товы’’ хибяри’’ лэркабт’ ваеравы юр’’ по’ 50-60 похо’ еримондо’, невхы Няръяна март’.
Мат’’ ю’’ самляӈг по’’ тяхана паднана’’ няхаюна Василий Ледков’, Алексей Пичков’ ӈобнзер’ сертавы манзаяди’ ӈэдимясь.
Книгам’ ӈадимдевы Архангельск маркы’ издательство’, 1961 похона таняхад сидя ёнар’’ книга’’ тарпыдаць.
Тамальӈгы’ похо’’на’’ нюдякоця, паскоювна сертавы книгако’ ӈули’’ мер’ хой’ ӈэсыхы’’мна’’, вы’ ненэця’’ помна тахарась.
Книга’ сякана тюрамда ня’’амбада ӈацьмбой тыбэртя падтавы. Саӈода хэвняковна ваерана, паской паным’ мэта пирибтя’ няюв ӈэдаравы. Сэвкуда таси’ ня ха’’авравы, серота ванебтёсь…
Регистрационный номер СМИ: ЭЛ № ФС77 - 83188 от 26 апреля 2022 года
Зарегистрировано Роскомнадзором
Учредитель: ГБУ НАО "Издательский дом Ненецкого автономного округа"
Главный редактор: Горбонос Юлия Юрьевна
Телефон редакции: 8 (818-53) 4-21-73
Электронная почта: info@idnao.ru
Адрес: 166000, Ненецкий автономный округ,
г. Нарьян-Мар, ул. им. В.И. Ленина, 25а