Маня’’ округханана культура’ похона хуркари’’ ихиня сомбой сер’’ танесеты’’. Культура манзаи’’ пэртя’’ нина’’ тикы е’’эмня ӈокавна манзара’’. Тамна тарця хибярина яханана ӈока’’, хуний хуркари’’ серка’’на мэбе’’ӈа’’.

Я’малкана илена’’ ненэциена ваеравы’’ яля’’хана Саля’хардахана ма’’люрӈаць. Хусувэй маркад’, хусувэй районхад’ товы’’ хибяридо’ тянё ниць’ӈа’’. Тюкумэвахана пыдо’ округандо’ еркы март’ «Ямал потомкам’» нюбета ассоциацияндо’ ӈарка ма’’лёйм’ мэ’’манзь’ тоць.

Тарця ялям’ мэ’’мась ӈани’’ яхад’ товы’’ мядондидо’ таняць, хуний «Ямал потомкам» ассоциацияна манзаранаха’ харто’ хэтувнда вадидо’ тэвраць. Таймыркад’ товы’’ таняць, Ханты-Мансийск’ маркад’, Няръяна маркы ненэця’’ таняць, Тюмень, Тобольск, Санкт-Петербург’, Москва маркад’ хибяри товыць.

Хусувэй по’ носиндалава ирийна пудана яляхана ӈарка ялям’ мэцьтыва’’. Тикы сямянд’ сава яля’ ӈэдараха’’. Небя’ яля – ӈарка яля. Хусувэй хибяри илевада небяхаданда миӈа. Небя нюмда соябтада, вадабида, илан’ табадабида. Небя нюда’’ хусувэй сава серт’ тохолабида.

Округна толаӈго’ хардахана ӈэрм’ ненэцие’’ отделхана манзарана’’ нина’’ ӈарка манзаям’ минре’’. Теда округханана ненэцие’’ культура яля’’ миӈа’’. Таняна манзаранина тарця яля’’хана сертавнда манзаядо’ тянё ни’’ӈа’’, пландо’ ӈули’’ ӈарка.

Сайнорма ӈэва мальӈгана ёнар’’ хасуюёнар’’ тет ю’’ нябимдей по’ носиндалава ирий’ сидя юдимдей яляхана Государственный комитет обороны СССР падарм’ ӈадимдевысь: выӈгад’ армиян’ ю’’ ёнар’’ тым’’, тыбэрти’’, хану’’, вэнеко’’ ханась.

Таймыр’ няна паднана не Любовь Прокопьевна Неняӈг илесь. Пыда падвы манзаида тянё ни’’ӈа’’. Нянэювна стих’’, иле’’ми, вадако’’ падбавысь. Ӈацекы’’ е’’эмня падвы манзаида таня’’. Роза Ивановна Канюкова Любовь Неняӈг’ хэтвы’’ вадако’’ нябимдей классхана тоходанна’’ ӈацекы’’ е’’эмня падвы «Ненэця’ вада» книгананда ма’’лэйдась’’. «Ханзер’’ вэнеко нядамда пюрца» вадаком’ теда толара’’.

Пэдарахана вэнеко илевы. Ӈули’’ ӈопориӈэ илевы. Тарця ил’ тябибцоӈэ хая. Вэнеко нядамда пюрмась иделъй’’.

Те’ ёльцяӈгана хусувэй выӈгана тыбэртя’’ ненэциена тэтнава’’ ялудо’ мэ’’ӈа’’. Ханярина иленаӈэ’, манзаранаӈэ’ забоян’ тэвравнда тыдо’ маля яӈгревы’’. Ханяӈы’’ ӈэсыхына хавадава манзаидо’ маля миӈа’’. Тюку по’ забоян’ тэвравы’’ ты’’ ӈамза’ маля ня’’амвы’’.