Хаби вэсако Неро яхаконда ниня иле. Ӈэрёй халяда нарэй няханда тэвасеты’’, нарэй халяда ӈэрёй няханда тэвасеты’’. Пыдо’ ян’ тетамбодо’ – ийда, не нюда, пухуцяда. Тарем’ няхар’’ по’ иле’’. Ся’’ны’ ӈэбто’ ӈод’’ сыра’ сава ерня, тарця тецьдахана поӈгади’ ватавнзь хаяха’.

Хаби вэсако поӈганда мадерм’ тебде, яля’ ямбан’ поӈганда хам’ хасена ня’’мбида. Ийюм’ сюнкамда хурада, иримда ӈате ӈули’’ ханимя. Нув’ пэвсюмзь ирида ӈэвамда ила, тикарихина вазалъй’’: -Хэ’, ими пон’ ядэрмакы, Нин ханив’’? Мяканди’ хаяха’. Пухуцяда хаскам’ пиревы. Хумда хасканда хыдя’ ниня ня’’амба вэсако пон’ ӈамды, пухуцяда маси’’: – Нена’ пон’ хасенананё’’, ир ядэрӈа? Вэсако ӈаволы’’, ӈаворманда сер’ тарем’ ханада: – Ими ядэлавы’’. Нюхуюни’ ӈэдараван’ харвадм’, сянднакэхэюд? – Харт сел нив’ ӈа’’. –Хуняна ӈаноми манэтадм’, мэсана ӈэбтав’’? Няби яляхана иянда ня’ хаяха’. Ӈанода ӈумӈэ ливармы’’, поё’’маната марэй’ салвы’’. Ийда ихинанда токалӈада. – Ебтов’’, тюкомд нёр токалпю’’, ӈопой мэсана, нябири хуӈгада лабсуй.

Ириюм’ тикы ӈаном’ нюхулемба танетанараха. Мяканди’ тэвъяха’. Нумдо’ нарэйма. Неро яха’ салаба хая. Вэсако нюхуюта ня’ ма: – Салабава хая, ӈанонди’ мю’ тарана ӈавориди’ пэӈади’. Мимбати’ минри’ яля’ ӈыл’ ӈэя. Нибти’ пирас’’ нядэлъяди’. Си’’ив’ ёльцяӈгана ӈанори’ лэ’’нэлаӈгу’’ – няхар’’ ня’’амъир. Сидя’ ня’’амвахананд яседа ямд’ тэваӈгуди’. Няхаромдэй’ ня’’ахананд Неро яхако’ ня’’ван’ ӈанори’ харта нулты’’, тетимдей’ ня’’амвахананд яха’ харан’ нулты’’.

Тадахава вэсако нюхуюда ӈэдарамба пяӈахаюда. Вэсако ӈаном’ ня’’амба пон’ мунзи, пухуцяда ӈани’ ма: – Нюхуюд пон’ ня’’амбихиюдэ, ӈоб’ ӈэдарахаюн’. – Вэно’’ни небякоцям’ хаиреван’ харвав. Пухуця ӈани’ тарем ма: – Тарабта хаиредава. Тадахава нюхуюди’ хаяха’. Иринда вади’ сер’ ийюм’ ӈоб’ пэрӈада. Си’’ив яля’’ миӈаха’. Ӈаво’’ пирка’’на ӈаноди’ я’ нимня хыны’’, ханяхарт’ мэита яӈгу. Неюм’ масьнё’’: – Иринд вато’ сер’ ӈэё – иландани’ табэданада ти ӈэдакы? Яха’ хара’ ся’’ сюртяв ӈыбкуй саля ӈэвы. Не тикы яхад ӈоб’’ ӈув’ ясм’ ныкалӈа. Хасаваюм’ лэркабт’ хонаравы’’. Ненда ныкалмы ӈувэця мя’’ӈэ хая. Мяти’ пеней я’ ерня ӈа. Хасава харта индя сер пин’ хая. Ӈамгэда ӈэса нянда ӈылекараха ӈамгэ яда – тю’’уняюв’ сидя’ поръянада, я’ няюв’ тет’ поръянада. Хаби вэсако’ Ий сеянда хэсь паромбари мят’ тю, нехэнда ваде’’лыда. Неюм’ маси’’: – Тикахабид нянд харванид ни’’им’ ӈа’’- тикыд ты’’. Ты ханахана мэта. Неро яханд ня’’авахана юд’ мян’’ харв’’ танявыць, ӈобкарт момдо’ нись хаё тэваран’’.

Хаби вэсако’ Ий хая, харво маторъяда. Мяканда миманда сер’ харта мята ӈылекауэ пя, сейда ӈули’’ хая: – Тикы ӈылека си’’ми пянакы? Неюм’ мякад ӈадимя, хасавамда хаӈада. Хасава пида нё ядан’ е’’ӈалэйда. Хуняна тад пин’ сылаванди’ – мяти’ няби хэвувна ӈоб’’ ямб мюд халая. – Тадахава ти, тэсавэӈэ хаяни’, ханони’ таня’’. Ирир маси’’: – Тэсавэӈэ хэбти’ ӈопой яхана нёди’ иле’’, мюсярӈади’.

– Ямдахани’.