Тюку по’ ты’’ сие ниць’ ирийна нюртей яляхана округна радио’ мат’’ ю’’ самляӈг пода панысь. Таняна манзаравы’’ хибяри’’ е’’эмня ӈарка яляӈэ’ толы. Тюку яля’, радио’ яля’.

Тамна сян’ юд’ мян’ по’’ тяхана телевизор’ яӈгова мальӈгана хусувэй мякана радио’ танясь. Тикы радио’ хусувэй мякана хув’ мерувна лахана пясьтыда, Таремъюв’ яля’ ямбан мунода сосьты, тикахад’ пи’ еркана лаханавамда ёльцесьтыда. Мань’ тенебнан’ радио муно’’лаӈгу, юркаӈгуна’’. Яля’ ямбан лаханасьты. Хибяри’’ серуто’ поӈгана хуркари’’ передачаха’’ инзелесьты’’. Тамальӈгана хуркари передача’’ ӈока’’ ӈэсьты’’, спектакль’’ танесеты’’, вадакохо’ инзелесьтыва’’; ӈацекы’ харто’ мэнена’’ инзелевидо’ таняць. Пэвсюмбы ӈэсонд’ радио’ манзарасьты, радион’ инзелесь хонарасьтына’’.

Маня’’ округханана радиостудия ёнар’’ хасуюёнар’’ мат’’ ю’’ самлязимдей похона ӈадимясь. Сямянд’ нюртей передача’ тикы по’ ты’’ ниць ирий нюртей яляхана тарпыць. Тикы яля’ – округна радио’ со’’яма яляӈэ’ толы’’. Тюку по’ ты’’ ниць ирий нюртей яляхана округна радио’ самляӈг ю’’ пода панысь. Валакада яханана тарця яля’ мунзипой’ ваерась. Тены’’ похо’’на манзарана’’ ервуна е’’эмня тарця яля’ ехэрана яля’ ӈэдакы? Округна радио’ ӈод теда яӈгува’’. Теда, тамбирувна ӈокавна округханана радиовна ни’’ лахана’’. Ялянанда сян’ юд’ минутако лаханава, ти’ валакада. Тарем’ таслась, округна радио’ харта историяда таня. 1965 по’ апрель’ ирий нюртей яляхад’ 1997 по ӈэсонд’ округна радио ӈокавна манзарась. Мань’ таняна 1986 поход манзарамась, ненэця’’ вадавна нюртей передачи’’ сертаба’ пямась. Манзаравась’ тобнан’ главный редакторӈэ’ Вениамин Тунгусов тарась, Пыда нерцюнда маля пон’ Борис Исаков радио’ манзаям’ тю’’у минредась. Тамальӈгы похо’’на’’ радиона манзарана’’ хибяри’’ ӈокаць, Сертабада передача’’ ӈод тянё ниць’ ӈа’’. Хусувэй яля’ хув’ мер округна пудана’’ юнха’ инзелесьтыва’’, тикахад’ округна хибяри’’ ханзер’’ илева, манзарава нямна передачи’’ журналист’’ сертабасьты’’. Радиона манзарана’’ округна ӈэсыхы’’ пилибт’ тэворцеты’’, таняхад’ хуркари материал’ передачито’ е’’эмня тэврабсеты’’. Сельской хозяйство, партийной илева, ӈацекы е’’эмня хамандавы’’ передача’’ танесеты’’. Тамальӈгы похо’’на’’ манзаравы’’: Георгий Вокуев, Александ Марков, Владимир Абесадзе, Виктор Толкачев, Людмила Корепановна, Анна Пекканен, округна радио дикторӈэ’ Галина Зиненкова манзарась, хибя пыда сомбой сёмда нидась намдур? Пуна товы’’ журналист’’ Андрей Михин, Светлана Дёмина, Леонид Малютин. Звукооператорӈэ’ Людмила Антипина, Лариса Михина, Ирина Елизарова, Татьяна Терентьева пон’ манзараць. Фонотекахана манзаранаӈэ’ маля пон’ Ульяна Буржинская тарась, инженерӈэ’ Александр Кожевин манзарась. 1987 поход’ сяс пеля ямбан ненэця’’ вадавна лаханасьтыва’’, вадам’ теневана хибярина тамальӈгана хусувэй ӈэсыхына таняць. Харвась манзарасьтыва’’. Ненэця’’ вадавна лахана’’ хибярина ӈод’ нюртей яляхад’ округна радиона пилибт’ таняць, округна юн’’вадецеты’’. Таняна манзаравы нина’’ тенейна’’, Евдокия Тайбарей, Прокопий Явтысый, Майя Ледкова, Лукерья Бобрикова маля пон’ манзарась.

Ӈысма’’ вадавна ӈод округна радиона лаханасьты’’, передачи’’ сертабадаӈэ’ Лукерья Валей тарась. Сян по’’ ямбан ненэцие вадавна ӈэда передачи’’ сертабадаӈэ’ сидяӈэ Ирина Ханзерова няюв’ манзаранись.

Тюку по’ округна радио’ илевы ӈэбнанда – самляӈг ю’’ пода пангусь. Маня’’, радиона пон’ манзаравэӈэ’’, е’’эмняна апрель’ ирий нюртей яля – ӈарка яляӈэ’ ха’’мурӈа. Тикы округна радио’ со’’явы яля. Хибя’’ тенева’’, ил’ ханзер’’ сюрхалты? Харвабнанда, сяӈгова ӈани’’ тарця яляха’ тэвӈгуна’’- ся’’ня радио’ ӈани’ нердеӈгу, радио’ мун яля’ ямбан намдуртава’’. Тедари, округна радио’, округна история.