Вэсако луца пухуцянда ня’ илевэхэ’. Нюди танявы. Ся’’ны ӈэбто’ ӈод’’ вэсако сюнкацямда нюдерць хане хая. Сяйнда едком’ пэӈа. Яля’ ямбан’ ядэрӈа. Ӈули’’ ӈамгэхэртм’ ни ху’’. Неранда няд ӈопой ядана. Хаби вэсако ӈэвы. Хаби вэсакор ма: – Луца вэсако, ханя пэрӈар? Луца вэсако вахалъй’’: – Ханяхарт нив пэр’’. Хане ядэрӈадм’. Мяканани нюни ӈока’’. Ню’’ни мэд пюрӈадм’.
Хаби вэсакор ма: – Мань ӈани’ хане ядэрӈадм’. Теда’ тидӈэ хаянё’’, тюкохона сеӈгахани’. Луца вэсаокр сяинда едм’ ӈыда. Сидя силяӈг нянь’ яхалаком’ ӈадимде. Сяйнда едком’ пиреба луца вэсакор хуримна танямна лаханакурӈа: – Луцаваха’’на мутрата’’ таня’’. Параӈода’ сидя трата луца пя’ пахамана пакалпати’, пя’ малувна ӈадимдаӈаха’. Хаби вэсако вахалъй’’: – хабихи’’на ӈод’’ ӈани’ мутрата’’ таня’’, луцари’’ ни’’ мутрат’’. Луца вэсако маси’’: -Тикавахана мутрадами мэс’’ма. Хаби вэсакор ма: – Мутракодамд мэ’’идамзь, Луца вэсако ма’’нив’: – Нидм’ нензямд’’. Хаби вэсакор луца вэсакомда сюдэхэюта понд’ лапцада. Луца вэсакор пэдарэй варкуэ хая. Нята няда ӈани’ сита то’’олахаӈэ хэвы. Яв’ хэвувна ялъяха’. Няхар’’ по’ ядаӈаха’. Ӈули’’ ӈамгэхэртм’ нихи’ хомбю’’. Та ӈэсоӈгана ямд’ ӈыхытана саля’ пыявна ӈадимяха’. Таб ваӈгам’ сертаӈаха’.Хаби вэсакор нён си’ няюна хонёсеты. Ӈоб’’ хонёвади’ нинякы ӈа’’. Хаби вэсако лэры, маси’’: – Луца вэсаков, теда’ хавэни’, саю’’ тута’’. Пин’ инзелерӈаха’, саю’’ мун’’ совондо’. Хаби вэсакор ма: -Мань пин’ тарпаӈгув’’, си’’ми хадаӈгу’’, хобами хабарта’’. Ян’ лехэбтаӈгудо’. Саю’ ерв манда: -Тамна ӈани ӈопой танявы. Пыдар санаванд сер’ хобани’пиняӈы хэван’ ха’’амъин.
Хаби вэсаком’ пин’ тарпатаванда сер’ хададо’. Тикавахад луца вэсакор тад санаванда нянда хоба’ тяха’ ха’’мы’’. Саю’ ервотам’ пыянда малахад сякалӈада. Хаби вэсаконда тёрда ӈадимя: – Луца вэсаков, ӈамгэр хадвэ, сяйни едм’ вабтанэй! Луца вэсако тад сэвада сылабтаванда, сяйнди’ ед’ сём сякалпавы. Таминанда вахалъй’’: -Нена’’ ӈока маям’ мэ’’ӈанинё’’. Луца вэсако писяласеты’’, ярумзеты. Хаби вэсако няханда маси’’: – Мутраком’ мэсо’’мами’ нёр вадецету’’. Ся’’ны ӈэбто’ ӈод’’ Хаби вэсако’ юн параӈода’ хаво’’ сихи’’ тэвы’’. Сидя солдатада вэсако луцам’ хосая хаяха’…
Малда ни’’ӈа’’.
