Сайнорма по’’ мальӈгана хойхана илена’’ хибяри’’ Победа ялям’ хахаялтабась ӈокавна манзараць. Хуркари’’ выӈгана тарцясь. Ӈацекы’’ ӈарка хибяридо’ нядабиць. Ӈарка яхана ӈахы’’ похот’ Хатанзейской тенз’ мэта’’ ненэця’’ мюсерӈа’’, мэёвна илена’’, тыдо’ пилибт’ пэрта’’. Иле’’мяндо’ паӈг маля ямб’’.
Тарця мэё’’ паӈгхад’ Степан Васильевич Хатанзейской’ пересь. Пыда илеванда ямбан тэхэ’’на мэбэй, саю’’ похо’’на маля нянэювна манзарана хасавась. Небой по’ октябрь’ ирийхана юр’’ пода панысь.
Степан Васильевич тамна «Тет яха мал» колхозхана манзарась’ пявэдась, теда тикы «Путь Ильича» нюбета колхоз’. Пилибт’ таняна манзаравы. Сямянд’ нерде нисянда’ ӈэсыхына тыбэртяӈэ’ таравысь. 1942 поход’ тикы ӈэсыхына бригадирӈэ’ манзара’’ пядась. Саӈго’’вота’’ саю’’ похо’’на ӈэсым’ ня’’амась, ёнар’’ си’’ив юр’’ тэдось. Манзарась саӈго’’воӈась, хасава’’ хойхана ниць’ тэвор’’, ӈокаювдо’ сайнормахана мэць. Хойхана хаювы’’ – вэсако’’, пухуця’’, не’’, ӈацекы’’. Хаювы’’ хибярито’ няюв’ илець, ныхыдо’ нись’ сяй’’ манзараць. Фронт’ е’’эмня тарана’’ ӈавори’’ ӈод хамадабсеты’’. Степан Васильевич ӈацембой’ хасавась, манзараваханда пилибт’ нюртей ӈэсьты’’. Илан’, манзаян’ мэёвна сырта ненэцясь. Хэвхананда мэна’’ нида’’, няндо’ вада’ харам’: – Тарем ӈэбта тара! Пилибт’ намдурцеты’’. Тикаханда сава ӈэӈгу.
Тикы ненэць’ хусувэй сертабада манзаянанда нердеван’ харвасеты, нердесьты. Ёнар’’ хасуюёнар’’ тет ю’’ маттамдэй похона партиян’ ня’’амадось. Илеванда ямбан ӈока’’ тандая’ манзарась тэхэ’ товы хибярим’ нянэй манзараван’ тохолавы. Сававна манзараванда ед’ ӈока ихиня’ сомбой вади’’ намдурцеты. Тамна «Тет яха мал» колхозхана манзараванда мальӈгана «Отличник оленеводства» знакм’ ня’’амась. Сайнорма похо’’ на манзарава е’’эмня «За доблестный труд в Великой Отечественной войне 1941-1945г.г.» медальта’ таня’’. Степан Васильевич ӈарка илм’ мэ’’мысь, «Путь Ильича» колхозхана илеванда ямбан манзарась. Пыда «Ветеран труда», ВДНХ бронзовой медальта’ танясь. Теда ӈод, округна Ӈарка яхана, «Путь Ильича» колхозхана Хатанзейской паӈгад’ перена’’ хибяри’’ тыдо’ пэрць мюсерӈа’’. Поӈгнандо’ Степан Васильевич сидя хасава нюху’ Пётр няби Василий, нюнда не ню Анна хойхана мюсерць иле. Илеваханандо’ тарця ӈарка хибярир’ хойхад’ хэсь, пуданда ӈацембой хибярим’ хаеӈгу’’. Хатанзейской мякана пилибт’ тарем’ ӈэсьты’’. Тыбэрма серкана пыдо’ нерняри’’ тарем’ миӈа’’. Тарем’ пилибт’ ӈась. Тарем’ нерняна ӈод’ ӈэбнанда’ тара!
Няръяна маркана маля ӈахэт’ Степан Васильевич Хатанзейский не нюда Зоя Степановна Ивакилева иле. Пыда округна толаӈго’ хардахана Ӈэрм’ ненэцие’’ отделкана ӈарктаӈэ’ манзара. Нисянда иле’’мям’ няна’’ ваде’’ӈадась, нянда ӈарка вада!
