Ты’’ сие ниць’ ирийхана Москва маркана Всероссийский ассоциацияна ӈарка ялям’ мэ’’манзь’ толырто’ тянё ненэця’’ ма’’люрӈаць’. Таӈок’’ по’’ ямбан’ сертавы’’ серудо’ таслабиць. Сямянд’ сававна манзаравы’’ненэця’’ сава вади’’ намдаць’. Нюртей яляхад’ ӈарка ассоциацияна манзарана’’ хибярина «За верность Северу» медальм’ ня’’амаць, ӈокаювдо’ тарця хибяри’’, хуний харто’ яханандо’ танеда ассоциациито’ манзаравам’ нерня пэрӈа’’.

Тарця ӈарка яляха’ хамякова’’ яндаха’’на’’ ӈахэт’ миӈаць’. Маня’’ округхадана ӈод хибярина’’ тарця ма’’лёян’ ӈэдалёрӈаць. Поӈгнандо’ теда ассоциацияна нерм’ пэртя Александр Белугин, тикахад’ пилибт’ хариняримна ӈэдалёртаха’ Галина Платова, Галина Артеева, Юлия няби Иван Ледковха’. Еся’’ яӈгова’’ нид’ тянё хибяри’’ ядэрмакы’’.

Ӈарка ассоциацияна ма’’лёва поӈгана хуркари’’ сер’’ таняць’. Сё’’ мэта’’,тарана’’ ненэця’’ коллектив’’ яндахат’ товыць’. Хусувэдо’ несэй сейхана сомбой программам’ манэ’’лабтаць’. «Кочевье Севера» фестиваль’ ваерась. Маня’’ округхадана таняюв’ тюку по’ Саляхад’ «Маймбава» тэворӈась. Сидя ёнар’’ самлязимдей яӈганя по’ литература поӈэ’ таславы. Ӈэрм’ тенз’ мэта’’ паднана’’ манзаи’’ таняна толабаць’. «Сокровища Севера» Международной ярмарка ӈани’ яндахат’ товы’’ хибяри’’ ма’’лась. Тюку по’ юдимдеймэвна яндахат’ товы’’ мел’’ ненэця’’ ма’’лэйдаць. Ӈудидо’ мэта хибярина тэвравы манзаидо’ манэ’’лабтабиць’’, хибя’’ харванар’ ивнянда ӈэда манзаям’ тэмдась’ пирӈадась’.

ВДНХ мат’’ ю’’ хасуюдимдей павильонхана мел’’ хибяри’’ сян’ яля’’ ямбан манзаидо’ манэ’’лабтабиць. Ханяӈы’’ яхат’ товы’’ ненэця’’ харто’ мядудо’ тэвравыць. Нянэй мяд’ ӈод таневыць, ханяна ненэця’’ мядондидо’ ядтабиць. Фестиваль’ этнической моды ӈани’’ танясь’. Тюку по’ тарем’ нюмдевы – «Полярный стиль». Маня’’ яхадана тарця фестивалян’ манзаида Людмила Кустышева ядэлась’. Тикы не хуркари’’ паской ембдяр’’ сэдбада. Ты’’ сие ниць’ ирий’ сидя ю’’ самлязимдей толыркана «Народы Севера» нюбета ныланава’’ ялям’ мэ’’ӈаць’’. Яндахат’ товы’’ хуркари’’тенз’ мэта хибяри’’ сава таневана’’нидо’ ма’’лаць’’, харто’ тэвравы’’мякнандо’ ядтабидонзь’’. Ӈэрм’ ненэцие’’ ӈавар’’ мирдапиць’’, хынота’’, тарана ’’ манзаидо’ манэ’’лабтабиць’’. Фестиваль’ манзаямда хаювы ирий’ сидя ю’’ маттамдэй яляхана ёльцедась’’.

Всероссийский ассоциацияна сидя ю’’ самляӈг по’ нямна хамандавы ӈарка ма’’лёй ваерась’’. Таӈок’’ по’’ ямбан’ ассоциациява’ сатавна ӈэта’ ни’’ нулъй’’, мэбета организацияӈэ’ хая.