Хаювы си’’ив пудана яляхана Архангельск’ мар’ со’’яма ялямда мэ’’ӈась. Тарця ялян’ хамандавы’’ хуркари сава сер’’ ваераць. Хибяри’’ сян’ яля’’ ямбан хуркари ихиня сомбой ныланавам’ мэ’’ӈаць. Ӈока мядонда’’ маркана ма’’лэйдаць, хуркари я’ тер’’, хуркари тенз’ мэта’’. Маня’’ округхадана ӈод’ сян коллектив’’ харто’ манзаидо’ манэ’’лабтамбавась тэворӈаць.
Округна этно-культурный центрхана манзарана’’ нина’’ тэравы программадо’ нюдя нись’ ӈа’’. Архангельск’ маркана илена’’ хибярихи’ «Ненецкий край собирает друзей» тарем’ нюмдевы ӈарка ялям’ хамандаць. Сян’’ яля’’ ямбан «Илебц» нюбета ненэцие’’ театр, ӈысма’’ нина’’ ансамбль «Печорянка», тикахад’ З.Ф.Чупрова устьцилем «Родные напевы» ансамбль серм’ пэртя харто’ программыдо’ манэ’’лабтабиць. Сямянд’ нерде маня’’ яхадана ядэрмы’’ нина’’ «Малые Корелы» нюбета музей деревянного зодчества и народного искусства Каргопольско-Онежский секторкана ма’’лавы’’ хибярихи’ ненэцие’’ сё’’ мэ’’ӈаць, «Сэр ябто» вадаком’ манэ’’лабтаць. Ӈысма’’ нина’’ ӈод харто’ хыно’’ӈаць, тарабцодо’ мэ’’ӈаць. «Родные напевы» нюбета ансамбль’ нюдя ни’’ӈа. Тюку’ мэвахана Архангельскхана усцилём’’ культурам’ Зоя Федоровна Чупрова ӈопойӈэ’ манэ’’лабтамбидась. Пыда ёльце я’’авлада не- сё’’ мэ’’ӈась, лаханако’’ ваде’’ӈась, мэкад’ и’’илеми’ хэтбись.
Хурка паской ембдяро’ нянэй ненэця’’,ӈысма’’, устьилём’’ мэ’’ӈа’’ – тикым’ ӈод ӈарка маркана илена’’ хибяри’’ манэ’’ӈаць.
Тикы’ хавна тамна округна мел’’ хибяри’’ харто ӈудаханато’ сертавы’’ манзаидо’ манэ’’лабтамбиць. Таняна ма’’лавы’’ хибяри’’ е’’эмня мастер-класс’’ таняць. Ныланана хибяри’’ харвась тоходанаць. Александр Ледков нянэй хан’ ханзер мибвам’ манэ’’лабтамбись. Ӈухуко’’ сэдбась Галина Артеева тохолкусь. Тикы’ хавна Филипп Ардеев манзая’’ таняць. Хуркари’’ сярвы’’ ӈавори’’ Валентина Ястребкова тэвравысь.
Хурка литературам’ этнокультурный центрхана сертамби, тэвравы’’ хуркари’’ книга’’, буклет’’, сборник’’, журнал’’ ӈокаць. Тамна паднана’’ нина’’ падвыдо’ толабиць. Матрена Талеева ненэця вадавна падвы стих’ толась, Инга Артеева луца вадавна стих’ толась, сё’’ мэ’’ӈась.
Яля’ пуданана «Малые Корелы» нюбета музейхана хуркари’’ тенз’’ хибяри’’ ӈобт’ ма’’лась «Живи, традиция» хороводхана ядэрӈаць.
