Тюку по’ тамна ӈопой ӈарка паднана ненэць’ со’’яма ялям’ мэ’’манзь хамякува’’. Тикы паднана Алексей Ильич Пичков. Маля сян по’’ямбан я’ниня яӈгу’’, хэвувнана ни’’ ядэр’’, сёмда нива’’ намдур’’.

Тарем’ ӈэбнанда ӈод’ паднанава хибярина тенедо’, ихиняна иле’’. Пыда хаевы сарпявнанда паднана’’ хибярина мэбэць’ яда’’, паднава’’ серм’ нерня минре’’. Алексей Пичков падвы’’ манзаи’’ книгаӈэ’ сертамбидо’. Яӈгу’’махаданда маля сян книгам’ мядонзэйӈэ’ этнокультурный центрхад’ ня’’амаць. Округна хибяри’’ паднана нямдо’ сава ихиня тенедо’. Алексей Пичков ёнар’’ хасуюёнар’’ няхар’’ ю’’ тетимдей по’ ты’’ саполана ирий’ няхар’ юдимдей толыркана Канин’ выӈгана мюсерта’’ ненэцие’’ мякана соясь. Нися’ хасада Илья Алексеевич нянэй ненэця ӈэвысь, ты’’пэртяӈэ’ манзарась, небя’ хасада Акулина Трофимовна ӈысма не, мядм’ манзаям’ пэртяӈэ’ тарась. ӈодьбянда мякнандо’ сидя вадавна лаханась’ пэрмыць. Нюдо’ ӈод ӈысма, ненэця вадам’ теневаць. Нисядо’ саць нямбара ненэць’ ӈэвысь, ӈока лаханако’’ теневавысь. Нюта’’ е’’эмня ӈока хыноцеты’’, лаханако’’ вадемы’’ ӈэсьты’’. Алексей си’’ив пода панась тоходанвась Шойна ӈэсын’ тэвыць. Канинской школа-интернатхана илесь, тоходанась. Си’’ив классм’ ёльце’’махаданда пыда Няръяна март’ педучилищен’ тоходанвась еримясь. Тикы’ пуд Ленинград’ маркана институтхана тамна нерня тоходанась. Таняна паднава серм’ нянэвна пявэдась. Тамальӈгана Ленинградхана Александр Канюков, Геннадий Пуйко, Владимир Санги Алексей Ильич няюв’ тоходанаць. Тикахад’ мал’’ пыдо’ паднанаӈэ’ хаяць.

1957 похона А.И.Пичков Няръяна март’ тось, «Няръяна вындер» газетанана манзарась. Падвы манзаида «Север», «Звезда», «Сибирские огни» журналкана ӈадиберӈаць. 1961 похона Василий Ледков няюв’ ӈобкана сертавы книгади’ «Далеко Сэрне моя живёт» ӈадимясь.

Илеванда ямбан Алексей Пичков Няръяна маркана илесь, паднась.