«Пунушкам’» нюбета журнал’ округханана маля ӈока по’’ ямбан ӈадимберӈа’’. Ӈацекы’’ е’’эмня тарця журналм’ этно-культурный центрхана манзарана’’ нина’’ сертамбидо’.

Яханана нянэй ненэця’’ поӈгана харто’ вадамдо’ мэта хибярина тянёмдана’’. Ӈарка хибярина валакада сававна тамна лахана’’. Тарем’ ӈэбнанда юд’ мян по’’ ваерась вадава ӈовсю’’ сусаӈгу. Толанзёбнанд’ вадамд’ ӈани’ намдуртар’, тохолаӈгур’. Толанзюда’’.

Ёнэй Парнэко не ӈани’ нюм’ хо. Нюнда ӈамзи пирейда. Тёняӈы нида ӈани’ хонрэйда. Парнэко’’ не’’, ненэй несавэй мал’ то’’. Ӈарка ед’ мюня нюнда ӈэвакэця тэри мулкадарӈа.

Ӈарка’’ яханана яндаха’’на хуркари’’ тенз’ мэта’’ хибяри’’ иле’’. Хусувэй тенз’ мэтанд’ харто’ вададо’, хусувэй тенз’ мэтанд’ харто’ вадакудо’ таня’’. Эскимос’’ тенз’ мэта хибяри’’ яв’ вархана илена’’. Пыдо’ ӈод хуркари’’ вадакудо’ таня. Тюку яля «Хунтавы хынабц» лаханаком’ ӈацекэхэта’’ толара’’. Тарця лаханаком’ ненэця’’ вадан’ паднана Василий Ледков’ падвэдась.

Нарада то. Иба яхат то’’махаданди’ Берингов’ яв’ вар’ тальбя’ ни’ сидя лэ’’мор’’ ӈамдыхы’. Ян’ яв’ вархы пэ лаӈг’ ядан’ пидямди’ миӈаха’.

Маня’’ илесь яханана хуркари’’ тенз’ ненэця’’ культурахад’ перена’’ сер’’ ӈока ӈэсьты’’. Тарця манзая’ нямна этно - культурный центрхана’ манзарана’’ нина’’ ибедорӈа’’. Ихиня’ сомбой манзаи’’ ӈатесетына’’.

Хуркари’’ тенз’ мэта ненэцие’’ лаханако’’ ма’’лабда’’ ханярина таня’’. Тарця хибяри’’ хэвхы округханана ӈод’ иле’’. Анна Янгасова хойхана соявы, вадювы не. Тенеда: ханзер ненэця’’ мякнандо’ манзаито’ пуд ныланавандо’ сер вадакохо’’ инзелесьты. Пыда’ падвы лаханаком’ толара’’.

Ты’’ ниць ирийна няхар’’юдимдей яляхана округна туристический центр’ няна хуркари’’ тенз’ мэта ненэцие’’ фестиваль’ ваерась. Тарця ма’’лёвам’ хибярина’’ е’’эмня тюкумэвахана ӈани’’ этно-культурный центрхана манзарана’’ нина’’ хамандаць.

Округханана хусувэй мякад’ сайнорманзь’ хэвы’’ хибяридо’ таняць. Хибяхова’ ирида сайнормакы, хибяхова’ нисяда, хибяхова’ ӈани’ переняда ӈэдакы. Роза Ивановна Канюкова някада’ пилибт’ ихинянда иле.