Таддикахад’ тарем’ инзеленандо’ ӈари’’ ӈаркамбовна ма’’нив’: - Лакась Пукэй! Тикавахана сюдбя’ нюдя ню ӈэта ни’ санэй’’. Тикы няндо’ сана маним’’: - Некэй’’! Хэхэвов! Нылека товондов!
Тикавахана мал’ ӈэто’ ни’ санэяд’’, ма’’ ним’’: - Нацяна няку’ пяхарцява’’, ӈацяна’’ ӈадана мэнана’’ ӈылека сидна’’ ӈамда. О! Пинна едандо’ нямна вадасялма, неры ядма явна пядо’. Тамна хамеданаваханда тамна ӈаркамбовна тёрей’’: - Лакась Пукэй! Сюдбя си’’ив нюм’ ӈамъидамзь! Нита хэняван’ ханяцей’ ӈаркавна тёрей: -Лакась Пукэй! Неры ядмандо’ мюмня сюдбя’ си’’ив ню халандо’ ӈылма. Си’’ив хавота нярава еддо’ тодабця’ нина лохомба хаи. Пухуця’ нюи тарем’ инзеле тайнанда хунанда мят’ яркосавэй ӈоб’’ пуд тювандо’. Сюдбя вэсако мамонда: - Ӈамгэра’’ хадкэй’’?
- Ӈамгэ хадкэӈгу’’, Лакась Пук ту’’ нив’’. Пыда ӈани’ тёрена: «Сюдбя’ си’’ив нюм’ ӈамъидамзь.» Нисядо’ ма’’нив’: - Лакась Пукхав сянакода яӈгу, сидда’’ хоб’’г\нанда мал’ ӈамда, ненэй ӈылекахавава’’ ти ӈэ’’ нив’’. Тюкон’ тэвхавабта Лакась Пук сянакода яӈгу, сидна’’ мал’ ӈамда. Сюдбя вэсако мамонда ӈэ’’ нив’: - Ебта’’! Тэ’’у ӈада’’! Лакась Пук’ ядмавнанда тобнанда хаевндада яӈгу. Мякдана’’ хэхэва’’. Маси’’ терсяда мя’’ма’’ го маси’’ салсу’’. Тикы яхавахад сюдбя вэсако, сюдбя’ си’’ив ню, сюдбя’ ӈудатато’ небяюдо’ нямыдо’, тарем’ сырӈа, халто’ ӈылма’’. Тикавахана мято’ хэван’ ядмито’ мю’ ӈоб’’ тюсм’ палӈа’’., тарем’ ма: -Тюкод салад тяхананд. Пухуця’ нюим’ ӈамъин! Сюдбя вэсако пунда няю’ ӈэвада хамы’’: -Си’’ив тарка тыдэя, Лакась Пукм’ нёирась ӈэдара’’.Лакась Пукм’ тикарин’ хынумэр ӈэирась!
Тиката хэхэва пухуця’ нюи ян’ санэй’’, ма’’нив: - палканзи! Сейхавара’’ яӈговынню’’. Сейта хэхэва теневавэданню’’. Илеванд ямбан’ ӈока ялян’ харвана ненэцям’ ӈамдакэн. Пухуця’ нюим’ тикы тяхана нивакэр намд’’, тамна ӈаманзь вытанаси. Ти тарем’ сидда’’ мыӈгосадм’. Ту’ ниня ӈыдёда си’’ивм’ хавота нярава едем’ ӈуданда харан’ ӈыдёсяӈгаданда сакадтада. Пухуця’ нюи тайнанда хунананда си’’ивм’ хавота нярава едем’ евэйсавэй ӈамзасавэй мяканда тэврада. Хадада ма’’нив’: - Нани тикар ханяд хонар? Ма: - Сюдбя ирини хаӈорона мэмы едда. Сейто’ хэсь таня хаедо’. Тамна ӈылекадо’ танявы, ма: нюмда Лакась Пук.
Хадада ма’’нив’: - Ненэсяринда ӈод’’ сюдя ӈылека Лакась Пук таня, сюдбяхартахана хаирта яӈгу. Тарцям’ намдорцятыдм’. Лакась Пук ненэцяӈэ пясь ненэць’ ни ӈа’’, я сармик ни ӈа’’, тарця ӈамгэри ӈэванонда. – Тедав’, -ма, -мань вэнолтэйнась, мякнандо’ хуныдаць, небяюдо’ нисяюдо’ ӈудадато’ вадарць ханэйдинзь. Пухуця’ нюи ма’’нив’: - Тарем’ мэӈгунась’. Пухуця; нюим’ нинякы намдсето’. Ями хнедасялмдавы’’ тикы ӈэрхавынню’’. Пухуця’ нюи та илелъй’’. Яв’ малӈэ хая, хадаяда Мяд’ пухуцяӈэ хая. Хыйда яхаданда сюдби вэнолтэйда.
Малда ти.
