Теда’ валакада мань индкана сюреде поӈгэрта ӈамнерёнд ливарпэй сэв манэ’’ӈадм’.
Пуна тикыд лэкувна тарем’ ни’’ сюредеӈгу’’, – пыда ӈоб’’ лахана, – няйналтаӈгудо’! Тарця нумгана мале тыд хадохона нид хаеӈгу’’: суюд тамна ныхыси’’. Тюкохона нохор ӈо’’ ӈокава. Ирканани’ ӈани’ ханавэй’’ лэтмбада ябтот пидирма таня. Нохо’’ яхавар ханяна ваӈготирць таравамда тихинда теневада. Тиканд ӈэда ӈавламбидома. Сыранд ха’’амхана, синёхона енянд тотрев’ ханавэр ӈамгэхэртм’ вуни мание’’. Нохор тикырим’ нив’ ӈате’’: ябтонд ӈамнелада сар’’нюко тэврё ӈамда, су’’ляком’ нерон’ нюхулеӈгу. Тикар серота, пакос иленякои! Тад ӈо’’ тамна пинхадъива! – Нисяв сякни сылы’’, нирцьеда пыянда паха’ нид харомлэяд’’. Тоса юнра: – «Пыдхавар, хасавав нюв, хасуйхартар яр яӈгодарханю’’?»
– Ни, – мань мадм’. – Мальцяв хасуй… валакада ти… ӈэн ханьта’’: пибин, либтин мал’ са’’не’’.
– Ти-ика-хава ӈэ-эись, – хынотадрев’ нисяв хайналтада, хэвняю’ васадась, пи’’лебцовна нялпрада:- Ти, суюнд хоба’’ лат сырар нялпада! Тикахава ӈэись! Тецьдар, харвабта, яӈгоданакы. Тюкор сырар валакада саць са’’нюй- тирць юӈгна. Тарця сырахад ӈамгэрим’ ӈатева’ пир. Тюку ӈамнерёд пуд тецьданд маркадаб’’ сава яӈгода!..
Са’’нюй, лабцярюй ӈамнерёр ӈоб’ нялпады. Лахациет ӈэва, нерот, пюӈгот тарци ливарталаба, лата сырит сэв’’ поя няйна’’, сякнани’, садаха’’на юӈгна сырахад хэвхэми яр сисьда синёдарев мореръй’’. Тикы сэр’’ ӈамнерён’ нисяв ӈадя яломэрха саӈохона сырӈа. Ябтот пидерма’ вато тамна тэвувдавэркава, ӈадтбянда пыда хад’ мацеда’’ма’ пуд ябтот сибеко’’ лахацяндрев’ я’’ленавам’ ниванзь манэ’’манзь мэвами’ сяӈа.
– Ялэд тута’’, есит сэро’’ манзадава’ мальӈгана тюконд то’’олха ӈамнерё хад тут’’ нив’! – пыда ена ма.
Нисян си’’ми хаселабтабавам’ мань хамадамбивва, валакада ябтуд, тюкор сырар нянани’ теда’ ӈули’’ ни тара’’: ӈэн ханьта’’, юӈгна сыранд ни’’ ся’’амнан няӈун ӈыл’ тэса, лэмбаравнан педена, ӈадьбянда янд тир’ ний ӈарханда нялиртаннарха, нанзкабтарха. Сэр’’ морер’’мана минда’’тыд ӈаркараха’’я’’, ливартанараха’’, хэвдалё ядэртарха’’.
– Сыра… ти хурка паской сыра нялподы! – илебядёдадрев’ мань вахалъюв’’, тикыринда ӈод’’ япданд ханзом’ нямюхуртан нина намднархав.
– Паской сыра, – ӈоб’’ ибедорць нисяв си’’ми тэ’’элта, няюн васадэй’’. – Нянанд, хасаваӈэ, хыли ни тецю’’?! – Нирцьеда тиртя’ тотрев’ макабта. – Тароси’’, саць тароси’’ пиваид са’’небтеяд. Ӈэд ханьта’’?!
– Ни’’, – илебядёдадрев’ вахалъюв’’, тикыринда ӈод’’ ӈарханда пархалъюв’’. Пибтиӈон харто ледрелъяд’’. Мам’:- Теда’, ӈэцёв’’, мал’ янд нина сырар миӈа? Мякнана’’ ӈобтарем’ сыра?
– Мал’ янд нина сырав’… -пеӈгнанда пэямда тэ’’ӈа, – тикамд, хасавав нюв, мань ехэрав. Яр ӈарка. Ханяхавахана харвабта хад нибтя хаер’’ ӈэдакы, мякваханана’’ ӈобтарем’ хад: хахаю’’ нив’ мяквар.
– Сыра… -пэдёйвана инд’’ми посамладм’, нямюхудан ӈани’ вадин харто’ нялпнархыд’’: – Мяквахана… ту. Сяйм’, хадри’’, ӈэрпи’’ма.
Малда тамна ни’’ӈа’’.
