Нянэй ненэця’’ илевадо’ пилибт’’ тэхэт’’ пересь’. Теда ӈод хойхана илена’’ нина’’ таня’’, пыдо’ илевадо’ нянэвна тэхэт’’ пере. Маня’’ округханана тарця ненэциена таня’’, хуний харто’ илевамдо’ нерняюв’ харто’ тидхалембидо’. Пыдо’ харто’ ныхыто’ енась иле’’.
Ӈока по’’ ямбан выӈгана мюсерӈа’’, тыдо’ пэрӈа’’, нюкцидо’ вадамби’’. Ӈокаювдо’ теда «Ямб то» община тер’’. Таняна илена’’ нина’’ серудо’ таславанзь ханяӈэна Няръяна март’ турцеты’’. Хаювы яляхана округна еркы маркана «Ямб то» няд’ товы’’ хибяри’’ ядтамась. Тикы Илья Нокрета, неда Варвара Тайбери. Варвара хасава нюкцямда соебтавась март’ товысь. Илья вэсакода пухуцямда хосеявась тось. Маркана мэванди’ сер тарана падроди’ сертабихись. Ӈобт падъяха’, тикахад’ хасава нюкцянди’ соявы ед падар ня’’амӈаха, харти’ ӈод едэй падартамди’ сертаӈаха’.
Хасава Илья Нокрета ӈарка яхана мюсерта’’ ненэцие’’ мякана соявы, хойхана вадювы, теда ӈод’ тэхэна иле. Варвара Я’ мал тер’ некоця, няхар’’ по’’ тяхана хаюпа хэсь «Ямб тон’» тэвыць. Сидя ӈацембой няхаюна лаханакурць няйнась. Лаханакурць няць’ саваха’, вадакоди’ тэри’’ хайна. Илья Ӈокрета : – Мань март’ нюртеймэвна томась. Маркова сава, самолётъе саць вэва. Ӈарка сава самолётхова сава ӈэдакы. Мякдани’ марад ӈэсонд’ сидя яля’’ ӈэдалыдм’. Илевава харто ‘ тидхалембидо. Тикы ӈарка явна мюсерта ненэциена. «Ямб то» община тер. Мани’ Няръяна март’ падрони’ сертаванзь тонись, ӈобт падгуни’. Неми’ Тайбари, падма’’хадани’мань’ тензми’ мэта, Нокрета ӈэӈгу.
Корр: Пыдар немд’ ханяхад’ тэврасар’, пыдара’’ янда’’ тер’’?
– Ни’’ӈо’’, Саля’хард няд тэвравась. Теда хуркари’’ машина’’ танятак, снегоходхана ховась.
Корр: Харта харвась’’тоса’’, ныхыри’’ ханасар’’? – Мань нисяв’, небяв’ теневыдись. Сяӈгова манэць, тикахад’ хосеяваць. Пыда паӈгуда Ямалкад’ пере’’, нида’’ Пэхэ’’на илена’’ненэця’’. Приуральский районхана мюсерта’’, ӈарка хардадо’ Аксарка.
Корр: Пыдар таняна илена’’ ненэцяӈга тэворцан’, пыдо ӈани тарем иле’’?
– Мань тэворӈамась. Пыдо’ ӈани тарем иле’’, маня’’ сидна’’ тотрев. Тыдо’ валакада тянёрка’’ таняна. Маня’’ теда тына’’ сава, сававна илева’’. Нисяв’ таня, небяв’ яӈгумбэй.
Корр: Хасава нюкцяри’сояса’’, ханзер’’ нюмдеӈгури’’?
– Мани’ не нюкцями таня, мякана ӈатена. Теда хасава нюми’ соясь, Яковӈэ нюмдеӈгуми’. Падрони’ серта’’махадани’ ӈобкана мякана ӈэдалаӈгуна’’. Неми’ лакамбой мякнанда яӈгусь. Хойхана неси’ ӈоб вэва. Мякана тара.
Илья Нокрета недамда Ямал няд тэвравысь. Варвара Тайбери я’’авлы нямбара, сядота некоця. Лаханакурць сава некоця ӈэвы. Харта нямнанда тарця вади хэтась: – Мань Пэ’’ терам’. Ӈани мякана илева’’, тына’’ таня’’. Нисяв’ Иван Яковлевич Тайбери, небяв’ Евдокия Степановна Лаптандер, мюсерӈаха’. Нин’’ таня, ӈарка хибяри’’, ӈанидо’ нелебэй’’. Харто’ мякнандо’ иле’’. Таняна иленаӈэ Саля’хардан, Лабытнанган’ март’ тэворцеты’’. Тыто’ ӈамзам’ мирдапи’’, буркам’ сэдгу’’, мирдата’’. Тарем есядамдо хомби’’, таня мядоманзь тэвор’’мами’ таня. Таняна нина’’ савовна иле’’. Маня’’ някуна турмадо’ яӈгу, яда саць хубта, маля пон’ ӈэдалёсь тара.
Корр: Варвара, пыдар Я’ малкана соянась, таняна мюсерта ненэцие поӈгана иленась. Теда ӈарка яхана мюсерта’’ ненэцие’’ поӈгана илен’. Хурка илевара’’, таняна саварка, тюку яхана саварка? Ихинянд хурка?
– Сава, мал сава. Тайна савась, тюкохона ӈани сава, вэвкода яӈгу. Мал ӈопой, ӈобтикы тэхэна иле. Тайна ӈани тэхэна иле’’. Тюкона мякна иле’’, тайна ӈани мякана иле’’. Ӈодь тына’’ сава ӈэя’’, нина’’ сенз ӈэя’’. Ӈанида’’ нядана’’ пере’’.
Тарем’ ненэцие нина’’ харто’ яханандо’ иле’’, тыдо’ пэрць мюсерӈа’’. Ямдо’ сахарамби’’, нюкцидо’ вадамби’’, илан’ маймби’’. Тад’ нерня ӈод’ ябда илея”.
