Носиндалава ирийна юдимдей’ толыркад самлязимдей яӈганя толыр’’ ӈэсонд Санкт-Петербург маркана ӈарка ма’’лёва ваерась. Таняна хуркари ӈэрм яхад’, ӈэрм’ тенз’ мэта’’ ненэця’’ мю’’люрӈаць. Тюку по’ институт народов Севера синдтет ю’’ самляӈг пода паны.
Таӈок по’’ ямбан ӈока’’ ӈэрм’ я’ тер’’ хибяри’’ таняна тоходанаць, теда ӈод’ маня’’ ӈацекына таняна тоходанвамдо’ минредо’. Харто’ институтандо’ ӈарка со’’яма ялям’ мэ’’мась хибяри’’ ма’’лыць. Яндахат’ ӈокханда сидя юр’’ мян’ хибяри’’ товыць. Таймыр, Ямал, Хабаровский край, Саха Якутия республикахад’, Эвенкияхад’, Ханты-Мансийский округхад’, маня’’ округхадана товы’’ хибяри’’ таняць, хуний сяӈгова таняна тоходанаць. Хусувэдо’ таняна ня’’амвы манзаямда илеванда ямбан минредась, ханяӈы’’ тенад’ манзара’’. Мал’’ пыдо’ сейханандо' тикы мякана тохолкова’’ подо’ лэтбидо’, ӈодьбянда ихид’ миндя вадидо’’ хэтвась ӈарка март’ товыць. Теда институтхана тоходанна’’ ӈацекы’’ ихиня’ сомбой концерт’ хамандаць, тоходанась’ мэта аудиторияхато’ мядонда’’ тюӈгаць.
Ӈэрм яхад’ товы’’, хуркари’’ тенз’ мэта хибяри’’ конференциям’ мэ’’ӈаць. «Реальность этноса» нюбета Международной научно-практической конференция’ РГПУ имени Герцена мякана маля си’’ивумей’ яӈганямэвна ваерась. Манэ’’сармы темадо’ тарцясь: « Роль образования, культуры и литературы в формировании российской гражданской идентичности.» Тамбир’ ма’’лёвам’ РГПУ ректор Влерий Соломин нэдась, тамальӈгана тарця вади’’ хэтась: -Таӈок по’’ ямбан ӈока’’ ӈэрм’ яхад товы’’ хибяри’’ институтм’ ёльцець, ӈокаювдо’ харто’ яханандо’ хуркари’’ ӈарка манзаи’’ пэртяӈэ’ тара’’, общественной организация’’ манзаи’’ нерня минре’’. Харто’ ямдо’ мэнена’’, тенева’’ хибяри’’ тюкохона тоходана’’.»
Теда институтхана манзарана’’, таняна тоходанна’’ ӈока сейхад’ миндя’’ вади’’ намдаць. Чукоткахад’ Член Совета Федерации Федерального Собрания РФ Анна Отке; Государственной Дума депутат’, Всероссийской ассоциацияна президент Григорий Ледков, Ямалкад, Ненэцие’ округхад’, нНысма’’, Бурятия, Саха (Якутия) республикахад’, Мурманской, Сахалинской областьхад’ товы’’ ерв’’ лаханаць.
Институтхана ӈока’’ по’’ ямбан манзарана’’ тохолкода’’, ӈока’’ специалист’’ тохолавы’’, ӈарка ассоциациява нядабада’’ КМНСС, ДВ РФ ассоциация медаль «За верность Северу», почётной грамоты’’ ня’’амаць.
Таняна ӈокавна харто’ вадидо’, культурыдо’ лэтбава нямна лаханакурӈаць. Ӈобкана ма’’лась тасалкуць ханзер’’ тены’’ пиркана вадам’ сахарамбава е’’эмня нерняна манзарабна тара’’. Тены’’ похо’’на хусувэва’’ маниеданё: ӈацембой хибяри’’ поӈгана вадам’ теневана’’ хибярина саць’ тянё’’. Пудана’’ похо’’на Герцен’ нювм’ нюбета университетан’ тоходанвась тянё ӈацекы’’ миӈа’’. Ӈокаюв’ таняна тоходаннина’’ вадамдо’ ехэрадо’. Вадава нерня минрева’’ серкана тоенана’’ серуна тамна ӈока’’. Санкт-Петербургхана ваеравы конференцияхана юнета’’ паднана’’, учёной’’, учебник’’ падбада’’ хибярина ӈокавна лаханаць.
