Нянэй ненэця’’ тыбэрма’ сер’ хавна маля ӈахэт’ хуркари’’ луца’’ манзаи’’ торумдаби’’, тарця манзаяха’ тоходана’’. Тикахад’ илевандо’ ямбан ивняндо’ ӈэда’’ манзаяханато’ манзара’’. Тарця хибярина округханана ӈока’’.
Тамна тарця хибярина таня’’, хуний маня’’ яханана соявы’’, вадювы’’, тоходанвы’’. Школамдо’ ёльцесь тамна нерня’ тоходанвась ӈани’ ян ӈэдалавыд’.
Тикахад’ ӈани’ маркана институтм’ ёльце’’махадандо’ поӈгана харто’ яхандо’ тось манзаядамдо’ хось я’’амсеты’’. Маня’’ ӈацембой нина’’ манзаядамдо’ пюрць ӈани’ ян’ ӈэдаласьтыд. Таремъюв’ хэвы’’ округна хибяри’’, теда хэтась тамна Я’малкана, Ханты-Мансийский округхана, ӈани’ Ӈэрм’ яхана иле’’. Ханяӈыдо’ маля ӈарка хибяри’’, ни’’ манзара’’. Манзарась’ мэ’’мы я’ харто’ яхадандо’ хаясь.
Таремъюв’ округхадана сяӈгова Юрий Лукич Выучейский’ хаясь. Тикы’ лекарь’ хасава институтм’ ёльцесь ӈока’’ по’’ ямбан Ханты-Мансийский округхана манзарась. Илевада тарцясь. Юрий Лукич перенида’’ теда ӈод’ Нельмин’ Саляхана, Няръяна маркана иле’’. Си’’ив юкад’ вата по’’ тяхана, сайнорма’ по’’ мальӈгана Нюдя я’ выӈгана неняӈг’’ ирий нябимдей’ яӈганя толыркана хасава ӈацекы соявысь. Тамальӈгана хибяхарт’ хойхана илена хибяри нивакы ман’: ӈарка лекарьӈэ’ хэвндя хасавако соянакы?! Мята’ тер’’ соявы ӈацекэмдо’ Юраӈэ’ нюмдедонзь. Нянэй мякана вадюданвы хасавако саю’ по’’ тоенана илм’ маниесь, сайнормахад’ хаӈгурць’ турмы ненэцие’’ ядтабись. Сава ӈацекэӈэ’ вадюданась, харта ямда сяӈась. Хусувэй яхана илена’’ ӈамгэм’ лэтбасьты. Нюдяко ӈэванда мальӈгана яӈгон’ еримы’’ я’ сармикм’ нэкалпасьты, томда мальвы тиртяко’ мяканда тэврабсеты, тикахад’ савумдабгуда. Сырцеты ханзер’’ тыбэртя’’ хаӈгурта тыдо’ савумдабсеты’’. Нара мальӈгана хусувэй соявы суюкоцян’ маймбасьты. Си’’ив покоцянда панась Юрий тоходанась’ пядась. Мер’’ толанзёсь, толаӈгось, паднась тухусь. Школахана тоходанванда мальӈгана маля теневась – лекарьӈэ’ тухуда. Ӈодьбянда, школанда’ пуд Омск’ март’ хаясь, таняна медицинский институтхана’ тоходанась пядась. Тоходанванда поӈгана армиян’ хан’’ӈась. Институтхана тоходанась нелеяць. Институт’ пуд Юрий Лукич пухуцянда ня’ манзаравась Ханты-Мансийск’ март’ хаяхась. Пухуцяда Августа Семеновна ӈобтарем’ лекарь, тив’’ сулурпадаӈэ’ манзарась пядась. Юрий Лукич хирург. Манзаямда теневана, мэнена хасава илеванда ямбан харвабтана манзаямда нидась’ хаебю. Нита’’ поӈгана сава манзараӈэ’ пилибт’ толысь. Манзараванда мальӈгана хуркари’’ саӈговота операции’’ сертабасьты. Ӈока хибярим’ савумдась, ӈока хибярим’ саӈговота хабцяӈгад’ нэкалӈась. Юрий Лукич илеванда ямбан тоходанась, манзаянанда тарана литературам’ пилибт’ толабасьтыда. Харта ӈод лекарь’ манзаянда нямна научной манзаи’’ падбись.
Ӈани’ округхана илесь, манзарась Юрий Лукич сейда’ пилибт’ харта соявы янда нямна няркнасьты, харта яханда манзараван’ харвавакы. Валакада нянэй ненэця е’’эмня манзая’ яӈговакы. Тарем’ невхэна ӈока’’ лаханасьтынё.
Тарем’ ӈод лекарь’ нява ныланаванда мальӈгана харта яханда турцеты, Салян’ тэворцеты. Харта яхаданда хахаярка мэва е’’эмня Юрий Лукич Печора март’ илевась’ тэввыць. Таняна илена’’ хибяри’’ ӈод манзаямда теневана ненэцян’ маймбась ядсеты’’. Хусувэй хибярир’ теневась, тикы лекарь’ ив’ ер манзарана, хибярим’ савумдаӈгуда.
Юрий Лукич Выучейский Печора маркана яӈгумысь, таняна сюры. Пухуцянда няюв’ сидя нюмди’ вадаӈахась. Не нюди’ Елена небянда’ тотрев тив’’ савумдамбада лекарь, хасава нюди’ Виктор луца вадавна хэтась - военный лётчик. Юрий Лукич пуданда’ хаювы сарпяда нюдя’’ ни’’ӈа.
