Хуркари манзаяхана ӈокаюв’ хибяри’’ харто’ минрена’’ манзаидо’ харвась’ минресьтыдо’. Тарця хибярина поӈгана тохолкода’’ тянё ни’’ӈа’’. Тохолкода’’, хуний ныхыдо’ малӈэ манзаяхандо’ масьтембсетыдо’. Тарця тохолкодидо’ ӈацекы’’ ӈод школамдо’ ёльцесь пон’ тамна тенесетыдо’, ханяӈы хибярир’ тохолкодамда илеванда ямбан тенеӈгуда.
Тарця тохолкода’’ хуркари’’ яхана таня’’, тарця тохолкода’’хуркари’’ тенз’ мэта’’ ненэцие’’ поӈгана манзара’’. Ӈопой тарця хибяри Саля’хардахана илесь, манзарась. Тикы нянэй ненэць Семён Михайлович Окотэтто’ ӈэвысь. Я’малкана соявы, таняна школамда ёльце’’махаданда тохолкодаӈэ’ Ленинград маркана тоходанвысь. Тохолковамда ёльцесь манзаравась округанда еркы март’ товысь. Тикахад’ ӈока’’ по’’ ямбан ӈацекы’’ няюв манзаравысь. Пудана’’ похо’’на ламба’’хана сюрберта’’ ӈацекы’’ тренерӈэ’ тарась. Харта тарця серкана ныхы’’ӈась, мастер спорта ӈэвысь. Ӈацекы’’ няюв ӈод ив’ ер манзаравысь. Тарцям’ тенесь, теда пыда тохоламбавы ӈацекыда маля харто’ ӈарка хибяриӈэ’ хэсь, ханяӈыдо’ харто’ тренерӈэ манзара’’.
Семен Михайлович Окотэтто маля ӈока по’’ тяхана яӈгумась. Тарем’ ӈод тохоламбавы ӈацекыда тохолкодамдо’ тенедо’. Теда пыдо’ тохолкодандо’ нювм’ илелътембидо’. Маля си’’ив яӈганя по’’ ямбан’ Саляхардахана Семен Михайлович Окотэтто’ нюв’’мана нюмдевы пирдырма ваерасьты. Сырэйӈэ’ хэсь пирдырма ваерасьты. Ӈацекы тикы яляхана ламба’’хана сюрберцеты’’. Тарця пирдыр’’мам’ Семен Михайлович тохоламбавы ӈацекы’’ хамандабидо’. Тюку по’ ӈод тарця пирдырма ваерась.
Мань’ Саляхардахана мэван’ мальӈгана таняна мэдамзь. Ӈацекы’’, ӈарка хибяри’’ хуний тохолкодамдо’ тенена’’ ламбахана сюрбермась товыць. Тарця пирдырмам’ сертавы не Людмила Булыгина, спортивной школа ервотаӈэ манзарана. Пыда нян’ тарця вади’’ хэтась: – Семен Николаевич Окотэтто маня’’ тренерма’’, тохолкодава’’ тенева’’. Пыда саць’ сава хибярись, сава тохолкодась. Нисярхава ӈэсьты, сидна’’ сяньзьты, хусувэй ӈамгэхэна нядабасьты. Маймбасьты, ся’’ня маня соревнованияхана нердесьтыва. Тохолкодава ихиня пилибт’ илеӈгу. Хусувэй по’ носиндала ирийна пудана яля’’ пир’’кана ма’’ласьтына’’. Тюку по’ ӈод пидырмава ваерась. Семен Николаевич пухуцяда Елена Николаевна Окотэтта мя’’ата терсавэй тюкон’ тосьты’’. Соревнования’ пуд сяйзятыва’’, тохолкодава тензебтесьтыва’’. Тикы’ пуд ихиняна сава ӈэсьты.
