Я’ сяр ниня’’ ӈудидо’ мэта’’ хибяри’’ ханярина иле’’. Харто’ яханандо’ манзара’’, ӈацекыдо’ хари’’ ӈудаха’’нато’ манзарась’ тохолаби’’. Тарця тохолкода’’ ӈопой яхана нисьты’’ ӈамдю’’.

 Харто’ мэбе’’мамдо’ манэ’’лабтавась’ ӈани’ ян’ тэворцеты’’. Хусувэй ян’ тэвась мастер-класс’’ манэ’’лабтабасьты’’. Маня’’ округхана ӈод’ мел’’ хибяри’’ турцеты’’. Хаювы по’ Саля’ хардахад’ Александр Сотруев турӈась, пыда ӈацекына няюв’ манзарась. Тюку по’ ӈани’ Якутияхад’ мел’’ хасава, лэвна матурана’’ ненэць’ Гаврил Гаврилович Постников турӈась. «Мел’’ манзарана’’» мякана сян’ яля’’ ямбан социально-гуманитарной колледжхана, Ненэцие’’ аграрно-экономической техникумхана тоходанна’’ ӈацекы’’ няюв’ манзарась. Турмы’’ мядондава’ Якутск’ маркана технологии и дизайн колледжхана манзара. Тарця мякана декоративно-прикладной творчество, народные промыслы отделение’ манзаям’ нерня минренаӈэ’ тара. Таняна тоходанна’’ ӈацекыта’’ няюв’ ӈокавна манзара.

Гаврил Постников мел’’ хибяри’’ мякана соявысь. Нисяда пявна’’ матурана ӈэвысь, саць’ мел’’ хасаваӈэ’ толювысь’. Небяда ӈод’ хусувэй сертабада манзаямда’ мел’’мана’’ пэрмэдась. Нюди’ тарцям’ маниесь, харта харвабтана серта’ ӈадимысь. Лэвна’’ матурась’ пявэдась, тарця серт’ тохолкодада тэвравэдась. Школанда’ пуд Якутскхана училищем’ ёльцевысь. Харта манзаида малӈэ’ лэхэд’ мадабида’’, тарця серт’ харвась ӈацекы’’ тохолаби’’.

Няръяна маркана мэванда’ мальӈгана Гаврил Гаврилович маня’’ ӈацекына’’ лэвна’’ маторась тохолабидась. Манэ’’лабтадась хурка’’ лэхэд’ хурка’’ манзаям’ сертась’ саварка. Харта тэвравы’’ манзаида’’ тоходаннаха’ манэ’’лабтась.

Тарця мел’’ хасавам’ Няръяна март’ этно-культурный центрхана манзарана’’ нина’’ хаӈаданзь’. Яханана лэвна’’ матораван’ харвана’’ хибярина таня’’, пыдо’ тарця серт’ тоходанван’ харва’’. « Мел’’ манзарана’’ мякана едэй кружок’ манзарась пяӈгуда, ханяна ӈацекы’’ лэвна’’ маторась’ тохолабгудо’. Харвана’’ таня’’ турӈая’’.