Невхы похо’’на хойхана мюсерта’’ ненэця’’ хардахана илена’’ хибяри’’ тотрев’ едэй пом’ нисьтыдо’ ядтабю’’. Едэй по’ со’’ямаӈэ’ хаяр’ нюртей сэв’ тарпвам’ мэцьты’’. Хойхана ӈэрёй’ ямбан хаяр’ сомбовна нисьты тарпур’’, ӈарка пэвдэй ириян’ тэвась пихиня’ ялэ’’, пи’’ ямбан’ пэбсеты’’.
Таӈок’’ яля’’ ямбан хаярэком’ нись’ мание’’ хибярина хаяр’ тарпва ёльцян’ тэвась, хаяр’ ӈадимям’ ӈатесетыдо’. Тад’ мякад’ тарпась, хаяр’ нюртей сэвком’ сэвтэсь, хибярихина’’ ӈарка маймбцо’’. Хойхана мюсерта’’ ненэця’’ хаярм’ тарпвам’ манэць маймбасьты’’. Хоян’ едэй ил’ тонарха’ ӈэсьты’’, едэй пом’ мэцьты’’. Хаяр’ – ил’ ервӈэ’ нюмдева’’ пир’’. Хусувэй хибяри тенева: я’ ниня хаяр’ нибнанда ӈадив’, тикахана ил’ яӈгуда. Ӈобкарт’ хибя’’ хаярци’ илесь нида’’ пират’’. Хойхана ӈод’ хаярм’ ёльце ӈатесетыдо’. Маня’’ ӈод’, тены’’ илӈгана хаяр’ товам’ ӈарка яляӈэ’ мэ’’ӈава’’.
Лимбя ирий’ си’’ивумдей’ толыркана туристической центрхана нянэй ненэця’’ хаяр’ ядабтавась ма’’люрӈаць. Ксения Филипповна Явтысая нида’’ ма’’лась, хэбидя яля’ ед вади’’ мэ’’ӈась. Невхы похо’’на хойхана мюсерта’’ нина’’ хаяр’ тован’ саць маймбасьты’’. Матрёна Ивановна Талеева тикы нямна тарця вади’’ хэтась: - Тюку яля’ ненэця’’ ватовна тарем’ масьты-
едэй пова маня’’ лимбя ирий си’’ивумдей яляхана мэцьтыва’’. Ненэця’’ тарем’ невхэт’ тасламбэй. Тикахана маля хаярэцяда тю’’уня ханта, масьтынё: - тынзя’ пир’’мана тю’’у ӈади. Тикахад’ едэй по’ ӈадимя. Сырӈада’’, ялякода тюку яля’ ёльце сава. Хойхана илеб’, ӈэдалёб тарця яляхана сейхана маймбцо. Тюку яля’ маня’’ ӈод тарця ӈарка ялям’ мэ’’манзь ма’’лэйна. Ксения Филипповнана мякна сяйндава’’, едэй по’ това нямна, хаярако’ нюртей тарпва’ нямна вадина’’ мэтава’’.
Корр: Пыдар хойхана вадювы нен’, невхы похо’’на хойхана илеванда мальӈгана хаярм’ ядабтабсетыда, тенер’ тикым?
- Тамальӈгана ӈацекэва’’. Хадунана’’, иринана’’, небянана’’, нисянана’’ едэй хаяр’ товам’ ӈатесетыдо’. Тикахад’ хоян’ едэй ил’ тона’’ то’’олха’ ӈэ’’нив. Хаяр’ нюртей сэв’ манэць, тикы’ пуд ялякода мер’’ нерняри’’ ханта’’. Пихиня яляркаӈэ’ хантангу, хаяр’ хусувэй яля’ тю’’у минда, ибаркаӈэ хантангу’’.
Едэй пом’ пи’ сяхарт’ нисьтыдо’ мэс’’. Хаяр’ сэвамда манэ’’лабтаӈгуда, ти’ ӈани сава. Едэй ил’ то, едэй пом’ пява’’.
Корр: Хаяр манэ’’тан ӈамгэм нянд’ тэвраӈгу?
- Тюку яля’ хаяр’ тарпвам’ манэ’’ӈава’’, хаярэкон’ маймба лаханаваць. Маня’’ яханана хусувэй ӈавуна саваривна миӈая, хусувэй хибярива сенз’ ӈэбнанда, вэвко сер’’ яӈгобнандо’. Тына’’ хадырць я’ сава ӈэбнанда, ӈаврадо’ танябнанда. Ӈэрм яханана ябда илебнана’’, нина’’ нядабась илебнана’’.
Нянэй ненэцяӈгана лимбя ирий си’’ивумдей’ толыр’’ хэбидя яля’, хаяр’ това яля’, едэй ил’ нэва яля, едэй пом’ пява яля’. Едэй, сидя ёнар’’ маттамдэй яӈганя по’ то’’. Нерняна сидна’’ едэй ил’ ӈате’’, по’ ямбан хусувэва ябда илея’, ӈока сава сер’’ манзаяхананда сертая’. Илан’ маймбась хусувэй ялява’ мэкава’’, сава ихиня’ хусувэй товы’’ ялям’ ядтабхова’’.
