Хэвхы округхана илена не’ Нейко Янгасова сян’ по’’ тяхана тарана книжкам’ падась. Тикахана ненэцие’’ вадако’’, ярабц’’, сюдбабц’’ ма’’лавы’’. Тикахана падвыда мань’ янамбовна газетаханана падбасьтын’. Тюку яля’ « Ӈэ’’ли ӈая тар’’» сюдбабц нюртей’ пелям’ толада’’.

Сэвани’ тяхад няхар’’ ӈая тар’’, няхар’’ некав си’’ми вадавы’’. Си’’ив’ хункана, яля’ хункана Сюдбя вэсако ирив иле. Сюдбя’ си’’ив ню тидин таня’’ ни’’им’. Сюдбя’ не ню няв танява. Ӈари’’ маньзяван Ӈэ’’ли ӈая тарм’ тэри нюбе’’ӈадм’. Мядома яляхана тидя’’ турцеты’’, нея тосеты. Няхар’’ неками ялэ’’ хонёсеты’’. Хоё няюмна пыдо’’ ханесэхэвадо’ илебця’’ ӈэӈгу’’, ненэця’’ ӈэӈгу’’. Яво’ няю’ ханлиб’’нандо’ ӈарти хадасеты’’, няко ханецеты’’.

Ся’’ны ӈэбта ӈод’’ няхар’’ ӈая тар’’ яля тюку яля’ пыдо’ ӈэвадёвы’’. Хар’’н ивняни пи’ някумна ядэсумбидамнё’’, ӈаво’’ пирка’’на яв’ маран’ саӈов хэвы. Нер’’ тяхакуна нивэв хамэда’’. Сюдбя’ си’’ив ню ю’’ тибя ӈано теда’ нултэй’’. Мят’ тюваханахара вуни таня’’.Теда’ тюку яля’ Сюдби’’ не ня нея нивы ту’’. Ихинани мадм’: - Мядомари ӈод’’ малда танява, ӈани яляхана пыда тутнакэ. Наӈэдя си’’ивандо’ тидя’’ мадоӈа’’нё’’.

Си’’ив ӈэсоӈгана такы мято’ ня хамекулыд’’, пыдо’ тарем ма’’: -Пыдамбора’’ ӈод’’ мядонзь турӈада’’. Няхар’’ ӈая тар’’ манзь ханадо’: - Ӈа’’, тобцакэва’’. Тикаринда ӈод’’ Сюдбина’’ ӈано ю’’ тибя ӈано идм’ лядапа хамб пудабта.

Тидин хэ’’мяхад пон’ нива’’ иле’’. Ӈацета ӈод’’ няхар’’ неками ханериб’’нандо’ си’’ив сян яля’ пыдо’ яӈгосеты’’. Теда’ тюку яля’ пон’ нивы’’ хане’’. Ханени’’ни ӈаном’ манэ’’лихива иками паӈгаць Ӈэ’’ли ӈэбцахани нэкал’’ нивав’. Мань тэварись ӈаркан’ маран’ пулм’ вэӈгала’’. Тарем’ сырпа’’ни Няхар’’ некани ӈано пана’’мы, ялриндо’ хора’’, тикы полихина сидя ябта Ӈацьм’ мань манэ’’ӈадм’.

Пыдъеди’ӈод’’ сава мирбиди’ ёць ӈо’’ ё’’мыди’ хадри’ ӈэсь ӈо’’ пон’ нёдавэхэ’ нер’’ ӈэдакэхэ’. Ив ядэлы’’: -Сюдбя вэсако ирин мэӈэ лэтамбабани саваха’ ӈэвэхэ’.

Тикаринда ӈод’’ манзь ханав: - Сидя ябта Ӈацьм’ Сюдбя ирин ӈуди’’ терӈэ харваӈахаюн.

Ӈарка неками, ӈарка ӈэбцаханда пыда тарем’ ма: - Пиркавабат вэва вуни ӈа’’.

Сидя ябта Ӈацьм’ сидя марцяхат нэкалӈахаюн. Такы мя’’лихини ӈодри’ тэвыв’’. Сидя ябта Ӈаць тарахалпананди’ пя саларахаха’,ненэсянда ӈод’’ сацярка са’’мэхэ’. Тикы’ тяхакуна тарця яебтярм’ мань пэрмэдм’ вунсядм’ ӈа’’. Ӈавормахана хара вуни таня’’, теканда хонэйна’’.

Хуняӈы яля’ няхар’’ неками тидин мят’ мядоманзь хамеку’’лавыд’’. Ӈабцата ӈо’’ тикы’’ тяхакуна хумна сырмэдм’, сававна нисятвэв хамэда’’, си’’ив тибя ӈано, Ӈая тари’’ӈано яв’ хухат мивы’’ ӈэвы’’, матадм’ лавта ӈано ӈэривы.

Ӈано’’я’ мю’ ханяна ти’’. Няхар’’ нинеками, няхар’’ Ӈая тар’’тад нэкал’’мандо’ си’’иво’’ хамб’’ нимня ӈано хынворӈа.  Мима’ ямбахана ӈано’ пыяхана сисёри харулы’’. Тайна хунана’’ ханяна тэв’’.

Нултава’’, няхар’’ ӈая тар’’ сюдбя’ си’’ив ню мядо’’ няю’ пыдо’ ханя’’ хань’’. Маньехэван ваӈгари я’’мана варцядтев. Сидя ябта  Ӈаць нена’’ хэнамбихи’. Пыди’ манзетыхы’: - Ӈая тар’’ то’’олахан нена’’ нин ӈа’’, мэтар яляхаван’ ӈули’’ харвани’, сидани ӈэдара’’.

Ив ядэлы’’, мань тарем’ мадм’: - Пиркавабати’ ӈули’’ӈо’’ хаяди’.

Тикаринда’ӈо’’ ваӈгари я’’мана пыди сюрбаяха’. Тайнани’ хунанани’ тёрсавэй’’ Сюдбя ирини мят’ тюдамнё: - Ирикэхэюн хадакэхэюн мэкацядамди минредамзь, хади’’ни поӈгад  ӈэдараӈахаюн, ӈахакавахана ниванӈгабяха хань.