Ты сие ниць’ ирийна нертей яля’’ пиркана округна еркы маркана нянэй ненэця’’ сян’ ма’’лёвамдо’ мэ’’ӈаць. Нертей яляхана ӈэрм ненэцие ма’’лёй ваерась. Мэта ирийна нябимдей толыркана «Сямянд’ меретахана» хойхана мюсерта нина’’ пирдырмам’ маниеваць. Тикахад’ тюку ирийна няхарамдэй яляхана «Ясавэйм’» нюбета ненэцие’’ ассоциацияна ма’’лёвам’ мадаваць.
Маня’’ яханана «Ясавэйва» маля сидя ю’’ мат’’ по’’ ямбан манзаямда минреда. Ӈэрм’ тенз’ ненэцие’’ хусувэй серкана нядабава’’ е’’эмня таӈок’’ по’’ тяхана ӈадимдевысь. Сидя ю’’ мат’’ по’’ ямбан ӈока ма’’лёвидо’ мэ’’манзь ма’’люрӈаваць, ассоциацияна манзаям’ нерня минренаӈэ’ мат’’ хибярива манзараць. Тюку ирийна няхарамдэй яляхана «Ясавэйна» ӈоб’яӈганя съездхана манзараваць. Округна ӈэсыхыт’ ассоциацияхад’ перена отделения’’ манзаи’’ пэртя хибярина турӈаць. Тет’’ юкад вата хибяри’’ теда ваеравы съездхана манзаидо’ минрець. Ханзер’’ ассоциациява ваеравы няхар’’ по’’ ямбан манзарась, хурка манзаи’’ таняна манзаравы’’ нина’’ сертавыць? Тикы нямна ассоциацияна манзаям’ нерня пэртя Владислав Песков вадам’ хэтась. Тикахад’ Советхана манзаравы нина’’ лаханаць. Виктор Вылка ӈацембой хибярина няюв’ манзаравндаӈэ’ таславысь. Пыда хэтвы вадахаданда намдаваць ханзер’’ ӈацембой нина’’ няхар’’ по’’ ямбан манзараць. Юлия Ледкова ненэця’ вада, культура манзаи’’ ассоциацияхана минресь. Сертавы манзаядо’ тянё ни’’ӈа’’.
Ревизионной комиссия’ манзаравамда ваде’’ӈась. Тикы’ пуд ассоциацияна Устав’ несэюмдавам’ делегат’’ манэ’’сарӈаць. Ханзер’’ округна ӈэсыхыт’ товы’’ нина’’ ассоциацияна манзаравам’ маниедо’, хурка’’ манзаи’’ нерняна сертабась? Тикы нямна харто’ вадидо’ яндахат’ товы’’ ненэця’’ мэ’’ӈаць. Тюкумэвахана ваеравы ма’’лёвахана делегат’’ поӈгана несэй хибяри’’ таняць, хуний харто’ ӈэсынандо’ ассоциацияхад’ перена манзаи’’ пэртяӈэ’ тэравыць. Ӈэсыхына манзарана’’ нина’’ ӈод харто’ манзаидо’ несэюмдаван’ харвэйдо’.
Ассоциацияна ваеравы съездхана Президентдава тэраваць’’, тикы манзаям’ нерняӈы няхар’’ по’’ ямбан’ Юрий Хатанзейский минреӈгуда. Советхана манзаравнда несэй ненэцие’ тэраць’’. Ю’’ хибярива’’ таняна манзаравнда Альберт Ардеев, Игорь Ардеев, Александр Терлецкий, Анна Лыченко, Инга Артеева; вице-президентӈэ’ тэравы’’ Сергей Талеев, Валентина Канюкова, Николай Латышев, Ирина Ханзерова, Ольга Каменева. Совет’ старейшин ӈоб’’ манзараӈгу, таня манзаравась’ нюмдевы’’ Пётр Ледков, Алла Гаврильева, Матрена Талеева, Ксения Явтысая.
Мэта’’ си’’ивна самлязимдей яля’ пэвсюмбы’ пеля мат’’ сясхана «Арктикам’» нюбета ДК мякана ассоциацияна маркы отделение отчетно-выборной ма’’лёва ваераӈгу. Таняна маркы’ отделение манзаравам’ ненэциена таслаӈгу’’, нерня манзаравнда хибяри’’ тэрабаӈгу. Маркана илена’’ хибяри’’ хибя пирпато’ таня тобнандо’ тара. Ханзер’’ маркы отделение манзаямда нерня минреӈгуда’’ няданда переӈгу’’.
