Вылка Татьяна Александровна округна Ӈарка яхана мюсерта’’ ненэцие’’ мякана соявы, хойхана вадювы. Хой’ илм’ сававна теневада, ӈамгахэрт’ нись’ пилюс’’ теда ӈод’ нянэй мякана иле.
СПК «Ерв» си’’ивумдей бригадахана вэсакода, сидя хасава нюдя, харта манзара’’. Валакада тараванда ёльцяӈгана Красноян’, Няръяна март’ тэворцеты’’. Тюку’ мэвахана пыдо’ мяд’ терсавэй «Сямянхат мерета» сянакован’ товыць. Таняна Татьяна Александровнам’ хомбивась. Пыда тюку’ мэвахана сырмась’ товысь. Сидя хасава нюда ныхыди’ хорпихись. Хасава’’ тэхэна’’ ӈэдалёрмахана Татьяна Александровна хасава ню’ Михаил нюртей’ местам’ ханась. Владимир’ хан’ тя санарта’’, сюрберта’’ поӈгана нердесь, тикахад’ санарта’’ поӈгана нябимдейӈэ’ хаясь. Небя ихиня тарця сер’ нив’ сава ӈа’’. Нюхуюда маниесь, маймбись. Татьяна Александровна Вылка хой’ ил’ нямна тарця вади’’ мэ’’ӈась: – Мань хойхана илем’. Нисяв’ илеванда ямбан тэхэна мэнаӈэ’ тарась, Небяв’ Мария Васильевна Талеева хойхана илеванда ямбан мюсерӈась, мякана илесь. Теда пода маля’’ ӈока’’, тарем’ ӈод’ та’ хойхана мэсьты. Вэсков’ Александр Васильевич Вылка ты’’пэртя, сидя хасава нюв’ Владимир няби Михаил теда хойхана манзара’’. Михаил нюв’, несавэй, нюсавэй хойхана мюсерӈа. Сидя ӈацекэмди’ хойхана вадюданаӈаха’. Володяв’ тамна нелэвдавэй, небой по’ техникум’ ёльцесь. Пода тамна ӈока ни’’ӈа’’. Мал’’ маня’’ харвась мякана илева’’, манзарава’’, тына’’ пэрӈава’’. Неӈэ’ хасавина нядабива’’. Маня’’ ӈопой мякана илева’’. Хойхана илева’’ саць сава. Манзаява таня, недбина’’ ёльцянда ня’’амарпина’’, теда сибирка недбя няюв. Нянэй мякана илева’’. Тяхакуй похо’’на ханзер илеса’’, тарем маня’’ ӈод илева’’. Неӈэ’ мякана манзаява тянё вани’’ӈа’’. Ӈавор’’ пиребаӈгун’, тэхэт’ товы нид’ ӈатеӈгун’, мякана иба ӈэва ӈани’ не сер. Мань сэдорасьтыдм’. Теда мэта панэв’ небян’ сэдвы. Нябю панэв’ таня, мякана теда хаевась. Сыва мэцьтыв’, тикым харн’ сэдавась. Хасавина’’ сэдорпива’’, ӈацекына’’ ембпива’’.
Хасавина мадак’’ мэ’’ӈа’’, пиви’’ мэ’’ӈа’’, мальцятасьты’’. Ханяӈэна луца’’ ембяркана ядэрцеты, ибарка яляхана тарця ӈэсьты’’.
Те’ ёльцяӈгана ма’’люрць сава, нумда ӈани’ вэва ни’’ӈа’’, маня’’ хуркари ялян’ торомбэва’’. Нянана’’ хуркари’’ яля’’ саварха.
