Хасуюдимдей по’ миӈа ханзер’’ сава паднана нява хэвханана ни’’иле’’. 2006 по’ вэба’’ ирийхана А.И.Пичков яӈгумась. Паднана нява хусувэй хибярина ихиня иле. Пыда падвы манзаида тенейна’’, теневына’’, толабина’’. Сидя ёнар’’ самлязимдей яӈганя по’ литература поӈэ’ таславы.

Тарця пом’ мэць этно-культурный центрхана манзарана’’ нина’’, «Илебц» театрхана сянакодина’’ маня’’ паднана’’ нина’’ падвы’’ манзаи’’ радиона толамбидо’. Алексей Пичков со’’яма ялян’ литературно- музыкальной композициям’ хамандавыць.

Алексей Ильич Пичков сававна теневана’’ ненецие’’ паднана. Соя” ма яляда хэ”нё таларава ирий”хи няхар’’ юдимдей толыр’’. Соя”ма яда итя ӈабтеня яв’ хэвхана ӈэда Канин’ саля. Ӈопой падвэхэнанда тарем’ лахана: «Сэр вы’ ями нохо’ хобадарев’ тэри ливарта. Яни’ ӈадахана (яни’ хэвняна) маньехаван’ илъеми’ яӈгу, пыдамбоховада мань’ сиципой’ пиртанакэда…». Тикы’’ вадида ӈэрм яримда вадець мэтида вуни”ӈа. Тикахананда ӈарка’’ сава ямда ӈани’ вадеc’’ нидав’: Россия янда’ хавна ненэся ӈани яхана иле вуньвэда пирас”: луца нида юрець (сава няӈэ мэць, поюто’ саваӈэ иле) манзаравы’’, паднавы’’, иле яданда пили’’ таслэвада нив’ ӈа.

Мань сёхон падбин пинд хубта нумгы”я

Хоёд, синдолта синю хой” ӈади”

Тюкоход варды вэцьдяку Луци” я –

Мань сейни’ я’ сырахат таӈгады.

Тяхад мал’ ям’ сисёхот моренава,

Ӈанихы ик” хамбида танаби.

Сёнзяв несэйда тад”ми ехэрава,

Мань пэдрев небяӈэ мэ”ӈам’ тальби,

Мань ӈадьбянда сяхарт’ хае я”мадма

Хоёд,

Нумгыд, ӈахат есабортид.

Тюкон соясь, тюкоход сён мэ”ӈадма

Луцит я’ ӈэрман’ –

Ян”а хубта тирт’!

Алексей Пичков харта ямда саць мэнедась. Сяӈок маркана илесь, пилибт’ харта янда нямна ида няркнасьты. Канинан’ хэсь еримбнанда, маймбасьты. Ӈодьбянда, харта янда нямна падвы’’ манзаида тянё’’ ни’’ӈа’’. Ӈопой тарця манзаяда «Ин’ то Ханин».

Хув’ ям’ илвы

Сён мерцяхад намд’’ нисявув’.

Сюнраха нувот пир’ ӈылна

Сарпяӈэ выл лэнзенава.

Хубта вармда – ехэрадма,

Сарпи” худ турмам’ – ярмедма…

Хари” явна ӈэни’ ядӈа”,

Ни”ни’ мяк” юни минедма.

Есаборць, сэрода яв’ ня’

Хаерад ӈыл’ сялкаданӈа”.

Нини’ ябто”, ламдикавна

Хонорко тось, вэркаданӈа”…

Тот насор” ӈуво пиделпа,

Мерцяда вэнзовна вывна…

Мал’ ялянд ӈылым’ мэнелман

Хэ”мяда тюкоход нив’ ӈа”.

Хари’ ямда мэневамда со’’ямаданда минредась. Яв’ вархана вадюданвамда, мюсермамда пилибт’ тенедась. Хусувэй яхананда таневы’’ ӈамгэмда сяӈадась, лэтбидась. Мал’’ тикым’ ӈод маня’’ теда падвы’’ манзаита’ тяха’ намдурава’’. Хибя’’ «Пыдар’ Ханинан’ хантан.» падвэмда ехэрада?

Пыдар Ханинан’ хантан,

Сэр” хабэвку” пидерман’

Янд таняна юнуй ӈув”

Путуламбна” сырид,

Янд таняна синёхот

Хубта ёт сяд” ха”ёлта

Янд таняна ямд вархым’

Синдаби” салабид.

Пыдар Ханинан’ хантан,

Маня” невхэва” мякна”,

Маня” сямянад” енабц

Ни”на” хэӈгха” тюӈгун

Ӈэва сэр” ӈарка Пэ’нид

Мал’ насортана сяканда

Пу”лё тир ӈэва’ ныдпа

Тиртяӈэ пенаӈгун.

Сямян” сюдбя пирцянд ни’

Ирт’ таняд танаӈгун.

Сидя хэвхад сидян’ ян’

Сидя ямл пенёӈгу:

Сэраку ямл тасина

Сэркад мал’ моресадӈгу,

Баренц’ ямд, туӈэ лэйна,

Ита салмкори ӈадьӈгу…

Паднана нява яв’ вархы’ ӈэсыхына Шойнана тоходанась. Невхы’’ похо’’на тикы ӈарка ӈэсы’ ӈэвысь. Таняна илена’’ хибяри’’ ӈокаювдо’ халям’ пэртяӈэ’ манзаравыць, ханисэйм’ ня’’амарпавыць. Ӈэсынандо’ халя’ заводдо’ таневысь, халям’ пэртя’’ ненэця’’ ня’’амвы халямдо’ приёмный пунктан’ тэврабсетыдо’. Няхар’’ ёнар’’ мян хуркари’’ тенз’ мэта хибяри’’ поӈгнандо’ сававна илець, ӈопой манзаям’ пэрӈаць. Нюдо’ вадабиць, хуркахарт’ манзаям’ ниць’ пилюс’’. Мал’’ тикым’ Алексей Пичков маниедась.

Шойна

Ӈани’ ямд хамба” илӈгаӈа” хойӈэ –

Ӈэрю няӈы” мерцид мяхада”.

Мань ӈэсыв, си”ми илбавы Шойна

Мэю харад таб” ни’ ӈамдода.

Харад”, ямд сэро” ӈыламзь хэдёймы”,

Мерци” тебхад хыноць ӈурабты”.

Сарю’ тиранд саӈгумла ламдёймы

Нумл поӈгояда няць нензабты.

Ямл, ханзели” хамбахат морэрӈга,

Сисюӈэ мара’ нид пенаӈга,

Сянакулван’ пирибтина” вэрна”,

Сянако, мал’ ӈэсыр хыно”ӈа.

Ӈани’ ямд хамба” илӈгаңа” хойӈэ –

Ӈэрю няӈы” мерцид муно”лыд”.

Хибярид сём’ нивы” мэс” нянд, Шойна,

Сёмд хана, теда’ харт хыно”лын.

Нянэй ненэця’’ илевадо’ нянэювна тэхэт’ пере’’. Ты’’ хойхана иленаха’’на сямянд’ таранадо’. Ты’ ненэцям’ ханяримна ядэлада, ембпида, ӈавламбида. Ты’ хибярин’ маймбцом’ тэврамби. Хойхана мюсерта’’ нарам’ маймбась ӈатесетыдо’. Тамальӈгана хойхана сую’’ сояӈга. «Суляко» нямна падвы манзаямда толара.

Ӈэда ябта су”лякоця,

Ӈэда сата, мора ябта,

Лэр тамна саць нерукоця,

Ӈарка недам’ пялц тарабта.

Лэтмбим’ сит… Поя хадыр”ма.

Ӈамдэ” тэвры, яр нядэй”ӈа.

Мань мале хубтан’ серт’ сырӈам’.

Нямд” вадёя”ма ламбэйӈэ.

Тоба” мер’ ярводаная”,

Нявота мэць тараӈгу”ма.

Тобахат макабтахая”

Сыра” нян сюдабтёӈгу”ма.

Пуна, сяха’ мэбетаӈэ,

Яромбэй тэӈэ хэ”мяхад,

Варю” нимня нэкалтами’

Синюӈэ илерта яханд.

Ханан’ мядонзэй, газета,

Юни” падар мань пэндадма.

Лаптандер” юни ӈате”ма,

Анна Вылка – телеграмма,

Сэдорони” сэдонзэйӈэ

Тохосод ӈо” таняӈгу”ма

Хибярид мал’ иаймба тейна,

Теда’ тамна – су”лякоця

Ӈэда сата, мора ябта,

Лэр тамна саць нерукоця

Ӈарка недам’ пялць тарабта.

Ӈэрм’ яхана ӈока’’ тарця хибяри’’ иле’’, хуний нидо’ хуркари’’ серкана нядабасьтыдо’. Мят’ товы хибярим’ сава вадахана ядабтаӈгудо’, сяйлабтаӈгудо’, сеӈгцянда яӈгоб’ мякнандо’ хаеӈгудо’. Теда ӈод’ тарця ӈэсьты. Ӈэрм’ яхана сава няси’’ ил’ яӈгу’’ нив’. Тарцям’ хамадабась ӈэрм’ хибяри’’ иле’’.

Ян хобадярки нин.

Тюку янд сей” лата нёдрев’ няӈгры”,

Пирця вакна сёнзя” ӈод” ни” паӈгрю”.

Пи’ нён’ тойбтад” – мят’ сит тюлеӈгу”ма

Пинда еркна столмдо’ тётеӈгу”ма

Мын’ терм’ нянд тата”ма пирця хойӈэ,

Мядонданва, нылаӈгун, пэдёй ӈэб’’.

Хуво” няна мал’ поморанд мядндер”

Иркнанд тутӈа”, пирця хой’ ни’ нямдре,

Сехэрэмд нянд тидпой” табадамбӈгу”,

Тикахад тасий мят’ ха”мотанӈгу” …

Есо мярба, мерця”яд сарвырта” -

Нясипой” ӈуци” ӈо” тэмзва’ пирва.