Хусувэй хибяри’ тэри тарця ялута хавна тяхари тарана’’ хэбидя ялуда танясеты’’. Мань ӈод тюку похы май’15 ялям’ ӈарка юбета яляӈэ таслав. Тикы яляхана тюку по’ си’’ивъю самляӈг пов паны. Ӈацекын (Егорко хавна. Пыда экзаменхата хамеку.), меяков, ийков мал’ ма’’лэядаць. Тев мальӈгана Москвахад ӈэдалава пирка”на мэманзь. Тикы яляв саць маймба мэ’’ӈаваць.
Ӈобкад пере нита пуд юбилеян’ нямна ӈэда’’ саву’’лана вада’’ турць пядо’. Ним’ яляханан теневанахат, переняхатан, Надя неняхадан, непапакоходан ӈока сава вадам’, саву’’лавам’ толаманзь, хавоха’’нан намдаманзь.
Мобильникувна нюм яляханан Е.М. Талеева, М.Я. Бармич лаханаӈаханзь. Елена Михайловна ня’ ӈобкана вадюбэйни’. Мария Яковлевна хуркари серка’’на нядаӈгосеты, нябакорахав ӈэсеты.
Теневанахат сямянхат нюртейӈэ Ю.А. Талеева, округхы газетахана манзаранава’’ саву’’лана вади мэ’’ӈась. Саць няркнана мэцэй некоця ӈэвы. Выӈгы, маркы, ӈэсы’’ нямна ӈэда ӈока юнм’ хибярихи’’ тэврамбада не.
Мал’’ хибярихи’’ Ӈарка вадам’-спасибом’ ӈэдарабидм’. Ив хаселабтада’’, сейкоми салмрада’’. Нянанда’’ харвабта тамна таралтыв’. Нись ӈаха’’на «Ханебцё’’» группа е’’эмня едэй пьесам’ падаманзь. Ӈэлов ӈацекэця’’ «Ненэй вада» учебникм’ ӈудаха’’нандо’ ня’’амбаӈгу’’.
Яӈга Ӈарка вадам’ И.Г. Фёдорован’, маня’’ округна’’ губернаторан’ падбидм’. Игорь Геннадиевич хусувэй праздникхана юн падарм’ ӈэдарасеты, ӈани ханяӈэхэ’’на мероприятиян’ ханзеты. Ӈока хибяри’’ поӈгана си’’ми нисеты юрбю’. Совет Федерацияхад нян И.В. Кошин няби О.Ф. Каменева саву’’лана вади ӈамнелада мядонзэйсавэй ӈэдараӈаханзь. Нянди’ ӈарка вада.
Хусувэй хэбидя ялян’ савута’’ вади Р.Ф. Галушина, Н.В. Подшивалова, тохолкурма’ ӈартаха’ ӈэдарасетыхы’. Нянди’ ӈарка вада. Ним’ яляханан Ю.А. Хатанзейскойхад, Ӈэрм’ серо пэртя управление’ ервхад ӈока сава вадам’ намдамась. Мядонзэйсавэй саву’’лана вади А.Е. Булыгинхад, маня’’ ассоциацияна’’ ервхад, нюв тэврась. «Ясавэйва’’» ненэсянда ӈо’’ илма’’ сибилемби. Нянэй вадавна савулана вади В.Н. Няруй Я’малхы РИРО’ ӈаркта’ ӈудаӈылы, я’’авлада не, нянэй вадам’ нерняри’ тидхалембада не хэтась.
Ӈобӈэв савутана’’ открытка’’ Санкт-Петербургхы «Просвещение’» издательствоход, С.Ф. Зубовхад, ӈартахад, тосьты’’. Сергей Федорович ня’ нини’’ Салехардхана мэ’’махад теневыни’. Пыда манзаранида сава учебно-методической литературам’ сертаби’’. «Ненэй вада» паскойӈэ ӈадимбата тара. Пудана юн институт’ лингвистических исследований манзаранахат тось. Тикы’’ хибяри’’ ня’ Самодистикам’ минрена’’ ученой’’ нюртей, тамна нябимдей международной конференциян’ ӈэдалёрӈамась. Санкт-Петербургхана мэба’’н тикы институтан’, тамна Ӈэрм’ институтан’ вэдандорцетым’. Тикы’’ хибярихи’’ ӈобтарем’ ӈарка вада-спасибо.
Р.И. Канюкова Архангельскхад ӈэдаравы’’ вада’’
