Маня’’ округханана хойхана мюсерта’’ ненэциена ты’’ ялямдо’ пилю’’ ирий’ тось мэцьтыдо’. Тамальӈгана хибярина ӈобт’ ма’’ласьтыд, нидо’ манэць маймбасьты’’, минрена’’ манзаито’ нямна лаханавадо’ ӈока ӈэсьты’’.
Я’малкана мюсерта’’ хибяри’’ тарця ялямдо’ сыра мэ’’ӈадо’. Нянандо’ тарем’ серо’’ӈа’’. Хэвхы округханана мюсерта’’ ненэцие’’ ныланава яляхана ты’’ саполана ирийхана мэмась. Тамальӈгана ӈока хойхана мюсерта’’ лаханась ня’’ӈамась. Любовь Александровна Тайбери хойхана соявы не, теда таняна илевамда мэ’’ӈада’’. Пыда няюв тарця лаханакурмав’ танясь.
Корр: Любовь Александровна, тюку яля хэбидя ялям’ мэ’’ӈаданё, ханярид’ товы’’ ненэця’’ ма’’лы’’, тэхэна тэввыд. Пыдара’’ ханяхад’ тосада’’, хурка я’ терда?
Тайбери: Маня’’ Приуральский районхад’, ӈабцята Пэ’’няд това’’, пэ’’ няд ӈэва. Этя’ праздникан’ тэвына’’, тарця ялява похона ӈопоймэвна ӈэсь’ пэрӈа. Тянё нив’ӈа. Тарем’ таслась – ненэця’’ нидо’ ӈопой маниейдо’, ӈаха’’на няхататто’ иле’’.
Ӈобӈгэв’ тэворць ӈани’’ ни’’ серос’’. Выӈгана илена’’ ненэця’’ выдхалё ним’, яда хубта ӈэ’’нив, ӈахат’ минзь тара. Тикахад’ манзаяда са’’ӈава’’. Тэне’’ мэнар’ тэмда лэтбаӈгу, рыбак’ ӈэбта ӈани’ харта манзаяда танеӈгува.
Мань’ выӈгана соявэм’. Тамальӈгана небянана больницан’ ядэрмы’’ вани’’ӈа’’, нянэй мякана ӈацекэмда соятаӈгуда. Теда не’’ больницан’ тэворӈа’’.
Тарця ялян’ маня’’ маймбась тэворцетыва’’. Нина’’ манэ’’тава’’, поӈгнана лаханакуртава’’. Тикахад’ хуляйгуртвава’’. Хусувэй по’ турцетыва’’, нумда сава ӈэбнанда ӈэдалё тутава’’. Маня’’ хар’’на тына’’ пэрӈава’’. Хар’’на ӈэсыва, манзарани нива’’ пэр’’. Ханзер’ пир’’ӈава’’, таремъюв илева’’. Илава хар’’на минрева’’.
Корр: Тарем’ илебнанда есядамда ханяхад’ хомбида’’? Ӈавор’’ мир’’ нив’ тара, ембдяр’’ тэмдамба нив’ тара?
– Хар’’на хомбива’’. Ханяна ӈамзам’ мирдатан’, ӈамгэм’ сэдгун’ мирдатар’. Тарем’ гов манзаранаӈэ’ нива’’ толю’’. Мани’ нюкцяни’ няхар пода, ни’’ тохолкур’. Тедари’’ нянани’ мэ. Тохолкова’’ пир ӈацекына тоходанасьты, ханяӈы Аксаркан’ тэворӈа, таняна тохолкурӈа’’; ханяӈы Белояркана. Хибя’’ ханяна хаи’’, таняна тохолкурта’’.
Корр: Тюку яля’ тамна сэдорана’’ не’’ сэдвыдо’ манэлабтабаӈгу’’, пыдара’’ ӈаворида манэ’’лаб-табаӈгуда’’?
– Маня’’ хойхана иленаӈэ’ пиликов’ сэдорава’’. Мяд’ терна’’ сэдорпива’’. Хасавина, нюкцина мэтам’ сэдбаӈгун’. Не’ паныдамда, пивадамда сэдбаӈгу. Ты’’ ялян’ тована нерцю яӈга сэдорасьтыва’’. Ханяна едэй сырэй’ паным’ сэдгун’, пивам’ сэдгун’. Сянакова ялян’ тобнана сомбой панына, пивина мэцьтыва’’. Хусувэй яля’ мэта панына яӈгарка ним, тарця то’’олха мадавы’’ вани’’ ӈэӈгу.
Хойхана илева’’ маня’’ илва’’ ӈэ’’нив’. Маня’’ сёнзянана сава ӈэ’’нив. Хибят’ хой’ ил сёнзянанда’ сава, хойхана илеӈгу’’ нив. Хибя’’ ни’ сава ӈа, тикар’ тоходангу нив, тикахад’ хардахана илеӈгу нив.
Мань’ ӈобтарем’ школахана тохолкумась, тикахад’ Саля’хардахана НЗВтэна тохолкурӈамась. Сёнзями’ ӈоб выӈгана илеван’ харванарха’ ӈэсьты. Тикахад’ хаюпа хаядм’, выӈгана илесь пяв. Специальностюв’ ветеринар’, выӈгана ӈани’ тарана сер.
Нумда ӈули’ сава, ӈацекенат’ сава, нянат’ сава. Ванива’’ ханьта. Тюкон’ маня’’ хубтахана тэвынаць, мер ӈэдалёрта буранхана товаць. Хасавина тэхэнато’ ӈэдалёсь’ тоць, пыдо’ те’ няна тоць. Пуня’ ӈани буранхана хантава’’.
Тюкон’ тобнана етя’ хамандавы сеӈглава мя’ яӈгу’’ нив. Хибя’’ ханяна пир’’ӈа, таняна сеӈгсеты’’. Тикы нерцюй похо’’на Дом оленевода танясь, сава ӈэсьты. Теда, тарця харад’ яӈгумдавэдо. Тутан’, сеӈгця яӈгусеты. Тарця серу’’ тасла ним’ тара’’. Тарем турта’’ ненэця’’ ӈока ӈэ’’ним.
