Таймыр я’ няна, Дудинка маркана нянэй ненэця’’ иле’’. Пыдо’ вададо’ нядана’’ хаци’’ яӈга. Тарем’ ӈод нина’’ манэць лаханакурпана’’ нина’’ хамадабина’’. Маля ӈахакуд’ хэвхы округхана Раиса Пехедомовна Яптунэ иле. 

Паднана не’, журналист’, тикы’ хавна тамна культурахана методистӈэ’ манзара. Ӈока’’ по’’ ямбан телевидение’ манзаям’ пэрӈа. Манзаянда’ помна ӈока’’ явнанда ӈэдалёрцеты. Сидя ёнар’’ няхарамдэй яӈганя похона Раиса Пехедомовна нянэй ненэця’’ экологической календарь’ – « Нянэй ненэця’ яля падар» падась. Таняна ненэця’ ила нямна ма’’лавэда тянё ни’’ӈа’’. Хусувэй ирий’ нямна падна, тикахад’ по’ – сырэй, нарэй, таӈы, ӈэрёй нямна падвыда таня’’ хова’’ пир’’, тикахад’ паднана’’ по’ ёльць нямна падвы’’ манзая’’ таня’’. «Нянэй ненэця’ яля падарм’» тарця вада’’ нэмбидо’: « Я’ мидкад ненэй ненэця’ харту’ ялянту падар тнява. Тад тасла тикаӈэ тюку ялэ пиркана мэтава илана’ паӈг ӈы’ нив, мале сянди ёнар’ по’ хямяр’’тахат тикава нёда иле’ нивам. Невхи ненэця’ иб амгэрт падаркана падна ехэравы ӈэбту’ ӈод, ялянту падарм тю минзя нюхту’ тари вадарихна вадеманту сер тюку яляха’ тэвра нидум.

Илеванту ямбан амгэрт час нись тасламбю хаер тю тарпавам, нумта пэвсюмам хунарт ненэй ненэць вунида ёт. Ну ялэ тебта таӈота’, сырета’ ямбан хаерад ялям нёда иле ним’ вымна мюсярта ненэця. Ӈыхы я’’ мидкад ӈадьбата ненэй ненэця’ хаерадм’ ила’’ паӈгаӈэ толабиду, ненэцям тай сава яляха тэволанаӈэ.

Хурина невхи ненэцяи ва’’алакана ялянта пи’ няю сюрхалп’’ – я’’ ӈылад хуркари талирад тю’’уй тир’ ни торпорӈа. Тикыд’ илена ненэцяӈг вэсако’ серо’ минрема, хабця’ ӈэдакы, сэрад’ по’, ты’ хабцяӈо’.

Ненэй ненэцяи ва’’алкана хаер, пэвдя пи’’ ня’’ ӈавнанти ӈылека ӈа нюх’ ӈэвэхэ, тад тикад помнанзи пёдмахданти тада’ ян сидмэхэ. Ӈадьбата нумта няби хэв – пи пэвдя, няби хэвда – хаерад яля. Хурина ӈарка ненэця тю’’ минзя ӈацэкэхэ ӈадьбат’ця ваалад вадесяты. Манзеты – хаер тю’’ юркмарихид Нум’’ хасава мале тыда подеркая нув’’ ёрхана ӈэдалёрманзь хая’’. Пыдар ӈобтарем тикарихина хаерад ялям манэсома’’хадант минхант пэӈант нид санад’’, пин тарпад. Нув ерв хасава хаерад ӈадивомахад сямян явна ядерӈа’, пэвсюм няна хаер пакалма нерцюна мяканта тэворӈа. Тикад минханта хонаӈга еся мята мю’’. Я’’ тир ниня ӈадьбата тиртя’, я’’ сармик ӈэя тикана вули малханту ӈоб тарем нямзерӈга. Пи пэвдяхана ява’ ӈоб ӈани нылан нив. Невхи ненэцяи’ лахрехна нум ерв ватона хаер ӈадиберӈа, тад тикад нумта сюраворӈава, хадуворӈава, хуркари ӈылека’’ мерзя ӈэдакы, хибедя яв’ ид’ Нув’’ ерв ватона турӈа’. Ӈадьбата иренана’, нисянана’, ӈармы’ ненэця’ нумт ханонта саваха иланантамту ханзь, едясяванту еэмня.

Ненэця хаерадм ила паӈгаӈэ толабю нидум, ирым пыда ӈылэда няданта вадеӈаду.»