Ӈэрм’ яхана хуркари’’ тенз’ мэта’’ хибяри’’ иле’’. Пыдо’ харто’ вадавнандо’ лахана’’, харто’ сёдо’ мэ’’ӈа’’, вадакудо’ нюхуто’ ваде’’ӈа’’. Тюку яля’ эскимос’’ вадаком’ толара’’. Ӈацекые’’, тикы вадаком’ намдась, падтавы’’ манзаям’ сертада’’. «Хунтавы хынабц» вадаком’ нянэй вадан’ паднанава’ Василий Ледков падвэдась.  

Нарада то. Иба яхат то’’махаданди’ Берингов’ яв’ вар’ тальбя’ ни’ сидя лэ’’мор’’ ӈамдыхы’. Ян’ яв’ вархы пэ лаӈг’ ядан’ пидямди’ миӈаха’. Небя лэ’’мороко сар’’нюда ха’’авра, тикамда ӈамдалпа пяда. Нюда ханибтевоӈгад пидяхартахаданда тиӈга пинась. Сарёхот нюда пыхыдахананда талбида. Немам’ вуни мэс’’, вуни ӈавор’’.

Ӈаво пирка’’на сарнюхуд ню ханийда ӈадимя. Тикар  ӈули’’ и’ ватовна ӈэда, ӈули’’ еванзы!  Яв’ вар’ ӈардан’ сита пирувна мирбята ханий вуни таня’’. Тикырида вэва – саць тёррик. Небяда, нисяда ӈод’’ идм’ юрӈаха’, ӈаварм’ юрӈаха’, немам’ юрӈаха’. Нисяюм’ хане хэб’’нанда небяюм’ нюкцямда хынтамби. Небяюм’ хэбта нисяюм’ нюмди’ манзая’’ ӈа:

Хибя’, хибя’ тикы нюдяко’’ ӈэкоця’’?

Хибя’, хибя’ тикы нюдяко’’ токоця’’?

Хибя’, хибя’ тикы нюдяко ӈэвакоця?

Хибя’, хибя’, хибя’, хибя’?

Ирмнанди’ харӈэс пенабтёвы. Нюкубцям’ намдхава нись ӈаха’’ ӈамды’’, инзеле пяда. Инзеле, инзеле- пыхыдамда юра инзеле. Тикы хынабцако вадаси’’ инда вато ӈэвы. Харӈэс лэ’’морэцям’ хынумба пяда: - Хынабцямд мядонзэйдан тадва! Хынабцяр тадва! Лэ’’морэця лахана: - Ханзер?! Тась я’’мав. Ӈопойри, хынабцув ӈопой. Ӈани хынабцями яӈгу.

- Хынумбидм’! Тикы хынабцянзи’’ мань нерня’ илехэрта нидм’ пират’’!

- Хынабцянзи’’ мань нюкцяев ӈобтарем’ хонара я’’амсеты’’. Нён сэкта’’, нив тат’’! Харӈэс нензюмя тёрена: - Саванзер’ нибат та’’, ныхыри’ мартав! Харӈэс лэ’’морэцям’ хынхалада, хынабцм секадтада., хэвня’ пенэй’’…

Вадако’ нюртей пелянда мал. Нюта’’ падтавы’’ манзаи’’ редакцияхана тэврэйда’’, «Ялумдхана» манэ’’лабтаӈгуна’’.