Вы здесь

Тоходанвась’ ӈэдалаӈгуд’

Хусувэй по’ округханана ӈацекына школам’ ёльцеби’’. Ӈоб’яӈганя классм’ ёльцевы’’ ӈокаювдо’ нерня тохолковамдо’ университетхана, институтхана мэ’’мась тасламбсетыдо’.

Таняна сян’’ по’’ тоходанась, манзаравась со’’явы яхандо’ специалистӈэ’ тосьты’’. Манзаядамдо’ хось, манзаравась’ пясьтыдо’. Сидя ёнар’’ самлязимдей яӈганя похона ӈод’ ӈацекына школамдо’ ёльцець.

Тюку по’ школамдо’ ёльцевы’’ ӈацекына маля тасладонзь’ ханяна нерня тохолковамдо’ мэтадо’, хурка манзаян’ тоходанангу’’. Маня’’ округна ӈацекы’’ тоходанвам’ федеральный бюджетхад’ салдамбидо’, тикахад тарця ӈацекы’’ таня’’, хуний тохолковамдо’ харто’ салдамбаӈгудо’. Тюку по’ округхадана сидя ю’’ няхар’’ тюку по’ школамдо’ ёльцевы’’ ӈацекы’’ тохолкоадо’ федеральный бюджетхад’ салдав ӈэӈгу’’. Пыдо’ Северо-Западный федеральный округ’ вузхана тоходангу’’.  Хасую’’ ӈацекэва’’ СГМУ студентӈэ’ таславы’’, пыдо’ лекарь’’ манзаян’ тоходангу’’. Тохолкодаӈэ’ сидя яӈганя ӈацекы’’ САФУхана тоходангу’’. Тикы’ хавна округна ӈэсыхына тоходанвы’’ ӈацекына’’ вэба’’ ирийхана А.И.Герцен’ нювм’ нюбета РГПУ няби Петрозаводский госуниверситет’ студентӈэ’ ханта’’, мал’’ пыдо’ тохолкодаӈэ’ тоходанвась ӈэдалаӈгуд’. Таняна декоративно-прикладной искусство, химия, биология тохолкодаӈэ’ тоходангу’’.

Теда университетха’ студент’’ едэй ватовна тоходанвась’ турӈа’’. Невхы’’ по’’ тотрев’  регион’’ квотыдо’ яӈгу’’. РФ Министерство образование и науки квоты’’ тарця унивеситетха’ тасламби, ханяна учредительӈэ’ тара. Теда университет’’ студентӈэ’ хэвндяха’ тэврамбидо’, хурка специальностян’, сян’ местам’ таби’’. Тикы направлениявна маля вступительный конкурс’ сертамби’’.

Тарем’ ӈэбнанда ӈод’ тюку по’ ӈацекына тоходанвась’ ӈэдалаӈгуд’. Пыдо’ сян по’’ ваерась харвабнанда’ пуня хари’’ яхандо’ манзаравась’ тэвӈгуд’.